Read Magandang Balita Biblia, 2005 Ecclesiastico 32 Bible Online

Ecclesiastico 32 - Magandang Balita Biblia, 2005 bible

Ecclesiastico 32

¹Asal sa Handaan Kapag ikaw ay nangangabisera sa isang handaan, huwag mong ipagmamayabang iyon; makiisa ka sa kilos ng ibang panauhin. At tingnan mo muna kung maayos na ang lahat bago ka maupo.

²Kapag natupad mo na ang mga dapat mong gawin ay maupo ka na, at makipagsaya sa lahat ng dumalo. Sa gayon ay tatanggap ka ng papuri dahil sa iyong mahusay na pamamahala.

³Kung ikaw ay nakakatanda, may karapatan kang magsalita, ngunit huwag kang magpapaliguy-ligoy o aabalahin ang musika.

⁴At kung may palatuntunan, huwag kang magsalita tungkol sa palabas, hindi iyon ang pagkakataon upang ipakita ang iyong galing.

⁵Parang rubi na nakatampok sa isang gintong singsing ang musika sa oras ng piging.

⁶Parang batong esmeralda sa isang singsing na ginto, ang masayang tugtugan sa pagtungga ng masarap na alak.

⁷Maaari ding magsalita ang kabataan kung kinakailangan, ngunit dalawang beses lamang at kung siya'y tinatanong.

⁸Sabihin ang ibig ipahayag sa maikling pangungusap lamang; ipakita mong ikaw ay maraming nalalaman ngunit hindi masalita.

⁹Huwag kang pangahas kung ang mga kasama mo'y nakakataas sa iyo, at huwag kang maingay kapag may ibang nagsasalita. [80]

¹⁰Katulad ng kidlat na nauuna sa kulog, ang kagandahang-asal ng isang tao ay nababalita na bago pa siya makilala.

¹¹Sa oras nang uwian, mamaalam ka na agad, at huwag ka nang magtatagal pa sa iyong pag-alis. Tumuloy ka na agad sa iyong tahanan.

¹²Doon ka maaaring maglibang ayon sa gusto mo, huwag ka lang magkasala sa pagmamayabang.

¹³Higit sa lahat, magpasalamat ka sa dakilang Lumikha, na nagkaloob sa iyo ng kanyang mga pagpapala. Ang Paggalang sa Diyos

¹⁴Ang may paggalang sa Panginoon ay napasusupil sa kanya, at ang gumigising nang maaga upang manalangin ay pinagpapala niya.

¹⁵Naliligayahang sumunod sa Kautusan ang nagsisikap makaunawa nito, ngunit ito'y nagiging balakid sa taong hipokrito.

¹⁶Nakapagpapasya nang wasto ang may paggalang sa Panginoon, at ang mabubuti nilang gawa ay nagliliwanag na parang ilaw.

¹⁷Ang makasalana'y di tumatanggap ng pangaral, at binibigyan ng dahilan ang anumang naisin niya.

¹⁸Laging nakikinig sa paalala ang taong matino, wala namang nakakapigil sa lapastangan at palalo. [81]

¹⁹Huwag kang gagawa ng anuman na di muna pinag-isipang mabuti, at nang hindi mo pagsisihan sa bandang huli.

²⁰Huwag kang lalakad sa mapanganib na daan, at ingatan mong huwag matalisod sa mabatong landas.

²¹Huwag kang masyadong magtitiwala sa daang maaliwalas, [82]

²²sa halip, tingnan mong mabuti ang iyong binabagtas.

²³Anuman ang ginagawa mo'y lagi kang mag-iingat, iyon ang tunay na pagsunod sa mga kautusan.

²⁴Ang naniniwala sa Kautusan ay sumusunod sa mga ipinag-uutos nito; ang nagtitiwala sa Panginoon ay hindi mapapasama.