Read Magandang Balita Biblia, 2005 1 Timoteo 3 Bible Online

1 Timoteo 3 - Magandang Balita Biblia, 2005 bible

1 Timoteo 3

¹Totoo ang pahayag na ito: Ang sinumang nagnanais na maging tagapangasiwa [1] sa iglesya ay naghahangad ng mabuting gawain.

²Kaya nga, ang isang tagapangasiwa ay kailangang walang kapintasan; isa lamang ang asawa, [2] marunong magpigil sa sarili, maingat, kagalang-galang, bukás ang tahanan sa iba, at may kakayahang magturo.

³Hindi siya lasenggo, hindi marahas, kundi mahinahon; hindi mahilig makipag-away at hindi maibigin sa salapi.

⁴Dapat mahusay siyang mamahala sa sariling pamilya, iginagalang at sinusunod ng kanyang mga anak.

⁵Sapagkat paano siyang makakapangasiwa nang maayos sa iglesya ng Diyos kung hindi niya maiayos ang sarili niyang pamilya?

⁶Kailangang siya'y matagal nang mananampalataya; sapagkat kung hindi, baka siya'y maging palalo at mapahamak na gaya ng diyablo.

⁷Bukod dito, kailangang siya'y may mabuting patotoo sa paningin ng mga hindi sumasampalataya upang di siya mapintasan at hindi mahulog sa bitag ng diyablo.

⁸Ang mga tagapaglingkod [3] naman ay dapat ding maging kagalang-galang, tapat mangusap, hindi lasenggo at hindi sakim sa salapi.

⁹Kailangang sila'y tapat sa pananampalataya na ating ipinapahayag, at may malinis na budhi.

¹⁰Kailangang subukin muna sila, at kung mapatunayang sila'y karapat-dapat, saka sila gawing mga tagapaglingkod.

¹¹Gayundin naman, ang mga babaing tagapaglingkod [4] ay dapat maging kagalang-galang, hindi tsismosa, mapagtimpi at matapat sa lahat ng mga bagay.

¹²Ang mga tagapaglingkod sa iglesya ay dapat isa lamang ang asawa [5] at maayos mangasiwa sa kanilang mga anak at sambahayan.

¹³Ang mga tagapaglingkod na tapat sa tungkulin ay iginagalang ng mga tao at buong tiwalang makapagpapahayag tungkol sa pananampalataya kay Cristo Jesus.

¹⁴Umaasa akong magkikita tayo sa lalong madaling panahon, ngunit isinulat ko ang mga ito

¹⁵upang kung hindi man ako makarating agad ay malaman mo kung ano ang dapat na maging ugali ng mga taong kabilang sa sambahayan ng Diyos na buháy, sa iglesya na haligi at saligan ng katotohanan.

¹⁶Hindi maikakaila na napakadakila ng hiwaga ng ating relihiyon: Siya'y [6] nahayag nang maging tao, pinatunayang matuwid ng Espiritu, [7] at nakita ng mga anghel. Ipinangaral sa mga Hentil, pinaniwalaan ng lahat, at itinaas sa kalangitan.