Read Makassar Version – KITTA' MATANGKASA PA'JARIANG 26 Bible Online

PA'JARIANG 26 - Makassar Version – KITTA' MATANGKASA bible

PA'JARIANG 26

¹Anjo wattua naallemi cipuru' pa'rasanganga sangkamma apa le'baka kajariang ri jammanna Abraham. Mangemi Ishak andallekang ri Abimelekh, karaeng Filistin, ri Gerar, appala' ising untu' ammantang anjoreng.

²Nagaukammi anjo kammaya, lanri le'ba'na Napappicinikang KalenNa Batara ri ia naNakana, “Teako a'lampai mange ri Mesir, mingka ammantang mako anrinni ri anne pa'rasanganga, situru' Kuparentakanga ri kau.

³ Inakke lanjagaiko siagang lambarakkakiko. Sikontu anne daeraya laKupassareangi mae ri kau, siagang mae ri turungannu. LaKurupai janjingKu, ia le'baka Kupau mae ri Abraham manggenu.

⁴LaKusareko ana'-cucu sanrapang bintoenga ri langi' jaina, siagang sikontu anne daeraya laKupassareangi mae ri ke'nanga. Sikontu bansaya ri lino lappala' ngasengi ri kau sollanna Kubarakkaki ke'nanga sangkamma le'ba'na Kubarakkaki turungannu.

⁵LaKubarakkaki ngasengko, lanri le'ba'namo mannuruki Abraham ri Nakke siagang nakatutui sikamma hukkungKu siagang parentaKu.”

⁶Jari ammantammi Ishak ri Gerar.

⁷ Ri wattunna akkuta'nang taua anjoreng ri passala'na Ribka, appialimi Ishak angkanaya andi'na anjo Ribka, teai bainenna. Mallaki Ishak angkanaya lanibunoi ri yangaseng anjo taua sollanna akkulle naalle anjo Ribka sannaka ga'gana.

⁸Ammantannamo Ishak anjoreng siapa are sallona, ri se'reang allo attontommi Karaeng Abimelekh battu ri tontonganna, nanacini'mo Ishak siagang Ribka assikama'-kamaseang.

⁹Jari nakio'mi Ishak nampa nakuta'nang angkana, “Sai bainennu anjo bainea? Angngapa nanupau angkana andi'nu?” Appialimi Ishak angkana, “Kupikkiriki angkanaya punna kupau angkana bainengku tena tanibunoku.”

¹⁰Nakanamo Abimelekh, “Apa anne le'baka nugaukang mae ri kambe? Tena tania'na kalase'renna ra'yakku akkulle sikatinroang siagang bainennu punna kamma. Na punna kajariang anjo kammaya, ikaumi nakatu'guri anne kasalanna ikambe.”

¹¹Nampa napakainga'mo Abimelekh sikontu ra'ya'na, angkana, “Inai-nai angganggui anne taua yareka bainenna, lanihukkung matei.”

¹²Appakioro'mi bine siagang a'lamung-lamummi Ishak anjoreng ri pa'rasanganga. Nanggappamo wassele' a'lappi sibilangngang battu ri apa napakioroka, lanri nibarakkakinna ri Batara.

¹³Pila' katambammi kakalumanynyangnganna, sa'genna a'jarimi tu sanna' akkalumanynyanna.

¹⁴Angngiri matami tu Filistin ri ia lanri jaina surona, pa'rappungang gimbala'na siagang sapina.

¹⁵Nampa natambungimi butta ke'nanga sikamma bungung le'baka nakeke surona Abraham ri wattu attallasa'na ija.

¹⁶Nampa nakanamo Abimelekh ri Ishak, “A'lampako anrinni ri pa'rasanganna ikambe. La'bi koasangngang mako na ikambe.”

¹⁷Jari a'lampami Ishak nampa mange akkema ri Ka'bung Lappara'na Gerar. Anjoreng ammantammi siapa are sallona.

