Read Makassar Version – KITTA' MATANGKASA PA'JARIANG 49 Bible Online

PA'JARIANG 49 - Makassar Version – KITTA' MATANGKASA bible

PA'JARIANG 49

¹Nampa nakio'mi sikamma ana'na Yakub, nampa nakana, “A'rappungang mako anrinni, ri ampikku. Lakupauangko apa lakajarianga mae ri kalennu ri allo ri boko:

²A'rappungangko, e, ikau ana'-ana'na Yakub pilangngeri Israel, manggenu.

³Ruben, anakku toaya, ikaumi kagassingangku, rappo uruna kaporeangku. Ikau kaminang gammara' siagang kaminang gassing ri alla'na sikontu anakku.

⁴Lu'mukko ta'goccang sanrapang je'ne', sa'genna teai mako makase're; saba' attinroko siagang baine piaraku, nura'massi katinroanna manggenu.

⁵Simeon na Lewi massari'battang; sanjatana ke'nanga katerassang.

⁶Talamminawangnga' ri passitujuanna ke'nanga, kammayatompa ri pakkumpulanna ke'nanga. Saba' ammunoi ke'nanga lalang larrona, napara'bai sapi lakia untu' kasannanganna.

⁷Nitunrai kalarroanna ke'nanga, lanri sarrinna. Nitunrai kasekkekanna ke'nanga, lanri palla'na. Lakupasisa'la'-sa'laki ke'nanga ri sikontu Israel. Lakupasiaraki ke'nanga ri alla'na sikontu bansaya.

⁸Yehuda, ikau angkokkoki kacikoro'na musunnu; lanipujiko ri sikamma sari'battannu siagang su'juki ri dallekannu.

⁹ Yehuda sanrapangi singa rungka; punna le'baki ammuno, ammotereki mange ri ru'munna; anggilingi nampa attinro manna sitau tania' barani mange anronrongi.

¹⁰Yehuda lanna'gala' takkang kakaraengang. Turunganna lammarenta satunggu-tungguna. Bansa-bansaya langngerangi passare, nasu'ju' tundu' ri dallekanna.

¹¹Ana' keledaina nipaukang ri poko', poko' anggoro' mabajika. Anggoro' lanapasassa ri pakeanna, anggoro' eja sanrapang cera'.

¹²Eja matanna lanri angnginung anggoro', kebo' giginna lanri angnginung dadi'.

¹³Zebulon lammantang ri ampi' tamparang; lalabui sikamma kappalaka ri biring tamparanna; sa'genna Sidon pa'baeng-baeng daerana.

¹⁴Anjo Isakhar rapangi keledai magassing attinroa ri alla' karanjeng pattekekanna.

¹⁵Naciniki antekamma baji'na anjo tampaka antekamma ga'gana anjo pa'rasanganga, na'dundumo rella nipitekeki, na nipassa anjama a'jari ata.

¹⁶Ikau Dan, langngadeli bansanu la'jari suku sangkamma suku maraeng ri Israel.

¹⁷Ikau rapang ulara' ri biring agang, ulara' a'racung ri biring lorong, lanupittoki kacunu' jaranga natassambila tu'baena.

¹⁸O Batara, kasalamakkang Kipassareanga, iaminjo sarro kutayanga.

¹⁹Ikau Gad, lanibakkaiko ri paella', mingka ikau la'giling angngellaki ke'nanga.

²⁰Asyer, lalla'bi kanre baji'nu. Kau lassadiakangi kanrena sikamma karaenga.

²¹Naftali, sanrapang jonga lappasa', ga'ga sikalia ana'-ana'na.

²²Yusuf rapangi keledai rungka, keledai liara' ri ampi' timbuseng je'ne', lari-laria rate ri moncong.

²³A'bakka tojemmi musua, angngondangi siagang pana.

²⁴Mingka tuli kassa'na limanna, tuli jarre'na panana, lanri koasana Pakalawaki Magassing, Allata'alana Yakub, Pajagana Israel.

²⁵Allata'alana manggenu antulungko; Kaminang Koasaya ambarakkakiko siagang je'ne' bosi battu ri langi' na je'ne' battu rawa ri butta. Siagang ana' kammayatompa sapi,

²⁶gandung kammayatompa bunga. La'biangangi barakka'Na Allata'alana manggenu nakalumanynyanna bulu'-bulu' sannaka toana. Poro turungi sikamma anjo barakkaka ri tompo' ulunna Yusuf, ri tompo' abanna. Iami kaminang pore ri sikamma sari'battanna.

²⁷Benyamin, iami rapang serigala sekke'. Anjakkalaki kanrena ri bari'basa'na. Ri bangngina nabage-bagei.”

²⁸Iaminjo sampuloa anrua suku Israel, siagang kana-kana kala'busang napaua manggena ke'nanga ri wattunna nasare barakka' passibokoi massing-massing ke'nanga.

²⁹ Nampa appasammo Yakub mae ri ana'-ana'na nakana, “Sinampe' mami nakuammoterammo sangkamma boe-boeku. Tarawanga' sallang lalang ri kali'bong Makhpela ri sa'rinna ke'nanga, rayanganna Mamre ri butta Kanaan. Le'ba'mi naballi Abraham anjo kali'bonga siagang koko niaka ri tammulilina. Naballi battu ri Efron, anjo tu Het, untu' nipare' pa'jerakkang.

³¹ Anjorengi nitarawang Abraham siagang Sara, Ishak siagang Ribka. Anjoreng tommi nitarawang Lea.

³²Anjo kokoa siagang kali'bong niaka anjoreng le'ba'mi niballi battu ri tu Het. Tarawamma' anjoreng.”

³³ Le'baki Yakub appasang ri ana'-ana'na, anra'bami naung nampa mate.