Read Makassar Version – KITTA' MATANGKASA PA'JARIANG 46 Bible Online

PA'JARIANG 46 - Makassar Version – KITTA' MATANGKASA bible

PA'JARIANG 46

¹Naparutusu'mi Yakub sikamma pa'barang-baranganna, nampa a'lampa. Anrapiki ke'nanga ri Bersyeba, assaremi koro'bang mae ri Allata'ala, Ia nasombaya Ishak, manggena.

²Ri se'reang bangngi, lalang se're paccini', Nakanamo Allata'ala ri ia, “Yakub, Yakub!” Appialimi angkana, “Iye', Batara.”

³Nakanamo Allata'ala, “INakkemi Allata'ala, Allata'alana manggenu. Teako mallakki untu' a'lampa mange ri Mesir. LaKupa'jari turungannu se're bansa lompo anjoreng.

⁴LaKururungangko mange ri Mesir, siagang laKuerangi ammotere' mae anrinni ri pa'rasanganga turungannu. Laniaki Yusuf ri sa'rinnu punna lanarapi' a'jala'nu.”

⁵Nampa a'lampamo Yakub battu ri Bersyeba. Nipanai'mi Yakub ri karetaya ri ana'-ana'na. Kammayatompa massing bainenna sikamma ana'-ana'na nipanai' ngaseng tommi ri anjo kareta nakiringa karaeng Mesir.

⁶ Naerang tommi ke'nanga sikamma olo'-olo'na siagang sikontu pa'barang-barangngang nagappaya ke'nanga ri Kanaan, nampa a'lampa mange ri Mesir. Naerang ngasemmi Yakub sikontu turunganna,

⁷sikontu ana' cucunna bura'ne siagang baine.

⁸Ia anggota-anggota kaluargana Yakub amminawanga mange ri Mesir, iamintu:

⁹Ruben, ana' toaya; naia ana'-ana'na Ruben iamintu: Henokh, Palu, Hezron, siagang Karmi.

¹⁰Simeon; naia ana'-ana'na Simeon iamintu: Yemuel, Yamin, Ohad, Yakhin, Zohar, siagang Saul ana' battuna ri bainenna tu Kanaan.

¹¹Lewi; naia ana'-ana'na Lewi iamintu: Gerson, Kehat, siagang Merari.

¹²Yehuda; naia ana'-ana'na Yehuda iamintu: Syela, Peres, siagang Zerah. Nampa ana'na Yehuda maraenga iamintu: Er siagang Onan matei ri Kanaan. Ana'-ana'na Peres: Hezron siagang Hamul.

¹³Isakhar; naia ana'-ana'na Isakhar iamintu: Tola, Pua, Ayub, siagang Simron.

¹⁴Zebulon; naia ana'-ana'na Zebulon iamintu: Sered, Elon, siagang Yahleel.

¹⁵Yangaseng anne ke'nanga ana'na Yakub nalassukanga Lea ri Mesopotamia, napantaranganna anjo nia' todong ana'na baine niarenga Dina. Jari sikontu turunganna Yakub battu ri bainenna niarenga Lea nia' tallumpulo antallu tau jaina.

¹⁶Gad; naia ana'-ana'na Gad iamintu: Zifyon, Hagi, Syuni, Ezbon, Eri, Arodi, siagang Areli.

¹⁷Asyer; naia ana'-ana'na Asyer iamintu: Yimna, Yiswa, Yiswi, Beria, siagang Serah, sari'battang bainena ke'nanga. Ana'-ana'na Beria iamintu Heber siagang Malkiel.

¹⁸Anjo sampuloa angngannang tau turunganna Yakub battu ri bainenna niarenga Zilpa, iamintu suro baine napassareanga Laban mae ri Lea, ana' bainena.

¹⁹Bainenna Yakub niarenga Rahel nia' rua ana'na, iamintu Yusuf siagang Benyamin.

²⁰ Ri Mesir anggappai rua ana' Yusuf, iamintu Manasye siagang Efraim, nilassukanga ri bainenna Yusuf niarenga Asnat, ana'na Potifera, a'jari imanga ri Heliopolis.

²¹Benyamin; ia ana'-ana'na Benyamin iamintu: Bela, Bekher, Asybel, Gera, Naaman, Ehi, Ros, Mupim, Hupim, siagang Ared.

²²Anjo sampuloa angngappa' tau iami turunganna Yakub battua ri bainenna niarenga Rahel.

²³Nampa pole Dan; ana'na Dan iamintu Husim.

²⁴Naftali; naia ana'-ana'na Naftali iamintu: Yahzeel, Guni, Yezer, siagang Syilem.

²⁵Anjo tujua tau iami turunganna Yakub battua ri bainenna niarenga Bilha, suro baine napassareanga Laban mae ri Rahel ana'na.

²⁶Yangasenna turunganna Yakub a'lampaya mange ri Mesir iamintu annampulo angngannang jaina, tanirekengapi sikamma mintunna.

²⁷ Ana'-ana'na Yusuf, ia lassuka ri Mesir nia' rua tau, sa'genna sikontu kaluargana battua ri Mesir nia' tujupulo tau yangaseng.

²⁸Nasuromi Yakub anjo Yehuda a'jappa riolo untu' angkioki Yusuf sollanna nia' ambuntuli ri Gosyen. Ri wattunna battu ke'nanga mange ri Gosyen,

²⁹nai'mi Yusuf ri karetana untu' mange assibuntulu' siagang manggena anjoreng. Ri wattunna assibuntulu'mo ke'nanga, naraka'mi Yusuf anjo manggena nampa angngarru' sisalloang.

³⁰Nakanamo Yakub ri Yusuf, “Kamma-kamma anne rellama' mate, lanri kucini'mako siagang kuassemmi angkana attallasa' ijako.”

³¹Nampa nakanamo Yusuf mae ri sikamma sari'battanna siagang ri sikamma bija pammanakanna maraenga, “Musti a'lampa' mange ri karaenga ampauangi angkanaya nia'mi battu sikamma sari'battangku siagang sikamma bija pammanakanna ammantanga ri Kanaan.

³²Lakupaui angkana ikau ngaseng jama-jamannu iamintu akkalawaki gimbala' siagang sapi, siagang nuerang ngasemmi olo'-olo' piaranu, kammayatompa sikontu pa'barang-barangannu.

³³Punna nakio' ngasengko karaenga nampa napakkuta'nangngang angkana apa jama-jamannu,

³⁴pauammi angkana battu ri ca'dinu iji nummarakaimo olo'-olo' piara sangkamma boe-boenu. Lanri kammana, lanasuro ngaseng mako ammantang ri Daera Gosyen.” Akkana kammami anjo Yusuf, lanri tu Mesirka nakanai kalenna tuna assibengkoro' siagang sikamma pakalawakia.