Read Makassar Version – KITTA' MATANGKASA PA'JARIANG 40 Bible Online

PA'JARIANG 40 - Makassar Version – KITTA' MATANGKASA bible

PA'JARIANG 40

¹Siapa are wattu ribokoanganna, nia' rua palayanna karaeng Mesir appare' kasalang mae ri karaenga. Jama-jamanna ke'nanga iamintu pangngurusu' inunganna siagang rotina karaenga.

²Larromi karaenga ri anjo ruaya palayang.

³Napantama'mi ke'nanga ri tarungkua, iamintu balla' tahananna kapala pangawala'na balla' karaenga. Nania' Yusuf lalang ri anjo tampa' tahananga.

⁴Sallo tongi ke'nanga lalang ri anjo tarungkua. Nampa nisuromo Yusuf ri kapala pangawala'na balla' karaenga untu' allayani ke'nanga.

⁵Ri se'reang bangngi, massing asso'nami anjo pangngurusu' inunganga siagang pangngurusu' rotia.

⁶Ri wattunna battu Yusuf mae ri ke'nanga ammukona bari'basa', si'nami nicini' ke'nanga.

⁷Akkuta'nammi Yusuf ri ke'nanga angkana, “Angngapa nusi'na sipa'rua anne alloa sari'battang?”

⁸Appialimi ke'nanga angkana, “Ri bangngia massing asso'nai ikambe. Nampa tena tau angngassengi apa battuanna.” Nakanamo Yusuf, “Allata'alaji bawang akkulle assarei taua pakkulle untu' ampakasingaraki battuanna so'naya. Cobasai bedeng carita anjo so'nanu.”

⁹Nakanamo anjo pangngurusu' inunganga, “Lalang so'naku nia' kucini' poko' anggoro' ri dallekangku.

¹⁰Anjo pokoka tallu tangkenna. Nampami appakkaramula a'leko' tangkenna, nata'bakkara' memammo linta' bunga-bunganna, siagang a'jari ti'no'mi rapponna.

¹¹Jari kuallemi anjo rappo anggoroka nampa kupacco' antama' ri kaca pangnginunganna karaenga. Le'baki anjo kuerammi mae ri karaenga.”

¹²Nakanamo Yusuf, “Iaminne battuanna: Anjo tallua tangke, battuanna tallungngallo.

¹³Lalang wattu tallungngalloa anne, lanalappassangko karaenga. Lanapammopporangko siagang lanapoterangko mae ri jama-jamannu rioloa. Lanupatalai kaca pangnginunganna mae ri karaenga sangkamma riolo.

¹⁴Mingka u'rangia' punna baji'-baji' mako. Tulunga' nanupabattu kara-karaku mae ri karaenga sollanna nalappassanga' battu ri anne tarungkua.

¹⁵Nasaba', riolo nakke nilukkaka' battu ri tu Ibrani. Nampa anrinni ri Mesir tena le'bakapa' anggaukangi manna sirupaya kaja'dallang sa'gengku siratang nipantama' ri tarungkua.”

¹⁶Naassenna anjo pangngurusu' rotia angkanaya anjo battuanna so'nana pangngurusu' inunganga bajiki, nakana tommo ri Yusuf, “Asso'na tonga'; a'jujunga' tallung karanjeng roti irate ri ulungku.

¹⁷Lalang karanjeng irate dudua a'rupa-rupai kanrejawa bonena untu' karaenga. Mingka battui jangang-janganga angkanrei anjo sikamma kanrejawaya.”

¹⁸Nakanamo Yusuf, “Iaminne battuanna anjo so'naya: Anjo tallua karanjeng, battuanna tallungngallo.

¹⁹Lalang tallungngalloa anne, lanasuroi karaenga taua ansamballei kallonnu sa'genna tassa'la' ulunnu. Nampa nagentung kalennu ri se'reang benteng, sa'genna battu jangang-janganga angkanrei dagennu.”

²⁰Tallungngalloi pole, narapi'mi allo kalassukanna karaenga. Appare'mi passua'-suarrang untu' sikontu pagawena. Naparentakammi sollanna nipasulu' battu ri tarungkua anjo pangngurusu' inunganga siagang pangngurusu' rotia, nampa nierang mange ri dallekanna sikontu pagawea ri balla' karaenga.

²¹Anjo pangngurusu' inunganga nipoterammi mae ri jama-jamanna riolo.

²²Mingka anjo pangngurusu' rotia nihukkung matei. Yangasenna anjo kajarianga sicocoki siagang apa le'baka napau Yusuf.

²³Mingka anjo pangngurusu' inunganga nakaluppaimi Yusuf. Takkaluppa sikalimi ri Yusuf.