Read Magandang Balita Biblia, 2005 Levitico 11 Bible Online

Levitico 11 - Magandang Balita Biblia, 2005 bible

Levitico 11

¹Sinabi ni Yahweh kina Moises at Aaron,

²“Ganito ang sabihin ninyo sa bayang Israel: Sa mga hayop na lumalakad sa lupa, makakain ninyo

³ang lahat ng hayop na biyak ang kuko at ngumunguya ng pagkaing mula sa sikmura.

⁴Kaya ang kamelyo kahit na ngumunguya ito ngunit hindi biyak ang kuko ay di dapat kainin.

⁵Ang dagang gubat ay ngumunguya rin ng pagkaing mula sa sikmura ngunit hindi biyak ang kuko; hindi ito malinis, kaya di dapat kainin.

⁶Ang kunehong gubat ay ngumunguya rin ng pagkaing galing sa sikmura ngunit hindi rin biyak ang kuko nito; hindi ito malinis.

⁷Ang baboy, biyak nga ang kuko, ngunit hindi naman ngumunguya ng pagkaing mula sa sikmura, kaya hindi ito dapat kainin.

⁸Huwag kayong kakain ng karne ni hihipo man ng bangkay ng mga hayop na ito; marurumi ito para sa inyo.

⁹“Sa mga nilikhang nasa tubig, maging alat o tabang, ang maaari lamang ninyong kainin ay ang mga isdang may palikpik at kaliskis.

¹⁰Ngunit ang isdang walang palikpik at kaliskis, malaki man o maliit, sa dagat o ilog ay marumi para sa inyo.

¹¹Huwag kayong kakain nito at iwasan ninyo ang mga patay nito.

¹²Lahat ng nilikha sa tubig na walang palikpik at kaliskis ay huwag ninyong kainin.

¹³“Tungkol naman sa mga ibon, ang mga ito ang huwag ninyong kakainin sapagkat marurumi: ang agila, ang buwitre at ang agilang-dagat;

¹⁴ang lawin at ang limbas at mga kauri nito;

¹⁵lahat ng uri ng uwak;

¹⁶ang ostrits, panggabing lawin, lawing dagat at mga kauri nito;

¹⁷lahat ng uri ng kuwago, ibong maninisid ng isda,

¹⁸ang kuwagong parang may sungay, at ang pelicano;

¹⁹ang lahat ng uri ng tagak, ang tariktik, paniki at kabag. [1]

²⁰“Lahat ng kulisap na may pakpak at may apat na paa ay marurumi para sa inyo,

²¹maliban sa mga kulisap na lumulundag,

²²tulad ng lahat ng balang na mahahaba ang ulo, balang na kulay berde at bawat balang sa ilang.

²³Ang lahat ng naglipanang lumilipad na may apat na paa ay ituturing ninyong marurumi.

²⁴“Ang sinumang humawak sa bangkay ng mga hayop na ito ay ituturing na marumi hanggang sa paglubog ng araw.

²⁵Ang sinumang dumampot sa mga ito ay ituturing na marumi hanggang sa paglubog ng araw at dapat niyang labhan ang kanyang damit.

²⁶Bawat hayop na biyak ang kuko ngunit hindi ngumunguya ng pagkaing mula sa sikmura ay marumi nga at ituturing na marumi rin ang bawat humawak rito.

²⁷Ituturing ninyong marumi ang mga hayop na may apat na paa, ngunit ang kuko'y hindi sumasayad sa lupa kapag lumalakad. Ang sinumang humawak sa bangkay nito ay ituturing na marumi hanggang sa paglubog ng araw.

²⁸Dapat labhan ang kasuotan ng sinumang humawak nito at siya ay ituturing ninyong marumi hanggang sa paglubog ng araw.

²⁹“Sa mga hayop na naglipana sa lupa, ituturing ninyong marumi ang mga sumusunod: ang bubuwit, ang daga, at lahat ng uri ng bayawak;

³⁰ang tuko, ang buwaya, ang butiki, ang bubuli at ang hunyango.

³¹Marurumi ang lahat ng ito at sinumang humawak sa alinmang patay nito ay ituturing na marumi hanggang sa paglubog ng araw.

³²Kung ang alinman sa mga ito ang mamatay at lumagpak sa damit, kagamitang kahoy, balat o anumang kagamitang pang-araw-araw, ituturing na marumi ang nilagpakan nito hanggang sa paglubog ng araw; kailangang ibabad sa tubig ang nasabing kagamitan.

³³Kung sa palayok ito mahulog, ituring ding marumi ang laman nito at dapat nang basagin ang palayok.

³⁴Anumang pagkaing may sabaw o inuming tubig na malagay dito ay ituturing na marumi.

³⁵Marumi nga ang anumang lagpakan ng ganitong uri ng patay na hayop. Kung mahulog sa kalan o palayok, dapat sirain ito; ituturing nang marumi iyon.

³⁶Ngunit ang batis o ipunan ng tubig na malagpakan nito ay mananatiling malinis; gayunman, ang humawak sa patay na hayop ay ituturing na marumi.

³⁷Kung ang patay na hayop ay lumagpak sa binhing pananim, ito'y mananatiling malinis,

³⁸ngunit kung ang binhi ay babad na sa tubig, magiging marumi na ito.

³⁹“Kung mamatay ang anumang hayop na maaaring kainin, ang sinumang humawak rito ay ituturing na marumi hanggang sa paglubog ng araw.

⁴⁰Dapat labhan ang kasuotan ng sinumang kumain o bumuhat nito, at siya'y ituturing na marumi hanggang sa paglubog ng araw.

⁴¹“Lahat ng maliliit na hayop na gumagapang sa lupa ay huwag ninyong kakainin sapagkat ito'y marurumi,

⁴²maging ito'y gumagapang sa lupa o naglalakad na may apat na paa o higit pa.

⁴³Huwag ninyong dudumhan ang inyong sarili sa pamamagitan ng pagkain ng alinman sa maruruming hayop na ito.

⁴⁴Panatilihin ninyong malinis ang inyong sarili, sapagkat akong si Yahweh na inyong Diyos ay banal.

⁴⁵Ako ang naglabas sa inyo sa Egipto upang maging Diyos ninyo. Dapat kayong maging banal sapagkat ako'y banal.”

⁴⁶Ito ang mga tuntunin tungkol sa mga hayop, sa mga ibon at sa mga nilikha sa tubig,

⁴⁷para malaman ninyo ang malinis o hindi, ang makakain at hindi makakain.