Read Makassar Version – KITTA' MATANGKASA 2 SAMUEL 14 Bible Online

2 SAMUEL 14 - Makassar Version – KITTA' MATANGKASA bible

2 SAMUEL 14

¹Naassengi Yoab angkanaya sanna' nakku'na Karaeng Daud mae ri Absalom;

²lanri kammana anjo assuro allemi sitau baine porea akkala'na niaka ammantang ri Tekoa. Ri wattunna battumo anjo bainea, angkanami Yoab ri ia, “Musti assara-saraiki' kamma tau susa kamateang ibu'; ammakeki' pakeang tau susa kamateang, siagang teaki' ammakei minynya' bau'. Kipare' kammai kalenta baine salloamo angngarru' lanri matenamo tau kingaia.

³Nampa a'lampaki' mange ri karaenga siagang akkana maki'ri ia kamma anne.” Nampa napauammo Yoab apa mustia napau.

⁴Jari a'lampami anjo bainea andallekang ri karaenga, nampa su'ju' anynyomba siagang angkana, “O karaeng mala'birikku, kitulungi atanta!”

⁵Akkuta'nammi karaenga ri ia angkana, “Apa kutadeng?” Appialimi anjo bainea angkana, “Anne atanta janda kasi-asi. Matemi bura'nenna atanta.

⁶Nia' ana' bura'nena atanta rua. Ri se'reang allo a'besereki ke'nanga ri paranga. Lanri tenana tau ansa'lakki ke'nanga, matemi kalase'renna nibuno ri sari'battanna.

⁷Na kamma-kamma anne, sikontu kaluargana atanta namusui atanta siagang natuntuki atanta sollanna napassareang anjo ana'na atanta ammunoa mae ri ke'nanga, sollanna nahukkung mate ke'nanga anjo anaka, lanri le'ba'na nabuno sari'battanna. Punna napassareangi atanta anjo anaka, amantang mami atanta akkale-kale. Lanaancuruki ke'nanga se're-se'rea panrannuanna atanta. Nampa tenamo sitau ana' bura'ne untu' bura'nenna atanta ampannarrusuki jari-jarina.”

⁸Appialimi karaenga angkana, “Ammotere' mako, inakkepa angngurusuki anjo passalaka.”

⁹Nakanamo anjo bainea, “O karaeng mala'birikku, manna pole apa lanagaukang karaengku, atanta siagang kaluargana atanta tuli lantanggongi kodina anjo passalaka; ikatte karaeng siagang kaluargata tena kisala.”

¹⁰Appialimi karaenga angkana, “Punna nia' tau anggammarakko, erangi anjo taua mae ri nakke, nampa situlusu'na mattantu tenamo nalanasusaiko pole!”

¹¹Nakanamo anjo bainea, “Poro appala' doang laloki' karaeng mae ri Karaeng Allata'alata, sollanna anjo tau eroka ambalasaki kamateanna anjo ana'na atanta tena nagaukangi kaja'dallang la'bi lompoangnganga pole lanri nabunona pole ana'na atanta se'rea.” Appialimi Daud angkana, “Lanri Batara mattallasaka, anjo ana'nu tena nalaniapa-apa manna pole sike'de'.”

¹²Nampa nakanamo anjo bainea, “O, karaeng mala'birikku, poro kikellaia' a'bicara pole sike'deppi.” Appialimi karaenga angkana, “Baji'mi.”

¹³Nakanamo anjo bainea, “Battu ri kananna karaengku, mangakumi karaengku angkanaya kalenna karaengku sala lanri tenana kikellai ana' bura'nena karaengku ammotere' battu ri pa'lampanna ri pa'rasanganna taua. Angngapa nakigaukang karaeng anjo kasalang kammaya mae ri umma'Na Allata'ala?

¹⁴Ikatte lamate ngasengki'; ikatte anne rapangki' je'ne' tattumpaya naung ri buttaya siagang tenaya nakkulle nipasse're ammotere'. Manna Allata'ala tena todong nalaNapattallasa' ammotere' tau mateamo; lanri kammana anjo poro kiusahai laloi karaeng sollanna akkulle ammotere' poleang tau nipelaka.

¹⁵Andallekangi anne atanta ri katte karaeng, lanri nigammaraki atanta ri taua. Nampa appikkiri' atanta angkanaya bajikangngang a'bicarai atanta siagang ikatte karaeng, siagang manrannuangi atanta angkanaya lakiturukiangi anne pappala'na.

