Read Magandang Balita Biblia, 2005 Ecclesiastico 19 Bible Online

Ecclesiastico 19 - Magandang Balita Biblia, 2005 bible

Ecclesiastico 19

¹Kapag ganyan nang ganyan, hindi ka yayaman. Ang nag-aaksaya ng mumunting bagay, hindi magluluwat at mauubusan.

²Inililigaw ng alak at babae ang matinong lalaki; at nawawalan ng kahihiyan ang nakikipagtalik sa babaing bayaran.

³Hanggang sa siya'y mapahamak dahil sa kanyang kapusukan, at ang bangkay niya'y maging pagkain ng mga uod.

⁴Ang madaling magtiwala ay nagpapakilalang mababaw ang isipan; at ang gumagawa ng masama ay nagpapahamak sa sarili.

⁵Ang nalulugod sa masama ay hindi malayong mapaparusahan. Laban sa Kadaldalan

⁶Ang umiiwas sa daldalan ay malayo sa kapahamakan.

⁷Huwag mong sabihin sa iba ang bawat narinig mo, at hindi ka masasangkot sa maraming gulo.

⁸Liban na lamang kung ipagkakasala mo ang di pagsasalita. Huwag mong isisiwalat ang lihim ng iba sa iyong kaibigan o kaaway.

⁹Sapagkat may makakakita at makakarinig sa iyo, at hindi magtatagal at kapopootan ka.

¹⁰Nakarinig ka ng balita? Sarilinin mo na lamang; huwag kang matakot, hindi ka sasabog dahil doon.

¹¹Kapag ang hangal ay nakasagap ng anumang balita, nababalisa siyang parang buntis na hindi mapaanak; sabik na sabik siyang isiwalat iyon sa madla.

¹²Parang palasong nakatusok sa hita, ang isang lihim sa dibdib ng hangal.

¹³Kausapin mo muna ang iyong kaibigan tungkol sa nabalitaan mong ginawa niya; baka naman hindi niya ginawa iyon. At sakaling ginawa nga niya, ay nang huwag nang maulit pa.

¹⁴Kausapin mo ang iyong kapitbahay tungkol sa nabalitaan mong sinabi niya, baka naman hindi niya sinabi iyon. At sakaling sinabi nga niya, ay nang huwag nang maulit pa.

¹⁵Kausapin mo ang iyong kaibigan sa nabalitaan mo tungkol sa kanya; kalimitan ang mga kumakalat na balita ay paninira lamang. Huwag ka agad maniniwala sa bali-balita.

¹⁶Kung minsan, nadudulas ang dila ng tao nang di sinasadya; sino ba ang di nagkakasala sa pananalita?

¹⁷Tanungin mo muna ang isang tao bago ka magbanta sa kanya, sa gayon, matutupad mo ang Kautusan ng Kataas-taasang Diyos nang hindi ka nagagalit. [51] Tunay at Di Tunay na Karunungan

²⁰Ang takot sa Panginoon ang kabuuan ng lahat ng Karunungan, at ang ganap na Karunungan ay pagtupad sa Kautusan. [52]

²²Hindi tunay na Karunungan ang katalinuhan sa gawang masama, at walang mabuting ibubunga ang payo ng masasamang tao.

²³Mayroong karunungang karumal-dumal, at mayroon namang nag-aasal hangal dahil sa kanilang kamangmangan.

²⁴Mabuti pa ang kakaunti ang nalalaman ngunit may takot sa Diyos, kaysa napakarunong ngunit lumalabag sa Kautusan.

²⁵May katalinuhang ginagamit sa paglabag sa katarungan, at may mga taong nanlilinlang makamtan lamang ang ninanais.

²⁶May taong nakayuko at kunwa'y nagdadalamhati, ngunit ang totoo'y masama ang binabalak.

²⁷Nakapaling ang mukha at kunwa'y hindi nakakarinig, ngunit kapag walang nakakapansin, pagsasamantalahan ka.

²⁸Kung sa tingin niya'y hindi ka pa niya kaya ngayon, hindi ka niya gagawan ng anuman; ngunit sa unang pagkakataon, pagsasamantalahan ka niya.

²⁹Makikilala mo ang isang tao sa kanyang anyo, at mahahalata agad ang marunong sa una ninyong pagkikita.

³⁰Sa kanyang pananamit nakikilala siya, sa kanyang pagtawa at sa kanyang paglakad.