Read Magandang Balita Biblia, 2005 Mga Kawikaan 7 Bible Online

Mga Kawikaan 7 - Magandang Balita Biblia, 2005 bible

Mga Kawikaan 7

¹Aking anak, salita ko sana ay ingatan, itanim sa isip at huwag kalimutan.

²Ang utos ko ay sundin mo upang mabuhay nang matagal, turo ko'y pahalagahan tulad ng iyong mga mata.

³Ito'y itali mo sa iyong mga kamay, at sikapin mong matanim sa iyong isipan.

⁴Ang karunungan ay ituring mo na babaing kapatid, at ang pang-unawa nama'y kaibigang matalik.

⁵Pagkat ito ang sa iyo'y maglalayo sa babaing mapangalunya, nang di ka mabighani ng matamis niyang pananalita.

⁶Ako ay dumungaw sa bintanang bukás, at ako'y sumilip sa pagitan ng rehas,

⁷ang aking nakita'y maraming kabataan, ngunit may napansin akong isang mangmang.

⁸Naglalakad siya sa may panulukan, ang tinutungo'y sa babaing tahanan.

⁹Tuwing sasapit ang gabi, ito'y kanyang ginagawa, sa lalim ng hatinggabi, kapag tulog na ang madla.

¹⁰Ang babae ang sa kanya'y sumalubong sa pintuan, mapang-akit, mapanlinlang sa masagwang kasuotan.

¹¹Maingay ang kanyang boses, kilos niya ay maharot, di matigil sa tahanan, di mapigil sa paglibot.

¹²Ngayo'y sa lansangan, maya-maya'y sa liwasan, walang anu-ano'y sa panulukan, doon siya nag-aabang.

¹³Lalaki'y kanyang susunggaban at pupupugin ng halik, at ang kanyang sasabihing punung-puno ng pang-akit:

¹⁴“Nasa amin ngayon ang marami kong mga handog, katatapos ko lang tupdin ang panata ko sa Diyos.

¹⁵Ako ay narito upang ika'y salubungin, mabuti't nakita kita pagkatapos kong hanapin.

¹⁶Ang aking higaa'y sinapnan ko nang makapal, linong buhat sa Egipto, iba't iba pa ang kulay.

¹⁷Ito'y aking winisikan ng pabangong mira, bukod pa sa aloe at mabangong kanela.

¹⁸Halika at bigyang daan, damdamin ng isa't isa, ang magdamag ay ubusin sa paglasap ng ligaya.

¹⁹Ako ay nag-iisa, asawa ko'y nasa malayo, pagkat siya ay umalis sa ibang lugar nagtungo.

²⁰Marami ang baon niyang salapi, pagbilog pa ng buwan ang kanyang uwi.”

²¹Sa salitang mapang-akit ang lalaki ay nahimok, sa matamis na salita, damdamin niya ay nahulog.

²²Maamo siyang sumunod sa babae at pumasok, parang bakang kakatayin, sa matador ay sumunod, mailap na usa, sa patibong ay nahulog,

²³hanggang sa puso nito ang palaso ay maglagos. Isang ibong napasok sa lambat ang kanyang nakakatulad, hindi niya namalayang buhay pala ang katumbas.

²⁴Kaya nga ba, aking anak, sa akin ay makinig, at dinggin mo ang salitang mula sa aking bibig.

²⁵Huwag mo ngang hahayaang ang puso mo ay maakit, ng babaing ang tuntunin ay landasing nakalihis,

²⁶sapagkat marami na ang kanyang naipahamak, at hindi na mabibilang, nabuwal sa kanyang yapak.

²⁷Sa bahay niya'y nagmumula ang landas ng kasawian, tiyak na patungo sa malagim na kamatayan.