Read Magandang Balita Biblia, 2005 Ecclesiastico 34 Bible Online

Ecclesiastico 34 - Magandang Balita Biblia, 2005 bible

Ecclesiastico 34

¹Tungkol sa Panaginip Mandaraya at walang ibubunga ang pag-asa ng hangal, labis siyang nagtitiwala sa mga pangarap.

²Parang nanghuhuli ng anino, o humahabol sa hangin, ang taong nag-aabala [84] sa panaginip.

³Ang nakikita mo sa panaginip ay anino lamang ng katotohanan, gaya ng mukhang nakikita sa salamin.

⁴Kung hindi maaaring ang karumiha'y magbunga ng kalinisan, lalong hindi maaaring ang kasinungalinga'y magbunga ng katotohanan.

⁵Ang mga hula, pangitain at mga panaginip ay kahangalan. Sapagkat kung ano ang inaasam-asam ng isang tao ay siya namang inilalarawan ng kanyang guni-guni. [85]

⁶Hindi dapat pahalagahan ninuman ang panaginip, liban na lamang kung iyon ay talagang pangitaing mula sa Kataas-taasang Diyos.

⁷Marami na ang nalinlang ng mga panaginip, at ang mga umasa dito ay napahamak.

⁸Hindi kailangan ang mga ito sa pagtupad ng Kautusan, sapat na ang Karunungang itinuturo ng mga tapat. Bunga ng Karanasan at Paglalakbay

⁹Maraming nalalaman ang taong nakapaglakbay, [86] at makahulugan ang sinasabi ng isang may malawak na karanasan.

¹⁰Ang di pa nakaranas na maglakbay ay walang gaanong nalalaman, ngunit ang nakapaglakbay sa maraming lupain ay nakababatid ng maraming bagay.

¹¹Marami akong nakita sa aking mga paglalakbay, at ang mga natutuhan ko roon ay di ko kayang isalaysay.

¹²Malimit akong nabingit sa kamatayan, ngunit nakaligtas ako dahil sa aking mga karanasan. Kanino Dapat Umasa

¹³Matibay ang pag-asa ng mga may paggalang sa Panginoon, sapagkat ang pinananaligan nila'y may kapangyarihang magligtas sa kanila.

¹⁴Ang may paggalang sa Panginoon ay walang kinatatakutan, hindi siya magiging duwag sapagkat nananalig siya sa Panginoon.

¹⁵Mapapalad ang mga taong may paggalang sa Panginoon sapagkat alam nila kung kanino hihingi ng tulong.

¹⁶Ang paningin ng Panginoon ay nakatuon sa mga umiibig sa kanya, siya'y matibay na sanggalang at alalay. Siya ang umaalalay sa kanila nang di sila matisod o kaya'y bumagsak.

¹⁷Siya ang nagpapasigla sa kanilang kalooban, nagpapaningning sa kanilang mga mata, nagbibigay ng ganap na kalusugan, siya ang batis ng buhay at lahat ng pagpapala. Mga Handog na Di Marapat

¹⁸Isang paglait sa Diyos ang pag-aalay ng handog kung ito ay kinuha sa masamang paraan. Ang handog ng makasalanan ay di karapat-dapat.

¹⁹Hindi kinalulugdan ng kataas-taasan ang alay ng makasalanan, at ang pagpapatawad niya'y hindi nakukuha sa dami ng handog.

²⁰Ang paghahandog sa Diyos ng ninakaw sa isang mahirap, ay parang pagpatay sa isang anak sa harap ng kanyang ama.

²¹Sa isang maralita ang kaunting pagkain ay pantawid-buhay, ang magkait nito'y maituturing na isang pagpatay.

²²Kapag inalisan mo ng hanapbuhay ang isang tao, o kaya'y dinaya mo ang sahod ng isang kasama, para mo na rin silang kinitlan ng buhay.

²³Kung ang ginagawa ng isa ay ginigiba naman ng iba, ano ang kanilang mapapala kundi pagpapakahirap.

²⁴Kung ang isa ay dumadalangin at ang ikalawa naman ay nagmumura, sino sa kanila ang diringgin ng Panginoon?

²⁵Maghugas man ang tao pagkatapos na humipo sa patay, kung pagkatapos ay hihipo muli, ano ang silbi ng kanyang paghuhugas?

²⁶Gayundin naman, mag-ayuno ka man dahil sa kasalanan, ngunit paulit-ulit namang magbabalik sa pagkakasala anong mapapala mo sa iyong pagpapakagutom? Paanong pakikinggan ang iyong panalangin?