Read Makassar Version – KITTA' MATANGKASA PA'JARIANG 47 Bible Online

PA'JARIANG 47 - Makassar Version – KITTA' MATANGKASA bible

PA'JARIANG 47

¹Nampa naerammi Yusuf lima tau battu ri sari'battanna mange andallekang ri karaenga. Nakanamo ri karaenga, “Manggena siagang sikamma sari'battanna atanta nia'mi battu ri Kanaan. Battumi ke'nanga mae anrinni siagang bembena, gimbala'na, kammayatompa sikontu pa'barang-baranganna ke'nanga. Kamma-kamma anne niaki ke'nanga ri Daera Gosyen.” Nampa napappiassengammo anjo sikamma sari'battanna mae ri karaenga.

³Akkuta'nammi karaenga ri ke'nanga angkana, “Apa ngaseng jama-jamannu?” Appialimi ke'nanga angkana, “Ikambe anne pakalawaki sangkamma boe-boena ikambe.

⁴Battui anne ikambe untu' ammantang anrinni ri pa'rasanganga, lanri sanna' sarrinna kacipuranga ri Kanaan, sa'genna tenamo ruku' untu' lanakanre sikamma bembena siagang gimbala'na ikambe. Kisaremi ikambe pangngellai untu' ammantang ri Daera Gosyen.”

⁵Nakanamo karaenga ri Yusuf, “Kamma-kamma anne nia'mi anrinni manggenu siagang sikamma sari'battannu.

⁶Pasangkammami anne pa'rasangang Mesir sangkamma pa'rasangang kalennu. Lappassammi ammantang ke'nanga ri Daera Gosyen, iamintu daera kaminang bajika anrinni ri pa'rasanganga. Siagang saremi tugasa' tau cara'deka anjama untu' angngurusuki olo'-olo' piaraku.”

⁷Napappiassengang tommi Yusuf anjo manggena mae ri karaenga. Nabarakkakimi Yakub anjo karaenga.

⁸Nampa akkuta'nammo karaenga ri ia angkana, “Siapa umurutta, Bapa'?”

⁹Appialimi Yakub angkana, “Sibilangngammi antallumpulo taung attallasa' atanta, a'jari tupalampa mange-mange. Punna nipasinrapangi siagang umuru'na boe-boena atanta a'jaria tupalampa mange-mange, anne katallassanna atanta jai kasukkarranna siagang bodoji umuru'na.”

¹⁰Le'baki anjo appala' kanami Yakub nampa assare barakka' passibokoi.

¹¹Nabantumi Yusuf anjo manggena siagang sikamma sari'battanna ammantang ri Mesir. Nasaremi ke'nanga tampa' untu' napatang ke'nanga ri bageang kaminang bajika ri anjo pa'rasanganga, iamintu ri ampi' kota Rameses, situru' parentana karaenga.

¹²Nampa nagannakkimo pappasadia untu' lanakanrea manggena, sikamma sari'battanna, kammayatompa sikontu bija pammanakanna, sa'genna kaminang loloa.

¹³Anjo kacipuranga sanna'mi sarrinna, sa'genna tenamo lanikanrea ri kere-keremae. Ra'yaka ri Mesir siagang ri Kanaan dodong ngasemmi siagang tanakulleami napakamma cipuru'.

¹⁴Sampang ammalli ke'nanga gandung, napasse'remi Yusuf anjo balli gandunga, nampa naboli' ri balla' karaenga.

¹⁵Ri wattunna la'busu'mo doeka ri Mesir siagang ri Kanaan, battumi tu Mesirka mae ri Yusuf nampa nakana ke'nanga, “Kisarei anne ikambe kanre! Teaki' balang parekangi mate ikambe. Cappu'mi doe'na ikambe.”

¹⁶Appialimi Yusuf angkana, “Punna la'busu'mo doe'nu, olo'-olo' piaranu nupassareang; nampako kusare apa lanukanrea.”

