Read Magandang Balita Biblia, 2005 Ecclesiastico 33 Bible Online

Ecclesiastico 33 - Magandang Balita Biblia, 2005 bible

Ecclesiastico 33

¹Hindi mapapahamak kailanman ang may takot sa Panginoon; sa lahat ng pagsubok siya'y laging maliligtas.

²Ang taong marunong ay di napopoot sa Kautusan, ngunit ang tumutupad nito nang paimbabaw ay parang bangkang hinampas ng bagyo.

³Ang matalinong tao ay nananalig sa Kautusan; ang tiwala niya dito'y tulad sa tinig ng Panginoon.

⁴Ihanda mo ang iyong sasabihin kung nais mong ikaw ay pakinggan, isaayos mo muna ang iyong nalalaman bago ka tumugon.

⁵Parang gulong ng kariton ang isipan ng mangmang, parang paikut-ikot na ehe ang kanyang pangangatuwiran.

⁶Ang kaibigang mapanlibak ay parang kabayong haling, na kapag sinakyan ninuman ay humahalinghing. Ang Pagkakaiba-iba ng mga Bagay

⁷Bakit may araw na itinuturing na higit kaysa iba, gayong iisa namang araw ang sumisikat sa buong isang taon?

⁸Sapagkat may mga araw na itinangi ang Panginoon, nang itatag niya ang mga panahon at mga kapistahan.

⁹May araw siyang pinagpala at pinabanal, at mayroon namang itinuring na pangkaraniwan.

¹⁰Lahat ng tao ay mula sa alabok; sa alabok hinugis si Adan.

¹¹Ngunit sa di malirip na karunungan ng Panginoon, wala siyang ginawa na magkatulad; binigyan niya ang bawat isa ng kanyang tanging kalagayan.

¹²Mayroon siyang pinagpala at pinadakila, mayroon siyang hinirang at itinalagang maglingkod sa kanya; at mayroon namang sinumpa, pinahiya, at pinalayas sa kanilang kinalalagyan.

¹³Ang putik ay hinuhugisan ng magpapalayok ayon sa kanyang maibigan. Gayundin naman, ang tao ay binibigyan ng Diyos ng kani-kaniyang kalagayan, ayon sa kanyang minamarapat.

¹⁴Ang katapat ng masama ay ang mabuti, ang katapat ng kamatayan ay ang buhay, at ang katapat ng makasalanan ay ang taong maka-Diyos.

¹⁵Ganyan nagmula sa kamay ng Lumikha ang lahat ng bagay: magkakatambal, ang isang bagay ay kabaligtaran ng ikalawa.

¹⁶Ako ang kahuli-hulihang namitas ng ubas, wari'y namulot lamang ako pagkaraan ng mamimitas. Ngunit sa awa ng Panginoon, marami pa rin akong nakuha, [83] at napuno ko pa rin ang aking mga pisaan, gaya ng mga naunang namitas.

¹⁷Alalahanin ninyong ito'y hindi ko ginawa para sa aking sarili lamang, kundi alang-alang sa lahat ng naghahangad matuto ng mabuting aral.

¹⁸Kaya makinig kayo, mga pinuno ng bayan, kayo, mga namamahala sa kapulungan, pag-isipan ninyo ito. Manatiling Malaya

¹⁹Habang ikaw ay nabubuhay pa dito sa daigdig, huwag mong ipagkatiwala ang buhay mo kaninuman, maging sa asawa, anak, o kaibigan. At huwag mo ring ipamigay na lahat ang iyong ari-arian. Baka ka magsisi at mapilitang magmakaawa sa ari-ariang iyong ibinigay.

²⁰Habang ikaw ay may hininga, huwag mong ipailalim ang buhay mo sa iba.

²¹Mas mabuti na ang mga anak mo ang humingi sa iyo, kaysa ikaw ang magmakaawa sa kanila.

²²Magsikap ka sa lahat mong kabuhayan, at huwag mong dudungisan ang iyong karangalan.

²³At sa wakas ng iyong buhay, kapag ika'y naghihingalo na, saka mo ipamana ang lahat mong ari-arian. Tungkol sa mga Alipin

²⁴Ang asno'y dapat bigyan ng kumpay, karga, at latigo; ang alipin nama'y dapat bigyan ng pagkain, disiplina at trabaho.

²⁵Pagawain mo nang husto ang iyong alipin upang matahimik ang loob mo; kapag siya'y walang gawain, malamang na makaisip ng paglaya.

²⁶Singkaw at pamatok ang pampasuko sa toro; parusa ng berdugo ang pansupil sa masamang alipin.

²⁷Pamalagiin mo siyang abala sa gawain; sapagkat ang walang ginagawa ay nakakaisip ng masama.

²⁸Pagtrabahuhin mo siya, doon siya nakatalaga, at kung hindi sumunod, tanikalaan mo siya.

²⁹Ngunit huwag kang magmamalabis kaninuman, at huwag gagawa ng anumang labag sa katarungan.

³⁰Kung mayroon kang alipin, mahalin mo siyang gaya ng iyong sarili, sapagkat pinaghirapan mo ang salaping ibinili sa kanya.

³¹Ituring mo siyang parang kapatid, sapagkat kailangan mo siya gaya ng iyong sarili. Kung maging malupit ka sa kanya at siya'y lumayas, saang panig ng daigdig mo siya hahanapin?