Read Makassar Version – KITTA' MATANGKASA PA'JARIANG 50 Bible Online

PA'JARIANG 50 - Makassar Version – KITTA' MATANGKASA bible

PA'JARIANG 50

¹Napara'bami kalenna Yusuf naung ri kalenna manggena nampa angngarru' siagang nabau rupanna.

²Nampa naparentakang Yusuf ri pangurusu' mayaka untu' ansarei rampa-rampa anjo maya'na Yakub sollanna attahang.

³Patampulo alloi sallona jama-jamanga. Sikamma minjo sallona biasaya napake taua untu' ansarei rampa-rampa mayaka. Susa ngaseng tommi tu Mesirka untu' kamateanna Yakub, iamintu tuju allo sallona.

⁴Ri le'ba'namo wattu kasusaanga, nakanamo Yusuf ri pagawe-pagawena karaenga, “Pabattui anne pasanga mae ri karaenga angkana,

⁵ ‘Ri wattu a'reppese'namo a'jala'na manggena atanta, nasuroi a'janji atanta ri ia, angkanaya lanatarawangi atanta ilalang ri jera' le'baka napasadia ri butta Kanaan. Lanri kammana, kisaremi pangngellai atanta a'lampa untu' antarawangi manggena atanta. Le'baki anjo lammotere'mi atanta.’ ”

⁶Nakanamo karaenga, “A'lampamako mange antarawangi manggenu, sangkamma napappasangnganga ri kau.”

⁷Nampa a'lamapamo Yusuf untu' antarawangi manggena. Sikamma pagawena karaenga, tutoa-toana balla' karaenga kammayatompa sikamma tumalompona Mesir, a'lampami siagang Yusuf.

⁸Sikamma kaluargana, sikamma sari'battanna, kammayatompa sikamma bija pammanakanna maraenga a'lampa ngaseng tommi. Ana'-ana' ca'diaji bawang siagang olo'-olo' piarana ke'nanga nabokoi ri Gosyen.

⁹Pasukang akkaretaya siagang a'jaranga amminawang tommi, sa'genna sanna'mo la'buna anjo barisanga.

¹⁰Ri wattunna anrapi' ke'nanga ri tampa'na tau appatunrunga gandung, iamintu ri Goren-Haatad, irayanganna Binanga Yordan, appiraung lompomi ke'nanga napakamma si'na. Appare'mi Yusuf acara kasusaang tuju allo sallona.

¹¹Ri wattunna nacini' panduduka ri Kanaan anjo acara kasusaanga ri Goren-Haatad, nakanamo ke'nanga, “Teai sipato' appakapaccena pa'mai' anjo acara kasusaanna tu Mesirka!” Iaminjo saba'na naniaremmo anjo tampaka Abel-Mizraim.

¹²Kammaminjo nanagaukammo sikamma ana'-ana'na Yakub apa napappasangnganga mae ri ke'nanga.

¹³ Naangka'mi ke'nanga anjo maya'na mange ri Kanaan nampa natarawang lalang ri kali'bong Makhpela, irayanganna Mamre, ri koko le'baka naballi Abraham battu ri Efron, anjo tu Het, untu' nipa'jari pa'jerakkang.

¹⁴Le'baki natarawang Yusuf anjo manggena, ammotere'mi mange ri Mesir siagang sikamma sari'battanna kammayatompa sikamma tau niaka amminawang untu' mange antarawangi anjo manggena.

¹⁵Ri matenamo manggena ke'nanga, nakanamo sikamma sari'battanna Yusuf, “Antekamma ebara' angkana napammoli'-molikangki' Yusuf nampa nabalasa' anjo kaja'dallanta pirangalloang?”

¹⁶Lanri kammana, akkirimmi pasang ke'nanga mange ri Yusuf, angkana, “Ri tenanapa mamate manggeta,

¹⁷le'baki nasuro ikambe angkana ri kau, ‘Pammopporangi kasalang le'baka nagaukang anne sikamma sari'battannu mae ri kau.’ Jari, salaku atanNa Allata'ala, ia napakalompoa manggeta, napalaki ikambe ri kau nanupammopporang kasalang le'baka nagaukang ikambe mae ri kau.” Angngarru'mi Yusuf natarimana anjo pasanga.

¹⁸Nampa battumo kalenna anjo sikamma sari'battanna siagang su'ju'mi ke'nanga ri dallekanna, nampa nakana, “Ikambe anne atannu.”

¹⁹Mingka nakanamo Yusuf ri ke'nanga, “Teako mallakki; nasaba' tena kukkulle a'gau' kamma Allata'ala.

²⁰Assituju ngaseng mako a'gau' ja'dala' mae ri nakke ri pirangngalloang, mingka Napinrami Allata'ala anjo kaja'dallanga a'jari kabajikang; sollanna apa anjo kajarianga pirangalloang, a'jari jaimi tau attallasa' siagang nipasalama' kamma-kamma anne.

²¹Teako bata-batai. Lakupa'gannakkangko kaparalluannu ngaseng siagang ana'-ana'nu.” Kammaminjo, na napakasannammo Yusuf pa'mai'na ke'nanga, siagang kana-kana lamma, sa'genna dinging-dingimmo pa'mai'na ke'nanga.

²²Ammantang turusmi Yusuf ri Mesir siagang bija pammanakanna. Attallasaki sa'genna narapi' sibilangngang assampulo taung umuru'na.

²³Narapi' iji nacini' ana' cucunna Efraim. Narapi' tongngiji naparakai ana'-ana'na Makhir, iamintu cucunna Manasye, napasangkamma ana' kalenna.

²⁴Nakanamo ri sikamma sari'battanna, “A'birimmi narapi' a'jalakku, mingka mattantu laNaparakai ngasengko siagang laNapimpingko Allata'ala assulu' battu ri anne pa'rasanganga mange ri pa'rasangang le'baka Napa'janjiang siagang sumpa mae ri Abraham, Ishak siagang Yakub.”

²⁵ Nampa nasuromo Yusuf sikamma bija pammanakanna assumpa angkana, “A'janji mako ri nakke, angkanaya punna Napimpingko Allata'ala mange ri anjo pa'rasanganga, lanuerang tongi mayakku.”

²⁶Nampa matemo Yusuf ri Mesir, lalang umuru' sibilangngang assampulo taung. Nasareimi ke'nanga rampa-rampa anjo maya'na Yusuf, nampa napantama' ri patti tumatea.