Read Makassar Version – KITTA' MATANGKASA PA'JARIANG 19 Bible Online

PA'JARIANG 19 - Makassar Version – KITTA' MATANGKASA bible

PA'JARIANG 19

¹Le'ba'na nitoana ri Abraham, a'lampami anjo ruaya malaeka' mange ri kota Sodom. Bangngimi nampa battu ke'nanga mange anjoreng. Sitabangi ammempo Lot ri pakke'bu' lompona kotaya anjo wattua. Nacini'na ke'nanga, ammentemmi Lot mange anruppai ke'nanga. Su'ju'mi Lot ri dallekanna ke'nanga,

²nampa nakana, “O Karaeng-karaeng, maeki' assengka ri ballakku. Akkullei kibissai bangkenta nampa a'bangngiki' ri ballakku. Punna erokki', akkulleki' ambangung bari'basa' nampa kipannarrusu' jappata.” Mingka appialimi ke'nanga angkana, “Tarima kasi, boli'mi kamma ikambe anrinni a'bangngi ri paranna kotaya.”

³Mingka napala' dudumi Lot, na kale'bakkanna antama'mi ke'nanga siagang ia ri balla'na. Appasadiami Lot kanre-kanreang nyamang, siagang attunumi roti siganna'na, nampa angnganremo ke'nanga.

⁴Mingka ri tenanapa na'lampa anjo sikamma toanaya attinro, battumi tu Sodom allipungi anjo ballaka. Sikontu tu bura'nea ri anjo kotaya, baji'na tau toa yareka tau rungka, nia' ngasengi battu.

⁵ Akkio'mi ke'nanga ri Lot siagang akkuta'nang angkana, “Kemae anjo sikamma tau battua a'bangngi ri balla'nu? Passareangi anjo ke'nanga mae ri kambe, sollanna akkulle ikambe assikatinroang siagang ke'nanga!”

⁶Assulu'mi Lot battu ri balla'na. Le'ba'na natongko' pakke'bu'na

⁷nakanamo ri sikamma tu Sodom, “Sikamma sari'battangku, kupala' tojeng-tojengi ri katte ngaseng, tea' laloki a'gau' kammai anjo ja'dala'na!

⁸Kipilangngeria'. Nia' rua ana' tulolongku. Boli'mi kamma nakupassareang ke'nanga mae ri katte ngaseng, naapa-apa mamo kigaukang mae ri ke'nanga. Mingka tea' laloki' apa-apai anne toanangku; nasaba' siratanga' angkatutui ke'nanga.”

⁹Mingka nakanamo anjo tu Sodom ri Lot, “A'lampako! Angngapa naikau tubattu-battu kammaya antu ero' langngatoroki ikambe? A'lampako! Punna tena, ikau laniajara' la'bi battallangngang naanjo tau ruaya.” Nampa nasorongammo ke'nanga Lot, nampa maju ke'nanga ero' anrumbangi pakke'bu' balla'na.

¹⁰Mingka nibeso'mi Lot ri anjo ruaya toana antama' ri balla', nampa natongko' pakke'bu'na ballaka.

¹¹ Napa'jari buta ngasemmi anjo tau niaka ri pantaranganna anjo ballaka, sa'genna takkulleamo ke'nanga ambuntuluki pakke'bu'na anjo ballaka.

¹²Nakanamo anjo ruaya toana mae ri Lot, “Punna nia' ana'-ana' bura'nenu, ana'-ana' bainenu, mintunnu yareka sari'battannu maraengannaya ammantang lalang ri anne kotaya, erang ngasengi ke'nanga assulu' battu anrinni,

¹³nasaba' anne kotaya lanipanraki ri kambe. Nalangngere'mi Batara sikamma tuduhang battalaka mae ri sikamma tau ammantanga ri anne kotaya, na ikambemi anne nisuro battu untu' antumpasaki anne kota Sodom.”

¹⁴A'lampami Lot mange ri ruaya parekang mintunna nampa nakana ri ke'nanga, “Karo-karoko assulu' battu ri anne kotaya, nasaba' lanipanraki ri Batara.” Mingka nakapangi ke'nanga angkanaya a'bonga-bonganaji Lot.

¹⁵Ri wattunna subu, nipakkaro-karomi Lot ri anjo ruaya malaeka' sollanna a'lampa linta'. Nakana ke'nanga, “Akkaro-karo mako a'lampa siagang bainennu siagang anjo ruaya ana' tulolonnu, sollanna tena numate ngaseng todong punna nipanraki.”

