Read Makassar Version – KITTA' MATANGKASA 2 SAMUEL 15 Bible Online

2 SAMUEL 15 - Makassar Version – KITTA' MATANGKASA bible

2 SAMUEL 15

¹Le'baki anjo appasadiami Absalom kareta pa'bundukang siagang jarang kammayatompa limampulo tau untu' anrurungangi kalenna.

²Tunggala' alloi Absalom ambangung bari'basa' nampa ammenteng ri biring aganga ri ampi'na pakke'bu' lompona balla' kakaraenganga. Tunggala' tau eroka ampabattui parkarana mae ri karaenga, nakio' kabusuki siagang nikuta'nangi ri Absalom angkana, “Battu ri suku kemaeko?” Na punna appiali anjo taua angkana, “Battu ri suku anne yareka anjo,”

³angkanami Absalom, “Situru' atorang, annabako, mingka sanna' darana katena wakkele' karaeng eroka ampilangngeri parkaranu.”

⁴Nampa nakana pole, “Coba, ebara' angkana inakke a'jari haking, sikamma tau niaka parkarana yareka tuntutanna akkullei battu mae ri nakke siagang lakubicarai anjo parkarana siagang adele'.”

⁵Punna nia' tau anreppesi Absalom untu' su'ju' anynyomba ri ia, napajonjomi limanna Absalom, nampa naraka' siagang nabau anjo taua.

⁶Kammaminjo batena Absalom mae ri sikamma tu Israel eroka ampabattui parkarana mae ri karaenga, na lanri kammana anjo nanaallemo pa'mai'na tu Israel.

⁷Allaloi patang taung, nakanamo Absalom mae ri Karaeng Daud, “Bapa', kilappassamma' a'lampa mange ri Hebron untu' anrupai janjingku mae ri Batara.

⁸Nasaba' ri wattungku nia' ija ammantang ri Gesur pa'rasangang Siria, le'baka' a'janji la'lampa assambayang mae ri Batara ri Hebron punna Nasarea' pangngellai ammotere' mange ri Yerusalem.”

⁹Appialimi karaenga angkana, “A'lampamako siagang salama'.” Nampa a'lampamo Absalom mange ri Hebron.

¹⁰Mingka rioloangannaya anjo le'ba'mi akkiring siapa are tunisuro mae ri sikontu suku Israel angngerang pasang angkana, “Punna allangngerekko sa'ra tarompe', akkio' mako angkana, ‘A'jari karaemmi Absalom ri Hebron!’ ”

¹¹Nia' ruambilangngang tau anrurungangi Absalom battu ri Yerusalem a'lampa mange ri Hebron. Tena apa-apa naasseng ke'nanga ri passala'na anjo passikongkolanga siagang amminawang turuki a'lampa ke'nanga tena ranggaselana.

¹²Nampa lalang assarena Absalom koro'bang, akkiring tommi tunisuro mange ri kota Gilo untu' angkioki Ahitofel, iamintu tumailalanna Karaeng Daud. Kammaminjo passikongkolanga napila' kassa'mo ero' angngewai karaenga, siagang pila' jaimi tau amminawang ri Absalom.

¹³Nampa nia'mo sitau angngerang kabara' siagang a'laporo' mae ri Daud angkana, “Sikamma tu Israel agang maemi ri Absalom.”

¹⁴Nampa nakanamo Daud mae ri sikontu pagawena niaka ri Yerusalem, “Umba naniallei kalenta. Tena ruanna anne cara sollanta ta'lappasa' battu ri Absalom. Tenamo nasallo nabattu. Akkaro-karoko, gassingka akkulleki' niondang siagang nibeta, sa'genna nibuno kabusu' pandudu'na kotaya.”

¹⁵Appialimi ke'nanga angkana, “Baji'mi karaeng. Sadiami ikambe untu' anggaukangi apa erotta.”

¹⁶Nampa a'lampamo karaenga nirurungang ri sikontu kaluargana siagang pagawena, pantaranganna sampuloa baine piarana naboliki untu' anjagai balla' kakaraenganga.

¹⁷Ri wattunna a'jappamo karaenga siagang sikontu parurunna ambokoi kotaya, ammantammi ke'nanga ri ampi'na balla' kala'busanga.

¹⁸Sikontu pagawena karaenga ammentengi ri sa'rinna ri wattunna a'barrisi' pangawala'na karaenga allaloi. Kammayatompa annambilangngang tantara battu ri Gat nia' todong ampinawangi, a'barrisi' ri dallekanna.