¹⁶Napikkiriki atanta angkanaya lakipilangngeri siagang lakipasalamaki atanta battu ri tau eroka ambunoi atanta siagang ana'na atanta. Eroki ke'nanga ampattaenai ikambe battu ri butta Napassareanga Allata'ala mae ri umma'Na.

¹⁷Tappaki atanta angkanaya anjo janjinna karaengku lanatanggongi kasalamakkanna atanta lanri ikatte rapangki' malaeka'Na Allata'ala, akkullea angngassengi apa bajika siagang apa ja'dalaka. Dasi-dasi naNarurungangki' Karaeng Allata'ala!”

¹⁸Appialimi karaenga angkana, “Nia' ero' kupakkuta'nangngang mae ri kau, pialimi siagang lambusu'na pa'mai'nu.” Appialimi anjo bainea angkana, “A'bicaramaki' karaeng.”

¹⁹Nakanamo karaenga, “Maka Yoab anne assuroko?” Appialimi anjo bainea angkana, “Lanri nyawata karaeng, tena olona atanta lakkulle alliliangi kalenna battu ri pakkuta'nanta karaeng. Kammatojengi karaeng, Yoab ampauangi atanta apa musti nagaukang siagang napau atanta.

²⁰Mingka nanagaukang anjo kammaya lanri ero'na ampakale'baki anjo parkaraya siagang baji'. Bajikki' siagang cara'dekki' karaeng sangkamma malaeka'Na Allata'ala sa'genna akkulle kiasseng sikontu apa kajarianga.”

²¹Le'baki anjo nakio'mi karaenga anjo Yoab nampa nakana ri ia, “Anjo apa nukaerokia lakugaukangi. A'lampamako mange ambuntuli Absalom siagang erammi ammotere' mae anrinni.”

²²Su'ju'mi Yoab ri dallekanna Daud, nampa nakana, “Poro Nabarakkaki laloki' Allata'ala karaeng! Kamma-kamma anne naassemmi atanta angkanaya kingai anne atanta lanri kiturukinna pappala'na atanta.”

²³Nampa a'lampamo Yoab mange ri Gesur untu' ambuntuli Absalom ammotere' mange ri Yerusalem.

²⁴Mingka tena nipa'biangi ri karaenga Absalom ammantang ri balla' kakaraenganga. Nakana karaenga, “Taeroka' anciniki.” Jari tulusu'mi Absalom ammotere' mange ri balla' kalenna, siagang tena namange andallekang ri karaenga.

²⁵Nipalecei Absalom salaku tau kaminang gammara' ri sikontu Israel. Tena tau la'bi gammarangngang naia. Battu ri pala' bangkenna sa'genna cappa' uu'na tena callanna.

²⁶Uu'na sanna' ka'ba'na, siagang musti napolongi sikali sitaung lanri battala' duduna nasa'ring. Anjo uu' napolonga la'bi rua kilo battala'na situru' timbangang niaka nipake ri karaenga.

²⁷Nia' tallu ana' bura'nena Absalom siagang sitau ana' bainena sannaka ga'gana niareng Tamar.

²⁸Ruan taummi Absalom ammantang ri Yerusalem, mingka tena le'bakapi sibuntulu' siagang karaenga.

²⁹Jari ri se'reang allo nakio'mi Yoab, ero' nasuro mange andallekang ri karaenga, mingka taerokai Yoab battu. Sikalipi pole nasuro kio' Absalom anjo Yoab, mingka tuli tenana naero' battu Yoab.

³⁰Nampa nakanamo Absalom mae ri ata-atanna, “Nuassengi kokonna Yoab ri ba'leanna kokongku nilamungia jelai? Tunui anjo kokoa.” A'lampami ke'nanga antunui.

³¹Nabattumo Yoab mange ri balla'na Absalom siagang akkuta'nang angkana, “Angngapai anjo ata-atannu nanatunui kokongku?”

³²Appialimi Absalom angkana, “Lanri tenana nuero' battu ri wattunnu kukio'. Erokka' assuroko mange andallekang ri karaenga siagang ampabattui anne pakkuta'nangku, ‘Apa matu-matunna kubokoi Gesur siagang ammotere' mae anrinni? Bajikangngang anjoremma' ammantang.’ ” Siagang nakana pole Absalom, “Usahakangi sollangku akkulle andallekang ri karaenga, siagang punna nicini' tau sala ija', sadiama' lanihukkung mate.”

³³Nampa a'lampamo Yoab mange andallekang ri Karaeng Daud siagang napabattumi pappala'na Absalom. Nakio'mi karaenga Absalom, siagang battumi Absalom su'ju' ri dallekanna karaenga. Siagang niruppaimi nibau ri karaenga.