Read Magandang Balita Biblia, 2005 Ecclesiastico 41 Bible Online

Ecclesiastico 41 - Magandang Balita Biblia, 2005 bible

Ecclesiastico 41

¹Tungkol sa Kamatayan O kamatayan, anong pait ng iyong alaala sa taong payapang nagpapasasa sa kanyang kayamanan. Sa taong walang alalahanin at masagana sa lahat ng bagay, sa taong malusog at maaari pang magpasasa sa masarap na pagkain.

²Ngunit anong laking kaaliwan ang idinulot mo sa iyong pagdating sa taong nagdaralita at tinakasan na ng lakas, sa taong iginupo na ng katandaan at mga alalahanin, sa taong hindi na makakita at wala nang pag-asa. [93]

³Huwag kang matakot sa hatol ng kamatayan, alalahanin mong saklaw nito ang lahat: ang mga nauna sa iyo at ang mga darating pa.

⁴Ito ang itinalaga ng Panginoon sa lahat ng may buhay, at sino kang tututol sa kalooban ng Kataas-taasang Diyos? Mabuhay ka man nang sampu, sandaan o sanlibong taon, hindi na iyan mahalaga sa daigdig ng mga patay. Ang Kapalaran ng Masasama

⁵Ang mga anak ng makasalanan ay lahing kasuklam-suklam, lahing walang isip, na nawiwiling makisalamuha sa mga makasalanan.

⁶Ang kanilang mana ay mauubos nang tuluyan, at ang kanilang mga inapo ay hahamakin magpakailanman.

⁷Sisisihin ng kanyang mga anak ang isang makasalanang ama, sapagkat nagdaranas sila ng kahihiyan nang dahil sa kanya.

⁸Kawawa kayo, mga hindi natatakot sa Diyos, kayong lahat na tumalikod sa Kautusan ng Kataas-taasang Diyos.

⁹Kung kayo'y magkaanak, mapapahamak sila at walang maiiwan sa inyo kundi kapighatian. Ipagdiwang ang inyong pagbagsak; at pagkamatay ninyo, kayo'y susumpain.

¹⁰Ang nanggaling sa lupa'y sa lupa rin magbabalik; gayundin naman, ang hindi kumikilala sa Diyos ay sa kapahamakan naman masasadlak.

¹¹Ang katawan ng tao ay pansamantala lamang, ngunit ang mabuting pangalan ay mananatili magpakailanman.

¹²Pangalagaan mong mabuti ang iyong pangalan, sapagkat iyan ang maiiwan mo kapag ikaw ay namatay; at ang halaga niya'y higit pa sa maraming kayamanan.

¹³Ang maginhawang buhay ay panandalian lamang, ngunit ang mabuting pangalan ay magpakailanman. Mga Dapat Ikahiya

¹⁴Mga anak, sundin ninyo ang aking aral at mananatili kayo sa kapayapaan. Ano ang papakinabangin ninyo sa kayamanang nakabaon o kaya'y sa karunungang nakatago?

¹⁵Mas mabuti pa ang nagkukubli ng kanyang kamangmangan kaysa nagtatago ng kanyang karunungan.

¹⁶Pahalagahan ninyo itong aking sasabihin mga bagay na may kinalaman sa pagkahiya; [94] may pagkahiyang hindi nararapat at may pagkahiya ring hindi napapanahon.

¹⁷Mahiya kang gumawa ng kahalayan sa harapan ng iyong ama't ina, o magsabi ng kasinungalingan sa harap ng may kapangyarihan.

¹⁸Mahiya kang lumabag sa batas sa harapan ng hukom o pinuno ng bayan, o ng kalapastanganan sa Diyos sa kapulungan ng buong bayan. Mahiya kang magtaksil sa kasama o kaibigan,

¹⁹o magnakaw kaya sa iyong mga kapitbahay. Ikahiya mo ang di pagtupad sa kasunduan o sa sinumpaan, [95] at ang magaspang na kilos sa harap ng pagkain. Ikahiya mo ang karamutan kapag ikaw ay hinihingan,

²⁰o ang pagkalimot bumati sa mga bumabati sa iyo. Ikahiya mo ang pagtitig sa isang mahalay na babae,

²¹at ang di mo paglingap sa isang kamag-anak. Ikahiya mo ang pagkuha sa kaparte ng ibang tao, o ang panliligaw sa asawa ng iba.

²²Ikahiya mo ang pagpatol sa iyong utusang babae, kaya't huwag kang lalapit kailanman sa higaan nito. Ikahiya mo ang panlalait sa iyong mga kaibigan, o ang panunumbat sa taong iyong tinulungan.

²³Ikahiya mo ang pagkakalat ng mga narinig mong usapan, o ang pagsisiwalat ng lihim na ipinagkatiwala sa iyo.

²⁴Sa gayon, magkakaroon ka ng wastong kahihiyan, at kalulugdan ka ng lahat ng tao.