Read Magandang Balita Biblia, 2005 Ecclesiastico 24 Bible Online

Ecclesiastico 24 - Magandang Balita Biblia, 2005 bible

Ecclesiastico 24

¹Papuri sa Karunungan Ito ang papuri na isinalaysay ng Karunungan tungkol sa kanyang sarili,

²sa kapulungan ng Kataas-taasang Diyos, ipapahayag niya, sa harap ng mga anghel [63] magpupuri siya.

³“Nanggaling ako sa bibig ng Kataas-taasang Diyos, at parang ulap na lumukob ako sa ibabaw ng lupa.

⁴Ang tahanan ko'y nasa kaitaasan, at ang luklukan ko'y nasa ibabaw ng isang haliging ulap.

⁵Nag-iisa akong naglibot sa kalangitan at naglakad sa pusod ng kalaliman,

⁶Nasa ilalim ng kapangyarihan ko ang tubig sa karagatan, ang buong daigdig at ang lahat ng mga bansa at lahi.

⁷Naghanap ako ng mapapagpahingahan sa piling nila, namili ako sa kanilang mga lupain ng matitirahan.

⁸At ang Lumalang sa lahat ang nag-utos sa akin; siya, na lumikha sa akin ang nagtakda ng aking tirahan. Sinabi niya, ‘Sa lupain ni Jacob, itayo mo ang iyong tahanan, ang bayang Israel ang iyong magiging mana.’

⁹Nilikha niya ako bago pa nagsimula ang mga panahon, at mananatili ako magpakailanman.

¹⁰Naglingkod ako sa kanya sa tahanang banal, at sa Bundok ng Zion ako nanirahan.

¹¹Ako nga'y pinatira niya sa lunsod niyang mahal, at inilagay niya ang Jerusalem sa ilalim ng aking pamamahala.

¹²Nag-ugat ako sa piling ng bayang dinakila, at piniling maging tanging bayan ng Panginoon.

¹³Doon ay yumabong akong gaya ng sedar sa Lebanon at tulad ng sipres sa Bundok ng Hermon.

¹⁴Doon ay tumaas akong gaya ng palma sa Engedi, [64] at nanariwang gaya ng rosas sa Jerico. Doon ay lumago akong tulad ng olibo sa kabukiran, at tulad ng isang malaking puno ay lumaki ako.

¹⁵Humalimuyak ang aking bango tulad ng kanela, gaya ng balsamo at mamahaling mira, tulad ng galbano, astakte o onica, parang usok ng insenso na pumapailanlang sa tahanang banal.

¹⁶Yumabong ang aking mga sanga gaya ng ensina, madadahon at magaganda.

¹⁷Tulad ng punong-ubas, nakatutuwa ang aking mga usbong; at ang bulaklak ko'y namunga ng dangal at kayamanan. [65]

¹⁹Lumapit kayong lahat, kayong nananabik sa akin, at magpakabusog kayo sa aking mga bunga.

²⁰Sapagkat ang pag-alala ninyo sa akin ay matamis pa kaysa pulot na galing sa bahay-pukyutan.

²¹Kainin ninyo ako't inumin, at hihingi pa uli kayo.

²²Ang sumusunod sa akin ay hindi mapapahiya, ang tumutupad ng aral ko ay di magkakasala.” Ang Karunungan at ang Kautusan

²³Ang karunungan ay ang Kautusan, ang Kautusan na ipinatutupad sa atin ni Moises, ang tipan ng Kataas-taasang Diyos, ang mana ng sambayanan ng Israel. [66]

²⁵Sa Kautusan nagmumula ang Karunungan, umaapaw na gaya ng Ilog Pison, tulad ng Tigris sa panahon ng unang pamumunga.

²⁶Sa Kautusan bumubukal ang pang-unawa, umaagos na gaya ng Ilog Eufrates, tulad ng Ilog Jordan sa panahon ng tag-ani.

²⁷Sa Kautusan bumubukal ang mabubuting aral, gaya ng Ilog Nilo, [67] tulad ng Ilog Gihon sa panahon ng pamimitas ng ubas.

²⁸Kung paanong hindi lubos na maunawaan ng unang tao ang karunungan, wala pa ring makatatarok sa kanya hanggang sa wakas.

²⁹Sapagkat malawak pa kaysa karagatan ang kanyang kaisipan, malalim pa kaysa kalaliman ang kanyang mga payo.

³⁰Ang tulad ko'y isang kanal ng patubig, na umaagos mula sa ilog patungo sa isang halamanan.

³¹Sinabi ko noon: Didiligin ko ang aking halamanan, at titigmakin ko ang aking mga taniman; at ngayon, ang aking kanal ay naging ilog, at ang aking ilog ay naging dagat.

³²Ihahanay kong muli ang mabuting aral, maliwanag na parang bukang-liwayway upang kumalat ang liwanag niya hanggang sa malayo.

³³Palalaganapin kong muli ang mabuting aral, na parang isang pahayag, mula sa Diyos upang maging pamana sa mga susunod na salinlahi.

³⁴Ang pagpapagal ko'y hindi para sa akin lamang, kundi para sa lahat ng naghahangad ng Karunungan.