Read Makassar Version – KITTA' MATANGKASA PA'JARIANG 20 Bible Online

PA'JARIANG 20 - Makassar Version – KITTA' MATANGKASA bible

PA'JARIANG 20

¹A'letteki Abraham battu ri Mamre, ri bageang timboranna butta Kanaan, nampa ammantang anjoreng ri alla'na Kades siagang Syur. Siapa are wattu ribokoanganna, ri wattunna ammantang ri Gerar,

² napaumi angkana andi'na anjo Sara bainenna. Lanri kammana nasuromi tunisurona Karaeng Abimelekh battu ri Gerar mange angngallei Sara na nasuro erang mae ri ia.

³Ri se'reang bangngi Napappicinikammi KalenNa Allata'ala mae ri anjo karaenga lalang so'na, na Nakana, “Lamateko, lanri nuallena anjo bainea, lanri nia'mo bura'nenna.”

⁴Mingka tale'bakapi nasero Abimelekh anjo Sara. Jari nakanamo anjo karaenga, “Tena nakusala Karaeng! Maka laKipanrakia' siagang bansaku?

⁵Kalenna Abraham angkana andi'na anjo bainea, nampa kamma todong anjo kananna anjo bainea. Matangkasaki ati mailalangku anggaukangi anne passalaka, jari tena nakusala.”

⁶Appialimi Allata'ala lalang anjo so'naya angkana, “Memang Kuassengi angkanaya matangkasaki ati mailalannu anggaukangi anne. Iaminjo saba'na nataKukellayako a'gau' dosa mae ri Nakke, siagang taKupa'biangako anseroi anjo bainea.

⁷Mingka kamma-kamma anne poterangi mae ri bura'nenna. Na'bi bura'nenna antu bainea, na lanapappala' doangangko sollanna tena numate. Mingka punna tena nanupoterangi, u'rangi angkanaya ikau siagang sikontu ra'ya'nu lamate ngasengko!”

⁸Ammukona ri bari'basaka, nakio'mi Abimelekh sikontu pagawena nampa napauang anjo sikamma apa kajarianga. A'jari sanna' ngasemmi malla'na ke'nanga napakamma.

⁹Le'baki anjo nakio'mi Abimelekh anjo Abraham nampa nakuta'nang angkana, “Apa anne le'baka nugaukang mae ri kambe? Apa salangku mae ri kau, sa'genna nupamae anne balaya ri kalengku siagang ri kakaraengangku? Tena sikali nusiratang la'gau' kamma anjo mae ri nakke.

¹⁰Angngapa nuppakamma anjo?”

¹¹Appialimi Abraham angkana, “Kupikkiriki angkanaya tena sikali tau malla' ri Allata'ala anrinni, sa'genna akkullea' nabuno taua ia eroka mae ri bainengku.

¹²Nampa pole antu bainea andikku memang. A'julu manggea' mingka maraengi amma'na, nakuassialle siagang.

¹³Jari ri wattungku Nasuro Allata'ala ambokoi balla'na manggeku, nakunampa a'lampa mange-mange a'jari tubattu-battu, kukanamo ri bainengku, ‘Pa'nyatami majarre'na pa'mai'nu ri nakke, lalang nukanana mae ri yangasenna taua angkanaya ikau andikkuko.’ ”

¹⁴Le'baki anjo napoterammi Abimelekh anjo Sara mae ri Abraham siagang anjo wattua nisare tommi Abraham siapa are ata, gimbala' siagang sapi.

¹⁵Nakanamo anjo karaenga ri Abraham, “Iaminne sikontu pa'rasangangku; ammantammako ri keremae tampa' nungaia.”

¹⁶Nampa nakana ri Sara, “Le'baki kusare daennu sisa'bu doe' pera' a'jari butti mae ri sikontu taua angkanaya ikau tena tojeng-tojeng nusala.”

¹⁷Nipa'jari tamanang ngasemmi ri Batara sikontu baine niaka ri balla' kakaraenganna Abimelekh passabakkang Sara, bainenna anjo Abraham. Nampa appala' doammo Abraham ri Allata'ala, sa'genna nipa'jari baji' ammotere' Abimelekh. Bainenna siagang sikamma atanna bainea, nipa'jari baji' ngaseng tommi ammotere' sa'genna akkulle ngasemmi ammana' poleang.