Read Magandang Balita Biblia, 2005 Ecclesiastico 31 Bible Online

Ecclesiastico 31 - Magandang Balita Biblia, 2005 bible

Ecclesiastico 31

¹Ang Kayamanan Ang pag-aalala sa kayamanan ay nakakapayat bunga ng pagpupuyat at kawalan ng pahinga.

²Ang labis na pag-aalala sa hanapbuhay ay di nagpapatulog sa gabi, parang malubhang sakit na ayaw magpatulog.

³Puspusang nagtatrabaho ang mayaman upang magkamal siya ng salapi, sa gayon, pagtigil niya'y maaari na siyang magpasasa sa buhay.

⁴Nagpapagal din ang mahirap ngunit wala namang naiipon, at pagtigil niya'y dukha pa rin siya.

⁵Ang labis na nagmamahal sa ginto ay mahirap maging banal, ang gahaman sa pagkita ay malamang magkasala.

⁶Dahil sa salapi ay marami nang bumagsak at lubusang napahamak.

⁷Para sa mga sumasamba sa salapi ito ay isang patibong, at maraming mga hangal ang nahulog doon.

⁸Mapalad ang yumaman nang hindi nagkasala, na hindi nagpakahibang sa paghabol sa salapi.

⁹Sino siya na dapat nating parangalan? Siya lamang sa kanyang lahi ang nakagawa ng gayong kamangha-manghang bagay.

¹⁰Sino ang nakaranas ng gayong pagsubok at nagtagumpay? May katuwiran siyang ipagmalaki ito. Nagkaroon siya ng pagkakataong magkasala, ngunit hindi siya nagkasala. Maaari siyang gumawa ng masama, ngunit hindi niya ginawa.

¹¹Dahil dito'y magiging matatag ang kanyang kabuhayan at pupurihin ng buong bayan ang mga ginawa niyang kabutihan. Tungkol sa Pagdalo sa mga Handaan

¹²Kapag ikaw ay naanyayahan sa isang maringal na piging huwag kang magpakita ng pananabik at magsabing, “Mukhang masarap ito!”

¹³Tandaan mo na masama ang katakawan, at sa lahat ng nilalang, walang kasintakaw ang mata; kaya naman napakalimit itong naluluha.

¹⁴Huwag mong dadamputin ang lahat ng iyong makita, at huwag kang makikipag-unahan sa pagdampot ng pagkain.

¹⁵Alalahanin mo ang damdamin ng iba batay sa sarili mong damdamin, at maging maunawain ka sa lahat ng pagkakataon.

¹⁶Kainin mo ang anumang nakahain sa iyo na para kang isang maginoo, at huwag kang magpakita ng magaspang na asal kung hindi mo nais na ikaw ay kamuhian.

¹⁷Hinihiling ng kagandahang-asal na magpauna kang umayaw. Huwag kang magpakita ng labis na katakawan nang hindi ka lumabas na kahiya-hiya.

¹⁸Kung marami kang kasalo sa piging, huwag kang magpauna sa pagkuha ng pagkain.

¹⁹Ang kaunti ay tama na sa may magandang-asal at kapag siya'y nahiga, maginhawa ang kanyang paghinga.

²⁰Ang kumakain nang katamtaman lamang ay mahimbing matulog, maagang magising, magaan ang katawan at malinaw ang isip; ngunit ang kumakain nang labis ay hindi agad makatulog, balisa ang katawan at hirap ang loob.

²¹Sakaling maparami ang kinain mo sa piging tumayo ka, at magpahinga [79] at magiginhawahan ka.

²²Makinig ka anak, at huwag mong hahamakin itong sasabihin ko, darating ang araw na makikita mo rin ang halaga nitong aking payo. Anuman ang gagawin mo'y huwag kang magpakalabis, at maaasahan mong hindi ka magkakasakit.

²³Ang masarap maghanda ay pupurihin ng lahat, at ang karangalang iyon ay mananatili habang panahon.

²⁴Ang napakatipid maghanda ay mababalitang kuripot at ang paniniwalang iyan ay mahirap pabulaanan. Ang Alak

²⁵Huwag mong ipagmayabang ang lakas mo sa inuman, marami na ang napahamak sa pag-inom ng alak.

²⁶Kapag pinabaga at binasa ang patalim, nasusubok ang husay nito, sa kanyang pag-inom nakikilala ang maginoo.

²⁷Ang alak ay nagpapasigla sa buhay kapag ito'y ininom nang katamtaman. Ano ang sarap ng mabuhay kung walang alak? Ang alak ay nilikha upang magpaligaya sa tao.

²⁸Kung ang alak ay iniinom nang napapanahon at nang katamtaman, ito ay nagpapaligaya sa puso at nagpapasigla ng kalooban.

²⁹Ngunit sakit ng ulo, hirap ng loob at kahihiyan, ang dulot ng alak kapag ininom nang labis.

³⁰Ang pagkalasing ay nagiging gatong sa galit ng hangal, na nagbubunsod sa kanya sa kapahamakan. Nakakabawas ng lakas at nakadaragdag ng mga sugat.

³¹Huwag mong pagsasabihan ang isang tao sa oras ng inuman, huwag mo siyang hahamakin habang siya'y nagsasaya. Hindi iyon ang panahon ng pakikipagtalo, at paniningil ng pautang.