Read Magandang Balita Biblia, 2005 Ecclesiastico 25 Bible Online

Ecclesiastico 25 - Magandang Balita Biblia, 2005 bible

Ecclesiastico 25

¹Ang Karapat-dapat Papurihan May tatlong bagay akong kinagigiliwan, na kinalulugdan ng Diyos at maganda sa paningin ng tao: ang pagsusunuran ng magkakapatid, ang pagkakaibigan ng magkapitbahay, at ang pagmamahalan ng mag-asawa.

²Tatlong uri naman ng tao ang aking kinapopootan, at ang gawa nila'y labis kong kinasusuklaman: ang maralitang nagmamataas, ang mayamang sinungaling, at ang matandang hayok sa laman.

³Kung hindi ka mag-iimpok ng Karunungan samantalang bata pa, anong iyong aasahan kapag tumanda na?

⁴Kahanga-hanga ang isang matanda sa kakayahan nitong umunawa, at ang may karanasan sa kanyang pagpapayo.

⁵Nararapat na ang isang matanda ay maging marunong at ang taong marangal ay maging mabuting tagapayo.

⁶Ang mahabang karanasan ang putong ng katandaan, at ang paggalang sa Panginoon ang tunay nilang karangalan. Ang Kawikaan

⁷Siyam na bagay ang nagbibigay sa akin ng kasiyahan, at may isa pa akong idaragdag: Ang magulang na ang kaligayahan ay ang kanyang mga anak; ang taong saksi sa pagbagsak ng kanyang mga kaaway;

⁸ang lalaking may matalinong asawa; ang mag-asawang nagkakasundo, ang taong hindi nagkakasala sa pananalita; ang taong hindi naglilingkod sa mas hamak kaysa kanya;

⁹ang taong nakatagpo ng isang tapat na kaibigan; ang taong kinagigiliwang pakinggan kapag siya'y nagsasalita;

¹⁰ang taong nagkamit ng Karunungan; ngunit higit sa lahat ang taong may paggalang sa Panginoon.

¹¹Ang paggalang sa Panginoon ay higit sa lahat ng bagay dito sa sanlibutan, at ang taong mayroon nito ay walang katulad. [68] Ang Babae

¹³Sa lahat ng sugat, pinakamahapdi ang sugat sa puso; sa lahat ng panliligalig, wala nang hihigit pa sa panliligalig ng babae.

¹⁴Pinakamasakit na pahirap ang parusa ng napopoot; pinakamalupit na ganti ang paghihiganti ng kaaway.

¹⁵Pinakamasamang kamandag ang kamandag ng ulupong; pinakamatinding poot ang poot ng babae. [69]

¹⁶Mabuti pa ang mag-alaga ng isang leon o dragon, kaysa mag-asawa ng isang masungit na babae.

¹⁷Ang mukha niya'y pinapapangit ng kanyang kasungitan, anupa't siya'y nagmumukhang galit na oso.

¹⁸Kapag ang asawa niya'y kasalo ng kanyang mga kaibigan, abut-abot ang kanyang buntong-hiningang di mapigilan.

¹⁹Walang ligalig sa buhay na maipapantay sa kaligaligang dulot ng babae; nawa'y sapitin din niya ang kasawian ng mga makasalanan.

²⁰Kung gaano kahirap para sa isang matanda ang umahon sa isang bundok na buhangin, gayon kahirap para sa isang lalaking tahimik ang makisama sa isang babaing madaldal.

²¹Huwag kang pahahalina sa kagandahan ng babae, at huwag kang mahuhumaling na makamtan siya. [70]

²²Kapag ang lalaki'y palamunin ng asawa, wala siyang mahihintay kundi kadustaan, kahihiyan at alimura.

²³Ang masungit na babae'y hirap ng loob ng asawa, at wala siyang idudulot dito kundi pawang kalungkutan, kabiguan at kahihiyan.

²⁴Sa babae nagsimula ang kasalanan, at dahil sa kanya tayong lahat ay mamamatay.

²⁵Huwag mong babayaang tumulo ang tubig, at pigilan mo ang masamang pananalita ng iyong asawa.

²⁶Kung ayaw niyang pasakop sa iyo, mabuti pa'y hiwalayan mo siya.