Read Makassar Version – KITTA' MATANGKASA PA'JARIANG 12 Bible Online

PA'JARIANG 12 - Makassar Version – KITTA' MATANGKASA bible

PA'JARIANG 12

¹ Nakanamo Batara ri Abram, “Bokoi pa'rasangannu, sikontu bija-bijannu siagang balla'na manggenu, nunampa a'lampa mange ri se'reang pa'rasangang laKupappicinikanga mae ri kau.

²LaKusareko bija majai, siagang laKupa'jari ke'nanga bansa lompo ri lino. LaKubarakkakiko siagang laKupa'jari masahoroki arennu, sa'gennu la'jari barakka'.

³ LaKubarakkaki sikamma tau ambarakkakiako siagang laKutunrai sikamma tau antunrayako. Siagang lanri ri kau nalaKubarakkaki sikontu bansaya ri lino.”

⁴Umuru'na Abram 75 taung ri wattunna nabokoi Haran, situru' parentaNa Batara mae ri ia. A'lampami Abram mange ri butta Kanaan siagang bainenna iamintu Sarai, kammayatompa Lot kamanakanna, sikamma atanna. Naerang ngaseng tommi sikamma pa'barang-barangang nagappaya ri Haran. Battuna ke'nanga mange ri Kanaan,

⁶najappaimi Abram sikontu anjo pa'rasanganga sa'genna battu ri poko' kayu karama' ri More, iamintu tampa' panynyombanga ri Sikhem. (Anjo wattua nia' iji tu Kanaan ammantang ri anjo pa'rasanganga.)

⁷ Napappicinikammi KalenNa Batara mae ri Abram na Nakana ri ia, “Iaminne pa'rasangang laKupassareanga mae ri sossorannu.” Nampa ambangummo Abram se're tampa' pakkoro'bangngang anjoreng untu' Batara, ia le'baka ampappicinikangi KalenNa mae ri ia.

⁸Le'baki anjo napatulusu'mi jappana a'lampa timboro', ri daera a'bontoa irayanganna kota Betel nampa akkema ri alla'na kota Betel siagang kota Ai. Betel ilaukang siagang Ai irayangngang. Ambangung tommi anjoreng tampa' pakkoro'bangngang nampa anynyomba ri Batara.

⁹Nampa napatulusu' pole jappana battu ri anjo tampaka mange ri tampa' maraengannaya, ri bageang timboranna butta Kanaan.

¹⁰Mingka anjo wattua naallei kacipurang lompo taua ri butta Kanaan. Sa'genna pila' bellami jappana Abram a'lampa timboro', mange ri butta Mesir, nampa ammantang anjoreng sa'genna allalo anjo bala kacipurang lompoa.

¹¹Ri wattu ero'na allalo ri pa'baeng-baenga naero' antama' ri pa'rasangang Mesir, nakanamo ri bainenna, “Kau ga'ga sikaliko.

¹²Punna nacinikko tu Mesirka, lanakapangi ke'nanga angkanaya ikau bainengkuko. Mattantu nabunoa' nampa natallassiko kau.

¹³ Jari bajikangngang paumi angkanaya ikau andikkuko, sollanna natallassia' siagang a'gau' baji' ke'nanga mae ri nakke passabakkang ikau.”

¹⁴Na kamma tojenna, ri wattunna nalalomo Abram pa'baeng-baenga siagang battu mange ri butta Mesir, nacini'mi tu Mesir anjo Sarai ga'ga sikali.

¹⁵Nia'mo siapa are pagawena balla' karaenga anciniki nampa napauang karaenga antekamma ga'gana anjo bainea. Jari nierammi mange ri balla' karaenga.

¹⁶Na lanri anjo Sarai, niada' baji'-baji'mi Abram ri karaenga siagang nisaremi siapa are ata, kammayatompa siapa are jaina gimbala' siagang bembe, sapi, keledai siagang unta.

¹⁷Mingka lanri niallena Sarai ri karaenga, Napabattumi Batara garring-garring appakamalla' dudua na natuju karaenga siagang sikamma tau niaka lalang ri balla' kakaraenganga.

¹⁸Jari nakio'mi karaenga Abram nampa nakuta'nang angkana, “Apa anne nugaukang mae ri nakke? Angngapa natena nupauanga' angkanaya bainennu anjo?

¹⁹Angngapa nanupau angkana andi'nu nampa nulappassanga' angngallei a'jari bainengku? Anne bainennu; allei siagang a'lampako!”

²⁰Naparentakammi karaenga mae ri siapa are pagawena, nampa naerang assulu' ke'nanga anjo Abram battu ri anjo pa'rasanganga siagang bainenna kammayatompa sikamma barang-baranna.