Read Makassar Version – KITTA' MATANGKASA PA'JARIANG 45 Bible Online

PA'JARIANG 45 - Makassar Version – KITTA' MATANGKASA bible

PA'JARIANG 45

¹ Takkulleami naparrangngi pa'mai'na Yusuf ri dallekanna sikamma pagawena. Jari nasuromi ke'nanga a'lampa ambokoi anjo tampaka, sollanna akkulle napappiassengang kalenna mae ri sikamma sari'battanna.

²A'lampana ngasemmo pagawena ambokoi anjo tampaka, angngarru' lompomi Yusuf, sa'genna nalangngere' tu Mesir niaka pantaranganna anjo tampaka. Na ta'rapi'mo anjo kabaraka mange ri balla'na karaenga.

³Nakanamo Yusuf ri anjo sikamma sari'battanna, “Inakke minne Yusuf. Attallasa' iji bapa'?” Nacini'na anjo kammaya, malla' sikalimi anjo sikamma sari'battanna, sa'genna takkullea appiali.

⁴Nampa nakanamo Yusuf mae ri ke'nanga, “Mae ngaseng mako anrinni.” A'reppese'mi ke'nanga, nampa nakanamo pole Yusuf, “Inakke minne Yusuf le'baka nubalukang mae ri Mesir.

⁵Teako mallakki siagang teako sassali kalennu ngaseng, lanri le'bakku nubalukang. Sikontutojenna KalenNa Allata'ala angngeranga' mae anrinni, a'jappa riolo untu' ampasalamaki tau jaia.

⁶Kamma-kamma anne nampami taung makarua wattu kacipuranga. Limang taumpi sallona takkullea taua anjama yareka akkatto.

⁷Naeramma' Allata'ala a'jappa riolo untu' ampasalama' ngasengko tete ri anne kajariang appakalannasaka, siagang untu' antanggongi kasalamakkannu ngaseng, kammayatompa untu' kala'buanna turungannu.

⁸Jari, teai passabakkang ikau ngaseng nakunia' anrinni, mingka passala' Allata'ala. Iami ampa'jaria' pagawe kaminang tinggi ri karaeng Mesir. Nisarema' koasa mae ri sikontu bone balla'na siagang mae ri sikontu pa'rasangang Mesir.

⁹ Kamma-kamma anne akkaro-karo ngaseng mako ammotere' mange ri bapa', nampa nupauang angkana inakke Yusuf, ana'na, akkana kamma anne, ‘Napa'jarima' Allata'ala tukoasa ri sikontu Mesir. Battu maki' mae linta'.

¹⁰Akkulleki' ammantang ri Daera Gosyen, ri ampi' pammantangangku. Battu maki bapa', siagang ana'-cucunta, sikamma gimbalatta, bembeta, sapita, siagang sikamma pa'barang-baranganta.

¹¹Punna niakki' ri Gosyen, akkullema' amparakaiki'. Sallo iji wattu kacipuranga, iamintu liman taumpi. Lakuusahakangi sollanta ikatte, kaluargata, siagang sikamma olo'-olotta tena nalakakurangang apa-apa.’ ”

¹²Nakanamo pole Yusuf, “Kamma-kamma anne nucini' ngasemmi kalennu, ikau pole Benyamin, angkana inakke tojemmi anne Yusuf.

¹³Paumi ri bapatta antekamma lompona koasaku anrinni ri Mesir. Carita ngasemmi mae ri ia sikontu apa le'baka nucini'. Nampa linta' mako angngerangi mae anrinni.”

¹⁴Le'baki anjo naraka'mi Benyamin, anjo andi'na, nampa angngarru'. Angngarru' tommi Benyamin nampa naraka' todong Yusuf.

¹⁵Nampa lalang angngarru'na ija Yusuf, naraka' ngasemmi sikamma sari'battanna nampa nabau ke'nanga. Le'baki anjo accaritami siagang ke'nanga.

¹⁶Ri wattunna kalangngerang ri balla'na karaenga angkanaya battui sikamma sari'battanna Yusuf, sannang tommi pa'mai'na karaenga siagang sikontu pagawena.

¹⁷Nampa nakanamo karaenga ri Yusuf, “Suromi anjo sikamma sari'battannu ampitekeki keledaina ke'nanga nampa ammotere' mange ri Kanaan,

¹⁸untu' mange angngallei manggena siagang kaluargana ke'nanga nampa a'lette' mae anrinni. Lakusarei ke'nanga tampa' kaminang bajika ri Mesir, sollanna akkulle ke'nanga attallasa' siagang ganna' battu ri wassele'na anjo buttaya.

¹⁹Suro tommi ke'nanga angngerang siapa are kareta battu anrinni, sollanna akkulle naerang bainenna siagang ana'-ana' ca'dina ke'nanga, siagang naalle manggena ke'nanga.

²⁰Tena naparallu napikkiri' ke'nanga apa-apa tena sikalia nakkulle naerang, nasaba' apa kaminang bajika ri Mesir akkullei napatang ke'nanga.”

²¹Nagaukammai sikamma ana'na Yakub anjo parentana karaenga. Nasaremi Yusuf ke'nanga siapa are kareta, situru' parentana karaenga, kammayatompa kanre bokong untu' pa'jappanna ke'nanga.

²²Massing nasare tommi ke'nanga tassipasanna pakeang beru. Mingka mae ri Benyamin nasarei tallum bilangngang doe' pera' siagang limam pasang pakeang beru.

²³Napikatuimi manggena sampulo keledai attekeka barang-barang kaminang bajika ri Mesir, sampulo keledai attekeka gandung, roti siagang kanre-kanre maraeng untu' lanakanre lalang pa'jappana mange ri Mesir.

²⁴Nampa napalampamo sikamma sari'battanna, siagang nakana ri ke'nanga, “Teako a'beseri ri aganga.”

²⁵Nabokoimi ke'nanga Mesir nampa ammotere' mange ri Yakub ri Kanaan, manggena ke'nanga.

²⁶Nakanamo ke'nanga ri manggena, “Attallasa' iji Yusuf! Ia a'jari tukoasa ri Mesir!” Nalangngere'na anjo kabaraka, takkajannammi Yakub, siagang tena napatappaki ke'nanga.

²⁷Mingka le'ba'namo nacarita ngaseng ke'nanga apa napaua Yusuf mae ri ke'nanga, siagang nacini'namo kareta nakiringa Yusuf untu' angngallei siagang angngerangi mange ri Mesir, angngu'rangimi ri takkajannanna.

²⁸Nakanamo, “Tallasa' iji anakku Yusuf! Iaji anjo bawang kukaeroki! Musti a'lampa' mange anciniki ri tenanapa kumate.”