¹⁷Nampa napassareammo olo'-olo'na ke'nanga mae ri Yusuf. Nisaremi ri Yusuf ke'nanga apa-apa lanakanrea, iamintu napassambea jarang, gimbala', bembe, siagang keledaina ke'nanga. Anjo taunga nisarei ri Yusuf apa-apa lanakanrea ke'nanga, nampa a'bayara' ke'nanga siagang olo'-olo' piara.

¹⁸Ri taung poleanna battumi pole ke'nanga mae ri ia nampa nakana, “Nilambusiang maki' mae karaeng, angkanaya cappu'mi doe'na ikambe, nampa olo'-olo' piarana ikambe ikatte ngasemmi pata. Tenamo apa-apanna ikambe akkullea nipassareang mae ri katte, pantaranganna kalenna ikambe siagang tampa'na ikambe.

¹⁹Teaki' balang parekangi ikambe mate! Teaki' balang parekangi a'jari kalotoro' sikamma kokonna ikambe. Kiballimi anne kalenna ikambe siagang tampa'na ikambe. Gandummo kipare' pa'bayara'. Ikambe siagang tampa'na ikambe, a'jarimi karaeng pata. Kisaremi ikambe gandung untu' ansambungi tallasa'na ikambe, kammayatompa bine untu' nakioro' ri sikamma kokonna ikambe!”

²⁰Nampa naballimo Yusuf sikamma buttaya ri Mesir untu' karaenga. Sikontu tu Mesirka tarpassami nabalukang tampa'na, lanri sarrinna anjo kacipuranga. Nampa sikontu anjo tampaka ri Mesir a'jarimi karaeng pata.

²¹Sikontu ra'yaka ri Mesir a'jarimi atanna Yusuf.

²²Se're-se're mami tampa' tanaballia, iamintu tampa'na sikamma imanga. Tena naparallu ke'nanga ambalukangi tampa'na ke'nanga lanri tuli nisarena gaji ke'nanga battu ri karaenga, untu' kaparalluang katallassanna ke'nanga.

²³Nakanamo Yusuf ri anjo ra'yaka, “Cini'mi, ikau ngaseng siagang sikamma tampa'nu le'ba'mi kuballi untu' karaenga. Annemi bine akkullea nupakioro' ri kokonnu.

²⁴Punna wattu pakkattoang, musti nupassareangi bage limanna wassele'na mae ri karaenga. La'binnaya akkullei nupake untu' a'jari bine siagang untu' nukanre siagang kaluarganu.”

²⁵Appialimi ke'nanga angkana, “Kipasalama'mi anne ikambe karaeng. Appala' sukkuru'mi ikambe. Rellami anne ikambe a'jari atanna karaenga.”

²⁶Nampa napa'jarimo Yusuf anjo passalaka undang-undang ri Mesir, iamintu angkanaya bage limanna wassele' pakkattoanga musti a'jari karaeng pata. Sa'genna kamma-kamma anne nipake iji anjo undang-undanga. Ia bawang sikamma tampa'na imang-imanga tena na'jari karaeng pata.

²⁷Kammaminjo lampa-lampana nammantammo tu Israel ri Mesir, ri Daera Gosyen. A'jari kalumanynyammi ke'nanga, siagang ammana'-mana' anjoreng.

²⁸Attallasa' iji Yakub sa'genna sampulo antuju taung ri Mesir, sa'genna narapi' umuru'na a'jari sibilangngang ampatampulo taung.

²⁹ Ri wattunna la'birimmo narapi' a'jala'na, nakio'mi anjo ana'na Yusuf, nampa nakana ri ia, “Padongkoki limannu anrinni ri alla'na bonggangku, nampa assumpamako angkanaya tena nalanutarawanga' anrinni ri Mesir.

³⁰Erokka' nitarawang ri tampa'na boe-boeku; erangi mayakku battu anrinni ri pa'rasanganga nampa nueranga' mange nutarawang ri pa'jerakkanna ke'nanga.” Appialimi Yusuf angkana, “Iye', lakugaukammi antu kananta bapa'.”

³¹Nakanamo Yakub, “Assumpa mako angkana lanugaukangi.” Assumpami Yusuf, nampa appala' sukkuru'mo Yakub ri katinroanna.