Read Magandang Balita Biblia, 2005 Ecclesiastico 17 Bible Online

Ecclesiastico 17 - Magandang Balita Biblia, 2005 bible

Ecclesiastico 17

¹Nilikha ng Panginoon ang tao mula sa alabok, at ito'y sa alabok din uuwi.

²Binigyan niya ang tao ng maikling buhay, ngunit ipinailalim sa kanyang kapangyarihan ang lahat ng bagay sa ibabaw ng lupa.

³Pinagkalooban niya sila ng kalakasang tulad ng sa kanya, at ginawa silang kawangis niya.

⁴Niloob ng Panginoon na ang lahat ng may buhay ay matakot sa tao, at maghari ito sa mga hayop sa lupa at ibon sa himpapawid. [42]

⁶Binigyan niya ang tao ng dila, mga mata at tainga, at kapangyarihang mag-isip at magpasya.

⁷Pinuspos pa niya ng kaalaman at karunungan, at tinuruang kumilala ng mabuti at masama.

⁸Pinaliwanag ng Panginoon ang isipan ng mga tao, at ipinakilala sa kanila ang kagandahan ng kanyang nilalang, [43]

¹⁰upang papurihan nila ang kanyang pangalan at ipahayag ang kadakilaan ng kanyang mga gawa.

¹¹Ibinigay niya sa tao ang kanyang mga aral, at ipinamana sa kanila ang Kautusang nagbibigay-buhay.

¹²Nakipagtipan siya sa mga tao magpakailanman, at ipinahayag sa kanila ang kanyang mga kautusan.

¹³Nakita nila ang kanyang maningning na paghahari, at narinig nila ang kanyang maluwalhating tinig.

¹⁴Sinabi niya sa kanila: “Mag-ingat kayo sa lahat ng masama;” at iniutos sa kanila ang tungkulin ng bawat isa sa kanyang kapwa. Ang Diyos ang Hahatol

¹⁵Nakikita ng Panginoon ang lahat ng ginagawa ng tao, at walang nalilingid sa kanya na anuman. [44]

¹⁷Nang itatag ng Panginoon ang iba't ibang bansa sa daigdig, binigyan niya ang bawat bansa ng kanyang tagapamuno; ngunit ang Israel ay hinirang niyang maging bayan niya. [45]

¹⁹Ang gawa ng tao'y malinaw pa sa liwanag ng araw at minamasdan ng Panginoon ang pamumuhay ng tao.

²⁰Hindi maitatago sa kanya ang kanilang kasamaan, at nakikita niya ang lahat nilang kasalanan. [46]

²²Parang singsing na pantatak sa paningin ng Panginoon ang pagkakawanggawa ng tao, pinahahalagahan niyang parang balintataw ng kanyang mga mata ang kanilang kabutihang asal.

²³Darating ang araw na siya'y maghihiganti laban sa masasama, at babagsak sa kanila ang parusang nararapat sa kanila.

²⁴Ngunit lagi niyang tinatanggap ang nagbabalik-loob, at inaaliw ang nawawalan ng pag-asa. Panawagan sa Pagsisisi

²⁵Iwan mo na ang kasalana't lumapit ka sa Panginoon, magsumamo ka sa kanya at mapapawi ang iyong sala.

²⁶Manumbalik ka na sa Kataas-taasang Diyos; talikuran mo na ang gawang masama, at kamuhian mo ang kanyang kinasusuklaman.

²⁷Sino ang magpupuri sa Kataas-taasang Diyos sa daigdig ng mga patay? Ang mga buháy lamang ang maaaring magpuri sa kanya.

²⁸Ang mga patay, sapagkat sila'y wala na, ay di maaaring umawit ng papuri sa Panginoon; mga buháy lamang at malulusog ang maaaring magpuri sa kanya.

²⁹Kay laki ng habag ng Panginoon; anong dali niyang magpatawad sa nagbabalik-loob sa kanya!

³⁰Hindi maaaring kamtan ng tao ang lahat ng bagay, sapagkat ang lahi ng tao ay may kamatayan.

³¹Mayroon bang anumang maningning pa kaysa araw? Ngunit pati ito ay nagdidilim din kung minsan. Gayundin ang tao na minsa'y gumagawa ng masama.

³²Pinahahanay ng Panginoon ang mga hukbo ng langit, ngunit ang tao ay putik lamang at alabok.