Read Magandang Balita Biblia, 2005 Ecclesiastico 43 Bible Online

Ecclesiastico 43 - Magandang Balita Biblia, 2005 bible

Ecclesiastico 43

¹Ang Araw Kay inam pagmasdan nitong kalawakang walang bahid ulap, sadyang di maunawaan itong kalangitan sa ganda at dilag!

²Maningning na araw ay nagpapahayag sa kanyang paglitaw, na kahanga-hanga ang bawat nilikha ng Kataas-taasang Diyos.

³Sa matinding init na mula sa kanya'y walang makatagal, ang balat ng lupa'y kanyang tinitigang sa katanghalian.

⁴Ang apoy sa hurno upang paningasin ay dapat gatungan, ngunit itong araw ay tatlong ibayo ang init na taglay. [98] Sa kanyang pagsikat parang nag-aapoy ang kabundukan, maningning na sinag mula sa kanya ay nakakasilaw.

⁵Dakila itong Panginoong lumikha sa araw, sa kanyang utos, nilalandas ang patutunguhan. Ang Buwan

⁶Ang Panginoon din ang lumalang sa buwan, na siyang panukat sa pagkakahati-hati ng panahon.

⁷Pananda sa pagdiriwang ng mga kapistahan, tanglaw na lumiliit at lumalaki batay sa kapanahunan.

⁸Sa kanyang pag-urong at pagsulong binibilang ang mga buwan, kahanga-hanga ang walang patid niyang pagbabago. Patnubay ng di mabilang na mga tanglaw, na nagliliwanag sa rurok ng kalangitan. Ang mga Bituin

⁹Kariktan ng langit ang mga bituin, palamuting nagniningning doon sa kaitaasan.

¹⁰Sa isang salita ng Diyos, lumilitaw sila sa pisngi ng langit, at walang pagod na nagbabantay sa buong magdamag. Ang Bahaghari

¹¹Masdan ninyo ang bahaghari at purihin ang dito ay lumikha, kaakit-akit ang makulay niyang kagandahan.

¹²Arko na nakaguhit sa kalawakan ng langit, hinubog ng mga daliri ng Poong Maykapal. Ipinahahayag ng Kalikasan ang Kapangyarihan ng Diyos

¹³Sa utos ng Panginoon umuulan ng yelo at nagmamadali ang nag-aapoy na kidlat upang tupdin ang kanyang hatol.

¹⁴Kapag binuksan niya ang kanyang imbakan, naglalabasan ang mga ulap na parang mga ibon.

¹⁵Sa kanya ring utos, namumuo ang tubig na kipkip ng ulap, at nagiging mga butil ng yelo na bumabagsak sa lupa.

¹⁶Sa pagdating niya'y [99] nanginginig ang mga bundok at sa dagundong ng kanyang tinig nayayanig ang lupa.

¹⁷Kapag gusto niya'y agad umiihip ang hanging habagat, at humahagibis na dumarating ang buhawi at bagyo. Sa utos din niya'y dagling pumapatak ang yelo, tulad ng pagdapo ng mga ibon, at dumaragsa sa lupang parang makapal na balang.

¹⁸Nakakasilaw sa mata ang busilak niyang kaputian, at nakakapagtaka ang marahan niyang pagpatak.

¹⁹Pinatitigas niya ang hamog sa pamamagitan ng lamig at isinasabog sa lupa na parang pinong asin, at ito'y namumuo, tulad sa bulaklak na yelong kumikislap.

²⁰Kapag pinaihip niya ang malamig na hangin mula sa hilaga, nagiging matigas na yelo ang ibabaw ng tubig. Anupa't ang lahat ng mga ilog at lawa, wari'y natatakpan ng baluting kristal.

²¹Ang mga kabundukang sinalanta ng tag-araw, at ang mga halamanang nalanta sa init,

²²ay muli niyang pinananariwa pagpatak ng ulan; at ang init ay napapalitan ng hamog na nagbibigay-buhay.

²³Siya rin, sa kanyang karunungan, ang nagpatahimik sa kalaliman ng dagat, at nagpalitaw ng mga pulo sa gitna ng tubig.

²⁴Ang mga naglalakbay naman sa malawak na karagatan ang nagsasalaysay ng mga kagulat-gulat na panganib doon, tayo nama'y mamamangha sa pakikinig.

²⁵May nakikita sila roon na mga kamangha-manghang nilalang, naglalakihang hayop-dagat at lahat ng nilikhang naninirahan sa tubig.

²⁶Sa kapangyarihan niya, nagagawa niya ang bawat maibigan, at sa bisa ng kanyang salita ang lahat ay nagkakaisa.

²⁷Hindi natin matatapos baybayin ang lahat niyang ginawa, kaya't wala na tayong masasabi pa kundi: “Ang Panginoon ang kabuuan ng lahat ng bagay.”

²⁸Paano natin siya pupurihin nang sapat, yamang siya, ang Dakilang Diyos, ay higit sa lahat niyang nilalang?

²⁹Siya ang maningning at dakilang Panginoon, kahanga-hanga ang kanyang kapangyarihan.

³⁰Purihin ninyo siya nang buong makakaya, at ang lahat ng iyan ay kapos pa rin upang dakilain siya. Tipunin ninyo ang buo ninyong lakas at siya'y walang patid na papurihan, at ang lahat ay kapos pa rin sa kanyang kamahalan.

³¹Walang nakakita sa kanya upang siya'y mailarawan, walang makapagpaparangal sa kanya nang sapat.

³²Gaano ang nalalaman natin tungkol sa kanya? Higit na marami ang mga hiwagang di natin nalalaman.

³³Siya ang Panginoong may gawa sa lahat, siya ang nagkakaloob ng karunungan sa mga umiibig sa kanya.