¹⁹Nacini'na anjo sikammaya nakanamo karaenga mae ri Itai pamimpinna anjo annambilangnganga tantara, “Angngapa nanumminawang todong ri kambe? Bajikangang ammotere' mako siagang ammantang mako siagang karaeng berua. Sai ikau tau battujako, bellaya battu ri pa'rasangannu?

²⁰Tenapa nusallo ammantang anrinni, angngapa nalakusuroko amminawang a'lampa a'la'bang mange-mange siagang kalengku? Inakke kalengku takuassengai angkana la'lampa kemaea'. Ammotere' mako siagang erang tommi julu bansanu, dasi-dasi naNakamaseangko Batara siagang tamamminraya mae ri kau.”

²¹Mingka appialimi Itai angkana, “O karaeng mala'birikku, lanri arenNa Batara siagang lanri nyawana karaengku, manna pole kemae lampata, tuli lamminawanna todong atanta, manna pole nalandallekang kamateang.”

²²Appialimi Daud angkana, “Baji'mi, patulusu'mi maju!” Jari a'jappami Itai siagang sikontu pasukanna siagang kaluargana ke'nanga.

²³Angngarru' lompo kabusu'mi ra'yaka ri wattunna nabokoimo pasukang-pasukanna Daud anjo kotaya. Nampa a'limbang karaenga ri pangka Binangana Kidron nipinawang ri sikontu pasukanna, nampa a'jappa ke'nanga a'lampa mange ri parang lompoa.

²⁴Nia' tongi anjoreng Imang Zadok siagang Imang Abyatar kammayatompa sikontu tu Lewi angngerangi Patti ParjanjianNa Batara. Nipadongkoki anjo Patti Parjanjianga, siagang tena naniangkaki lalang tenanapa na'lampa ngaseng sikontu ra'yaka ambokoi anjo kotaya.

²⁵Nampa nakanamo karaenga ri Zadok, “Poterangi anjo Patti Parjanjianga mae ri kotaya. Punna Nangaia' Batara, tantu Nasarea' pangngellai ammotere' siagang anciniki pole anjo Patti Parjanjianga siagang tampa' pammantanganNa.

²⁶Mingka punna tena Nangaia', lappassammi apa-apa mamo kajariang situru' ero'Na mae ri kalengku.”

²⁷Nampa nakana pole karaenga ri Zadok, “Kioki Ahimaas ana'nu siagang Yonatan ana'na Abyatar; ammotere' mako siagang sannang mae ri kotaya.

²⁸Lattayanga' ri ampi'na tampa'-tampa' pa'limbanganga ri binangaya ri parang lompoa sa'gengku anggappa kabara' battu ri kau ngaseng.”

²⁹Nampa naerammo Zadok siagang Abyatar anjo Patti Parjanjianga ammotere' mange ri Yerusalem siagang ammantammi ke'nanga anjoreng.

³⁰Le'baki anjo nasungkemi sapatuna Daud. Angngambi'mi nai' ri Bonto Zaitun siagang sikontu tumminawanna, angngarru' nabongong ulunna pammatei kasusaanna.

³¹Ri wattunna nipauang Daud angkanaya amminawang tongi Ahitofel assikongkolo' siagang Absalom, appala' doammi Daud kamma anne, “O, Batara, poro tena lalo Kipa'jari kana-kananna Ahitofel!”

³²Ri wattunna battu Daud ri coppo'na bonto tampa' biasaya napassambayangngi taua, niruppaimi ri agang tammamminrana, iamintu Husai tu Arki. Kekkeki pakeanna Husai siagang nasarei au ulunna.

³³Nakanamo Daud ri ia, “Punna amminawangko ri nakke, la'jari kabattallangko mae ri kalengku.

³⁴Mingka akkulleko antulunga' punna ammoterekko mae ri kotaya nampa nukana ri Absalom, angkanaya kamma-kamma anne erokko allayani mae ri ia siagang pa'mai' tamamminranu, sangkamma batena nulayani manggena riolo. Punna kamma anjo caranu akkullei nuhalangi kana-kana pappaunju'na Ahitofel.

³⁵Imang Zadok siagang Abyatar nia' tongi anjoreng. Pauangi ke'nanga sikontu apa nulangngereka ri balla' kakaraenganga.

³⁶Ahimaas ana'na Zadok siagang Yonatan ana'na Abyatar amminawang tongi ri manggena ke'nanga, jari nia' tongi ke'nanga anjoreng. Iaminjo ana'-anaka nusuro battu untu' ampabattui mae ri nakke sikontu kabara' nulangngereka.”

³⁷Jari ammotere'mi Husai anjo aganna Daud mange ri Yerusalem, sitabang todong battuna Absalom mange anjoreng.