Read Magandang Balita Biblia, 2005 Ecclesiastico 9 Bible Online

Ecclesiastico 9 - Magandang Balita Biblia, 2005 bible

Ecclesiastico 9

¹Ang mga Babae Huwag kang magseselos sa asawa mong pinakamamahal; lalo mo lamang siyang tuturuan kung paano ka niya pasasakitan.

²Huwag kang pailalim sa kapangyarihan ng sinumang babae hanggang sa ikaw ay lubusang alipinin niya.

³Huwag kang makikipagtagpo sa asawa ng iba, [24] baka ka masilo sa mga bitag niya.

⁴Huwag kang magbabad sa piling ng mga babaing mang-aaliw at baka mahulog ka sa kanilang mga patibong.

⁵Huwag kang tingin nang tingin sa isang dalaga, baka ka magkamali at mapagmulta nang dahil sa kanya.

⁶Huwag kang magpakahibang sa mga babaing bayaran, kung hindi mo ibig maubos ang iyong kabuhayan.

⁷Huwag kang magpalinga-linga sa mga lansangan ng lunsod, o magpagala-gala sa mga sulok na walang tao.

⁸Huwag kang titingin sa babaing kaakit-akit, at huwag mong titigan ang ganda ng di mo asawa. Marami na ang napahamak dahil sa kagandahan ng babae, siya ang nagiging dahilan ng matinding pagnanasa.

⁹Huwag kang kakaing kasalo ng asawa ng iba, at huwag ka ring makikipag-inuman sa kanya. Baka ka mabighani ng kanyang alindog, at dahil sa pagnanasa ika'y mapahamak. Ang Pakikipagkaibigan

¹⁰Huwag mong iiwan ang matagal nang kaibigan; karaniwan, ang bago ay di maipapantay sa kanya. Ang pakikipagkaibigan ay parang alak; habang tumatagal lalong sumasarap.

¹¹Huwag kang maiinggit sa tagumpay ng makasalanan, sapagkat hindi mo alam ang tunay niyang kahihinatnan.

¹²Huwag kang matuwa sa kinawiwilihan ng masasamang tao, alalahanin mo na di sila makakaligtas sa parusa habang buhay.

¹³Lumayo ka sa taong maaaring pumatay sa iyo, at di ka mangangamba na mapapatay ka niya. Ngunit kung kailangang lumapit ka sa kanya, pag-ingatan mo ang bawat hakbang mo't baka patayin ka nga niya. Isipin mong ikaw ay parang tumutuntong sa patibong, o naglalakad sa ibabaw ng muog ng lunsod sa panahon ng labanan.

¹⁴Hangga't maaari, sikapin mong makilala ang iyong mga kapwa, at sa marunong ka lamang sumangguni.

¹⁵Mawili kang makitungo sa mga taong matalino, at ang pag-usapan ninyo'y ang Kautusan ng Kataas-taasang Diyos.

¹⁶Ang mga matuwid ang siya mong maging kasalo sa pagkain, at ang iyong paggalang sa Diyos ang siya mong ipagmalaki. Tungkol sa mga Punong-bayan

¹⁷Ang galing ng panday ay nakikita sa kanyang ginawa; ang kakayahan ng isang namumuno ay nakikilala sa kanyang matalinong pangungusap.

¹⁸Ang tsismoso ay kinatatakutan sa buong lunsod; ang taong walang pigil ang dila ay kinapopootan ng lahat.