Read Makassar Version – KITTA' MATANGKASA PA'JARIANG 27 Bible Online

PA'JARIANG 27 - Makassar Version – KITTA' MATANGKASA bible

PA'JARIANG 27

¹Ri se'reang allo, ri wattu toanamo Ishak siagang buta tommi pole, nakio'mi Esau, ana'na toaya, nampa nakana ri ia, “Ana'!” Appialimi Esau angkana, “Iye', bapa'.”

²Nakanamo Ishak, “Nuassemmi angkanaya toama' siagang tenamo kapang nakusallo attallasa'.

³Jari allemi pananu siagang anronna, a'lampamako mange assoso' olo'-olo' ri paranga.

⁴Bajiki palluna situru' pallu-pallu kungaia, nampa nuerang mae ri nakke. Punna le'baki kukanre, lakusareko barakka' lalang tenanapa kumate.”

⁵Anjo passibicaranna Ishak siagang Esau nilangngereki ri Ribka. Jari ri wattu a'lampanamo Esau mange assoso',

⁶nakanamo Ribka ri Yakub, “Silalonna kulangngere' sipa'bicara manggenu siagang Esau angkana,

⁷‘Mange mako assoso' siagang angngondang mako sikayu olo'-olo' nampa nupalluang bajikka'. Punna le'ba' kukanre, lakusareko barakkakku ri dallekanNa Batara ilalang tenanapa kumate.’ ”

⁸Nakanamo pole Ribka, “Jari kamma anne na', pilangngeri siagang gaukangi anne kanangku.

⁹A'lampako mange ri tampa'na gimbalatta, nanupilei ruang kayu bembe co'moka, sollanna kupallu sangkamma pallu-pallu nangaia manggenu.

¹⁰Nampa nuerang mange ri ia nanakanre. Na punna le'baki anjo lanasare mako barakka'na ilalang tenanapa namate.”

¹¹Mingka nakanamo Yakub ri amma'na, “Amma', sai anjo kalenna Esau a'bului, nampa kalengku nakke tena?

¹²Gassingka nata'galakka' bapakku nampa naasseng angkanaya kuballe-ballei. Gassingka tena nanabarakkakia' passangalinna natunraja'.”

¹³Appialimi amma'na angkana, “Teako batai, na'. Inakkepa antanggongi pattunrana. Gaukang mami kanangku. A'lampamako angngallei anjo bembea.”

¹⁴Jari a'lampami Yakub angngallei anjo bembea na naerang mae ri amma'na. Nampa napallu Ribka a'jari pallu-pallu pangngainna Ishak.

¹⁵Nampa naalle Ribka bajunna Esau kaminang bajika, niaka naboli' ri balla', na napipakeang mae ri Yakub.

¹⁶Napikalukiang tommi limanna siagang kallonna Yakub anjo tenaya na'bulu siagang kukkulu' ana' bembe.

¹⁷Nampa nasare Yakub anjo pallu-pallu nyamanga siagang roti le'baka napare'.

¹⁸Le'baki anjo a'lampami Yakub mae ri manggena na nakana, “Bapa'!” Appialimi Ishak angkana, “Iyo'. Inai kontu, Esau yareka Yakub?”

¹⁹Appialimi Yakub angkana, “Esau, ana' toata. Le'ba'mi kugaukang pasanta. Ammempo maki' siagang angnganre maki' dageng kugappaya kusoso' anne, sollanna akkulleki' ambarakkakia'.”

²⁰Nakanamo Ishak, “Linta' sikaliko anggappa na'.” Appialimi Ishak angkana, “Lanri nitulunga' ri Karaeng Allata'ala kisombaya.”

²¹Nakanamo Ishak ri Yakub, “A'reppe'-reppesekko mae sollannu akkulle kuta'gala'. Maka Esau tojengko?”

²²A'reppese'mi Yakub mae ri manggena. Nita'gala'mi ri manggena na nakana, “Sa'rannu sangkammai sa'ranna Yakub, mingka limannu sangkammai limanna Esau.”

²³Tena niassengi Yakub ri Ishak lanri a'bului limanna sangkamma limanna Esau. Mingka ri wattu lanabarakkakina Yakub,

²⁴akkuta'nang inji sikali pole nakana, “Maka Esau tojengko?” Appialimi Yakub angkana, “Tojeng.”

²⁵Nakanamo Ishak, “Sareamma' anjo dagenga. Punna le'ba' kukanre nampa mako lakusare barakkakku.” Napassareammi Yakub anjo dagenga mae ri ia siagang sike'de' anggoro' untu' nainung.

²⁶Nampa nakanamo manggena ri ia, “A'reppesekko pole nupila' ambani na', nampa nubaua'.”