¹⁸Nakekemi ammotere' sikamma bungung-bungung le'baka nikeke ri jammanna Abraham, ia le'baka nitambungi ri tu Filistin ri wattu matenamo Abraham. Sikamma anjo bungunga nisarei areng situru' areng le'baka napassareang manggena.

¹⁹Nakekemi surona Ishak anjo bungung niaka ri Lappara' Gerar, sa'genna anggappamo je'ne' ke'nanga alla'bi-la'bi.

²⁰Mingka a'besere'mi sikamma pakalawaki niaka ri Gerar siagang sikamma pakalawakina Ishak. Nakana ke'nanga, “Anne je'neka ikambe pata.” Iaminjo saba'na nanaaremmo Ishak anjo bungunga “Pa'beserang”.

²¹Angngekemi pole surona Ishak bungung maraeng, mingka a'jarimi pole pa'beserang anjo bungunga. Lanri kammana nasaremi areng Ishak anjo bungunga “Passimusuang”.

²²Nampa a'lette' battu anjoreng, siagang angngekemi pole bungung makatallua. Anjo wattua tena na'jari pa'beserang. Lanri kammana, naaremmi Ishak anjo bungunga “Kabebasang”. Nakanamo, “Kamma-kamma anne Nasare maki' Batara kabebasang untu' ammantang ri anne pa'rasanganga, siagang akkulle maki' a'jari baji' tallasatta anrinni.”

²³Nampa a'lampamo Ishak nabattu mange ri Bersyeba.

²⁴Anjo bangngia Napappicinikammi KalenNa Batara ri ia, na nakana, “INakkemi Allata'alana manggenu Abraham. Teako mallakki; laKujagaiko. LaKubarakkakiko siagang laKusareko turungang sannaka jaina lanri janjingKu mae ri atangKu Abraham.”

²⁵Nampa ambangummo Ishak se're tampa' pakkoro'bangngang untu' anynyomba ri Batara ri anjo tampaka. Akkemami anjoreng siagang sikamma surona, siagang angngekemi pole bungung maraeng.

²⁶ Ri se'reang allo nia'mi Abimelekh battu ri Gerar, siagang Ahuzat tumailalanna, kammayatompa Pikhol panglima tantarana untu' angngagangi sibuntulu' Ishak.

²⁷Akkuta'nammi Ishak angkana, “Angngapa kibattu ngaseng untu' angngaganga' sibuntulu' kamma-kamma anne, nariolo numusua' siagang nubongka' assulu' ri pa'rasangannu ngaseng?”

²⁸Appialimi ke'nanga angkana, “Kamma-kamma anne naassemmi ikambe angkanaya Najagaiko Batara, siagang napikkiriki ikambe angkanaya bajiki punna apparekki' parjanjiang. Assumpa mako

²⁹angkanaya tena nula'gau' ja'dala' mae ri kambe, sangkamma todong ikambe tena kila'gau' ja'dala' mae ri kau. Le'ba'mi a'gau' baji' ikambe ri kau na nilappassangko a'lampa taniapa-apa. Baji'mi naassenna ikambe angkanaya Nabarakkakiko Batara.”

³⁰Nampa natoanamo Ishak anjo ke'nanga, siagang angnganremi nangnginung ke'nanga.

³¹Ammukona bari'basa' massing napaumi janjinna ke'nanga na niassai siagang sumpa. Nampa napasalama' Ishak ke'nanga ri lampana, siagang assisa'la'mi ke'nanga sangkamma bela singaia.

³²Ia todong anjo alloa battumi surona Ishak ampaui ri ia passala'na bungung le'baka nakeke ke'nanga. Nakana ke'nanga, “Anggappami ikambe je'ne'.”

³³Nampa nasaremo areng Ishak anjo bungunga “Sumpa”. Iaminjo assala' pakaramulanna naniareng anjo kotaya Bersyeba.

³⁴Ri wattunna patampulo taung umuru'na Esau, a'nikkami siagang rua tulolo battu ri suku bansa Het, iamintu Yudit ana'na Beeri siagang Basmat ana'na Elon.

³⁵Anjo ruaya baine napakasusai katallassanna Ishak siagang Ribka.