Read Makassar Version – KITTA' MATANGKASA PA'JARIANG 1 Bible Online

PA'JARIANG 1 - Makassar Version – KITTA' MATANGKASA bible

PA'JARIANG 1

¹Uru-uruna, ri wattu Napa'jarina Allata'ala sikontu apa-apaya,

²tenapa panrala'na buttaya, siagang tenapa apa-apa silolongang. Sikontu apa-apaya nitongkoki ri tamparang luara' siagang lompoa bombanna, naniaki sassang makkapuka. Mingka niaki koasa malompoNa Allata'ala a'gio' irate ri tompo'na je'neka.

³ Nakanamo Allata'ala, “A'jariko singaraka!” Nampa nia'mo singaraka.

⁴Sannammi nyawaNa Allata'ala anciniki anjo passalaka. Na Nasa'la'mo singaraka battu ri sassanga,

⁵nampa Naareng anjo singaraka “Singara'” na anjo sassanga “Bangngi”. Allalomi bangngia, battumi bari'basaka. Iaminjo allo makase'rea.

⁶ Nampa Nakanamo Allata'ala, “A'jariko se're pannahang untu' ansa'laki anjo je'neka a'jari ruang pammantangang, siagang nanatahang lalang ri tampa' tassa'laka.” Nakajariammo anjo passalaka. Kammaminjo Napare'na Allata'ala pannahang ampasisa'lakai je'ne' niaka irawanganna anjo pannahanga siagang niaka irateanganna.

⁸Naaremmi anjo pannahanga “Langi'”. Allalomi bangngia nabattumo bari'basaka. Iaminjo allo makaruaya.

⁹Nampa Nakana Allata'ala, “Kuerokangi na'lo'loro' je'ne' niaka irawanganna langika mange ri se'reang tampa', sollanna kacinikang buttaya.” Nakajariammo anjo passalaka.

¹⁰Naaremmi Allata'ala anjo buttaya “Bonto”, naanjo je'ne' asse'rea “Tamparang”. Nasannammo nyawaNa Allata'ala anciniki anjo passalaka.

¹¹Nakanamo pole Allata'ala, “Kuerokangi anjo buttaya appatimboi sangka' rupa poko'-poko', iamintu appa'niaka wassele' rappo-rappoang a'lisereka siagang rappo-rappoang maraengannaya.” Kajariammi anjo passalaka.

¹²Kammaminjo nappatimbomo buttaya sangka' rupa poko'-poko'. Nasannammo nyawaNa Allata'ala anciniki anjo passalaka.

¹³Allalomi bangngia nabattumo bari'basaka. Iaminjo allo makatallua.

¹⁴Nampa Nakana Allata'ala, “Kuerokangi nia' apa-apa singara' ri langika untu' ansingari buttaya, untu' ampasisa'laki singaraka siagang bangngia, siagang untu' ampa'nassai wattu pakaramulana alloa, taunga, siagang allo lompona agamaya.” Nakajariammo anjo passalaka.

¹⁶Kammaminjo Napa'jarina Allata'ala ruaya apa assarea singara' lompo, iamintu mataallo untu' koasa ri singaraka, siagang bulang untu' koasa ri bangngia; pantaranganna anjo Napare' tommi sikamma bintoenga.

¹⁷Naboli'mi Allata'ala anjo barang-barang singaraka ri langi' untu' ansingari buttaya,

¹⁸untu' koasa ri singaraka siagang ri bangngia, siagang untu' ansa'laki singaraka battu ri sassanga. Na sannammo nyawaNa Allata'ala anciniki anjo passalaka.

¹⁹Allalomi bangngia nabattumo bari'basaka. Iaminjo allo makaappaka.

²⁰Nampa Nakana Allata'ala, “Kuerokangi nia' apa-apa attallasa' a'lange-lange lalang ri je'neka, siagang jai jangang-jangang anri'ba' rate ri allaka.”

²¹Na Napa'jarimo Allata'ala olo'-olo' lompoa lalang ri tamparanga siagang sikamma apa-apa attallasaka ilalang je'ne', kammayatompa sangka' rupaya jangang-jangang. Nasannammo nyawaNa Allata'ala anciniki anjo passalaka.

²²Yangasenna anjo sikammaya Nabarakkakimi Allata'ala. Siagang Nasaremi parenta sikamma olo'-olo' attallasaka lalang je'ne' sollanna a'bija-bija siagang napirassi tamparanga, kammayatompa jangang-janganga sollanna pila' katambang.

²³Allalomi bangngia nabattumo bari'basaka. Iaminjo allo makalimaya.

²⁴Nampa Nakana Allata'ala, “Kuerokangi nia' ri buttaya sangka' rupa olo'-olo' ri bontoa, ia annabaya siagang liaraka, ia lompoa siagang ca'dia.” Nakajariammo anjo passalaka.

²⁵Kammaminjo Napare'na Allata'ala sikontu anjo apa-apa niaka siagang sannammi nyawaNa ancini' ngasengi anjo passalaka.

²⁶ Nampa Nakana Allata'ala, “Kamma-kamma anne lapparekKi' tau lasanrapanga iKatte siagang lasantanjaka iKatte. Lakoasai ke'nanga mae ri sikamma juku'-jukuka, jangang-janganga, siagang sikontu olo'-olo' maraengannaya, kammaya olo'-olo' annabaya siagang liaraka, kammaya lompoa siagang ca'dia.”

²⁷ Kammaminjo bateNa Allata'ala ampa'jari rupataua, na Napa'jari ke'nanga sanrapang KalenNa. Napa'jarimi ke'nanga bura'ne siagang baine.

²⁸Nampa Nabarakkaki ke'nanga angkana, “Ammana'-mana' mako siagang accucu-cucu mako nu'jari jai, sollanna napammantangngi sossorannu sikontu buttaya siagang nanakoasai. Kusareko tugasa' untu' amparakai sikamma juku'-jukuka, jangang-janganga, siagang sikontu olo'-olo' maraenganga ia liaraka.

²⁹Kusareangko sikontu poko'-poko' kayu a'lisereka rapponna siagang rappo-rappoang maraenganga untu' a'jari kanrenu.

³⁰Mingka sikontu jangang-janganga siagang olo'-olo' liara' maraengannaya, Kusareangi ruku' siagang lamungang leko'-lekoka a'jari kanrena.” Nakajariammo anjo passalaka.

³¹Naciniki ngasemmi Allata'ala sikontu anjo apa le'baka Napa'jari, siagang sannang sikalimi nyawaNa. Allalomi bangngia siagang battumi bari'basaka. Iaminjo allo makaannanga.