²⁷ Ri wattunna a'reppese' Yakub na nabau, naara'mi Ishak rasa bajunna Esau, nampa nabarakkakimo. Nakana Ishak, “Rasa bau'na anakku sangkammai rasa bau'na parang le'baka Nabarakkaki Batara.

²⁸Poro Nasareko Allata'ala saliu' battu ri langi', nampa napa'jari coppong sikamma kokonnu! Poro Nasareko gandung siagang anggoro' alla'bi-la'bi!

²⁹ Poro a'jari atannu ngaseng sikamma bansa-bansaya, siagang tundu' ngaseng suku bansaya mae ri kau. Poro nukoasai ngaseng sikamma bija pammanakannu, siagang su'ju' ri kau turunganna amma'nu. Poro nitunra ngasengi sikamma tau antunrayako, siagang poro nibarakkaki ngaseng sikamma tau ambarakkakiako.”

³⁰Tena nasallo le'ba'na napassareang barakka'na Ishak siagang a'lampanamo Yakub, nia'mi Esau ammotere' battu assoso'.

³¹Appallu tommi kanre-kanreang nyamang, nampa naerang mange ri manggena. Nakana, “Ammempo maki' Bapa', siagang angnganre maki' dageng kueranga untu' ikatte, sollanta akkulle ambarakkakia'.”

³²Akkuta'nammi Ishak angkana, “Inaiko antu?” Appialimi Esau angkana, “Esau, anatta toaya.”

³³Appakkaramulami annekkere' sibatu kalenna Ishak, siagang akkuta'nammi angkana, “Punna kamma, inai anjo sumpadeng battua assoso' nampa naerang mae ri nakke? Le'ba'mi kukanre ri tenanapa nubattu. Nampa le'ba'mi kupassareang barakkakku kala'busanga mae ri ia, nakamma-kamma anne iami pata anjo barakkaka sa'genna satunggu-tungguna.”

³⁴Nalangngere'na Esau anjo, angngarru' lompomi, nateai sipato' pa'risi'na nyawana. Nampa nakanamo, “Barakkaki tonga', Bapa'!”

³⁵Nakanamo Ishak, “Le'ba'mi battu mae andi'nu amballe-balleia'. Le'ba'mi naalle barakka' eroka sitojenna kupassareang ri kau.”

³⁶ Nakanamo Esau, “Iaminne makapinruangku naballe-ballei. Siratangi niareng Yakub. Naallemi ha' ana' bungasakku, nampa kamma-kamma anne naalle tommi barakka' lamangea ri nakke. Apaka tenamo barakkatta maraeng Bapa'?”

³⁷Appialimi Ishak angkana, “Le'ba'mi kupa'jari anjo andi'nu a'jari karaennu, siagang sikamma bija pammanakannu la'jari ngasengi suro-surona. Le'ba'mi kusare gandung siagang anggoro'. Kamma-kamma anne tena sikalimo apa-apa akkulle kugaukang untu' ikau, Na'!”

³⁸ Tenamo ammarina Esau appala' ri manggena. Nakana, “Apaka se'reji bawang barakkatta? Barakkaki tonga' Bapa'!” Nampa appakkaramulamo angngarru' pole.

³⁹ Nampa nakanamo Ishak ri ia, “Talaniakka saliu' battu ri langi' untu' ikau, tena niakka koko lacoppong untu' ikau.

⁴⁰ Lattallasakko lanri battu ri pa'dannu, mingka la'jari suronako andi'nu, mingka punna angngewako, lata'lappasakko battu ri kakoasanna.”

⁴¹Jari a'jari birisi'mi Esau mae ri Yakub, lanri le'ba'na napassareang barakka'na manggena mae ri anjo andi'na. Nakanamo nawa-nawana, “Tenamo nasallo namate bapakku. Punna le'ba' ta'lappasa' allo kasusaanga, lakubunoi anjo Yakub!”

⁴²Nalangngere'na Ribka anjo rancanana Esau, nakio'mi Yakub nampa nakana ri ia, “Pilangngeri anne. Eroki daennu Esau ampa'balassiko siagang erokko nabuno.

⁴³Jari gaukangi anne kanangku. A'lampako linta' mange ri daengku Laban ri Haran,

⁴⁴nampa ammantang mako siagang ia siapa are sallona, sa'genna ammari larrona daennu mae ri kau,

⁴⁵na nakaluppaimo anjo apa le'baka nugaukang mae ri ia. Nampa lakusuro sallang taua angngerangko ammotere' mae anrinni. Taeroka' tappela' rua anakku lalang se'rea allo.”

⁴⁶Nakanamo Ribka ri Ishak, “Lanrema' siagang birisi'ma' anciniki anjo sikamma bainenna Esau battua ri bansa maraeng. Punna a'bunting todong Yakub siagang tulolo battua ri bansa Het, bajikangngang mate mama'.”