¹⁶ Ranggaselami nyawana Lot. Mingka nikamaseammi ri Batara. Jari nirurungammi Lot siagang bainenna kammayatompa anjo ruaya ana'na ri anjo ruaya toananna assulukang battu ri anjo kotaya.

¹⁷Le'baki anjo nakanamo kalase'renna anjo malaekaka, “Lariko, pasalamaki nyawanu! Teako assailei mae ri boko siagang teako ammantangngi ri lapparaka. Lariko nai' ri monconga, sollanna tena numate ngaseng todong!”

¹⁸Mingka appialimi Lot angkana, “Edede, teaki' suroi ikambe lari nai' ri monconga Karaeng.

¹⁹Memang, sanna'mi bateta antulunga' siagang kipasalama'mi nyawaku Karaeng. Mingka anjo monconga teai sipato' bellana. Gassingka narapikanga' anjo balaya nakumatemo lalang tenanapa kunrapi' mange anjoreng.

²⁰Kiciniki anjo ri dallekang, nia' se're kota ca'di, tenaya siapa bellana. Kipa'biamma' lari mange anjoreng sollangku salama'.”

²¹Appialimi anjo malaekaka nakana, “Baji'mi, anjo kota ca'dia tenaja nalakutumpasaki.

²²Akkaro-karo mako lari! Nasaba' tena apa-apa lakugaukang lalang tenanapa nunrapi' mange anjoreng.” Lanri nakanana Lot ca'di anjo kotaya, iaminjo naniaremmo Zoar.[6]

²³Sitabangi ammumba alloa ri wattu anrapi'na Lot mange ri Zoar.

²⁴ Ti'ring appaturummi Batara bosi bara pepe' irateanna kota Sodom siagang Gomora.

²⁵Niancuru'mi anjo ruaya kota, kammayatompa sikontu lapparaka, sikontu lamung-lamunga siagang sikontu tau niaka ammantang anjoreng.

²⁶ Mingka assailemi bainenna Lot mae anjoreng, sa'genna amminramo a'jari benteng ce'la.

²⁷Ammukona bari'basa', a'lampami linta' Abraham mae ri tampa' le'baka napammentengi ri dallekanNa Batara ri siallo allaloa.

²⁸Accini'mi mae ri Sodom siagang Gomora kammayatompa ri sikontu lapparaka, nanacini'mo umbua nai' battu ri anjo tampaka, sangkamma umbu battu ri pappalluang sannaka lompona.

²⁹Kammaminjo kajarianna ri wattunna Napanraki Allata'ala anjo kota-kotaya, ri lappara' napammantangia Lot. Angngu'rangi Allata'ala ri Abraham, sa'genna natulummo Lot ampilari anjo tampaka.

³⁰Lanri malla'na Lot ammantang ri Zoar, a'lampami nai' ri pa'monconganga siagang anjo ruaya ana' tulolonna, nampa ammantang ke'nanga lalang ri se'reang kali'bong batu.

³¹Nakanamo anjo ana' baine toana ri andi'na, “Toami manggeta, nampa ri sikontu anne pa'rasanganga tena tu bura'ne lakkulle ambuntingiki' sollanta akkulle anggappa ana'.

³²Umba naniusahakangi nasa'ring manggeta, nampa mangeki' sikatinroang siagang ia, sollanta akkulle anggappa ana'.”

³³Anjo bangngia napainummi anggoro' manggena ke'nanga, nampa mange anjo ana' baine toaya assikatinroang siagang manggena; mingka lanri ta'liwa' nasa'rinna manggena ke'nanga, sa'genna tanaassengamo apa kajarianga.

³⁴Ammukona bari'basa', nakanamo anjo ana' toaya mae ri andi'na, “Ri bangngia assikatinroamma siagang manggeta! Sinampe' punna bangngi niusahakangi pole nanasa'ring. Nampa mangeko assikatinroang. Sallang massing anggappaki' ana'.”

³⁵Kammaminjo na ri wattunna anjo bangngia nausahakammi ke'nanga nanasa'ring Lot, nampa mange anjo ana' tulolonna makaruaya angngagangi assikatinroang. Na teaimi sipato' nasa'rinna pole Lot, sa'genna tanaassengamo apa kajarianga.

³⁶Nampa attianammo anjo ruaya ana' bainena Lot, lanri manggena tonji ke'nanga.

³⁷Ana' toaya allassukammi sitau ana' bura'ne, nampa naaremmo anjo anaka Moab.[7] Iaminne a'jari boe-boena tu Moab kamma-kamma anne.

³⁸Na ana' makaruaya allassukang tommi sitau ana' bura'ne nampa naareng Ben-Ami.[8] Iaminne a'jari boe-boe'na bansa Amon kamma-kamma anne.