Read Magandang Balita Biblia, 2005 Ecclesiastico 50 Bible Online

Ecclesiastico 50 - Magandang Balita Biblia, 2005 bible

Ecclesiastico 50

¹Si Simon, ang Anak ni Onias Si Simon, ang Pinakapunong Pari na nagpaayos ng Templo, at siya'y anak ni Onias,

²siya ang naglagay ng mga pundasyon ng dinobleng muog, ang mataas na muog sa paligid ng Templo; siya rin ang naglagay ng mga tanggulan sa bahay ng Diyos.

³Noon ding panahon niya hinukay ang tipunan ng tubig, na halos sinlaki ng Dagat na Tanso.

⁴Sinikap niyang iligtas ang bayan mula sa pagkawasak, kaya't pinatibay niya ang mga tanggulan ng lunsod laban sa pananalakay ng kaaway.

⁵Kay ganda niyang pagmasdan kapag siya'y naliligid ng mga tao, matapos lumabas sa Dakong Kabanal-banalan.

⁶Parang bituing nakadungaw sa siwang ng mga ulap, parang buwang kabilugan sa mga araw ng kapistahan.

⁷Katulad ay araw na sumisinag sa Templo ng Kataas-taasang Diyos at bahagharing nakabalantok sa harap ng maningning na ulap.

⁸Parang rosas na bagong bukadkad pagkapatak ng ulan, parang liryong tumubo sa tabi ng batisan. Parang talbos na bagong usbong sa simula ng tag-araw, Parang insensong sinusunog sa oras ng pag-aalay.

⁹Tulad niya'y isang saro na yari sa gintong lantay at napapalamutian ng mamahaling batong hiyas.

¹⁰Parang puno ng olibo na hitik sa bunga, parang sipres na mataas na ang dulo'y abot sa ulap.

¹¹Kapag suot niya ang magara niyang damit, at nabibihisan ng maringal niyang kasuotan, pag-akyat niya sa mahal na dambana, nakadaragdag siya sa karilagan ng banal na lugar.

¹²Kapag iniaabot sa kanya ang pinagbaha-bahaging handog, samantalang nakatayo siya sa tabi ng dambana, at naliligid ng kanyang mga kapwa pari, ang kawangis niya'y mayabong na sedar sa Lebanon na naliligid ng mga punong palma.

¹³Ang mga anak ni Aaron ay nakapaligid sa kanya, suot ang mga sagradong kasuotan, hawak ang mga handog, at nakatayo sa harapan ng buong bayang Israel.

¹⁴Kapag natapos niya ang pag-aalay sa dambana at naiayos na ang mga handog sa Makapangyarihang Kataas-taasang Diyos,

¹⁵hinahawakan ang saro ng alak, at ibinubuhos ito sa paanan ng dambana, bilang mabangong handog sa Kataas-taasang Diyos, sa Hari ng buong sanlibutan.

¹⁶Nagsisigawan naman ang mga pari, at hinihipan ang kanilang mga trumpetang pilak; lumilikha sila ng malakas na ingay, upang marinig sila ng Kataas-taasang Diyos.

¹⁷Pagdaka'y nagpapatirapa ang buong bayan bilang pagsamba sa Panginoon, sa Makapangyarihan sa lahat, sa Kataas-taasang Diyos.

¹⁸Nagkakantahan naman ang mga mang-aawit; ang masayang tinig ng papuri sa Diyos ay umaalingawngaw.

¹⁹Samantala, ang bayan ay nananalangin sa Kataas-taasang Diyos, nagmamakaawa sa harapan ng mahabaging Diyos, hanggang sa matapos ang pagsamba sa Panginoon, at maganap ang pag-aalay ng mga handog.

²⁰Pagkatapos, nananaog si Simon mula sa dambana at itinataas ang mga kamay sa karamihan ng tao, upang igawad sa kanila ang pagpapala ng Panginoon.

²¹Muling yumuyuko ang buong bayan upang tanggapin ang pagpapala ng Kataas-taasang Diyos. Isang Bendisyon

²²At ngayon, purihin natin ang Panginoon, ang Diyos ng Israel, kahanga-hanga ang kanyang mga gawa sa balat ng lupa. Siya ang nagtataguyod [113] sa atin mula pa sa tiyan ng ating ina at kumakalinga sa atin nang may pagkahabag.

²³Pagkalooban nawa niya tayo ng kagalakan sa puso at paghariin ang kapayapaan sa Israel sa habang panahon.

²⁴Manatili nawa sa atin ang kanyang habag, at lagi tayong iligtas sa panahon ng kagipitan. Ang Tatlong Bansang Kinamumuhian

²⁵May dalawang bansa na labis kong kinamumuhian, at ang pangatlo'y hindi man lamang dapat ituring na isang bansa—

²⁶Ang mga Edomita [114] at ang mga Filisteo, at ang mga hangal na Samaritano. Ang Karunungan ni Jesus na Anak ni Sirac

²⁷Ako, si Jesus na anak ni Sirac Eleazar [115] ang sumulat ng aklat na ito, ng mga aral at mga salawikain, ayon sa aking matapat na pagkaunawa.

²⁸Mapalad ang tao na nag-uukol ng panahon sa pagbubulay-bulay nito at tumutuklas ng karunungan sa ganitong pag-aaral.

²⁹Kung susundin niya ang mga ito, mahaharap niya ang anumang suliranin, sapagkat ang liwanag ng Panginoon ang papatnubay sa kanya.