Read Makassar Version – KITTA' MATANGKASA 2 SAMUEL 16 Bible Online

2 SAMUEL 16 - Makassar Version – KITTA' MATANGKASA bible

2 SAMUEL 16

¹ Ri wattu beru nalaloina Daud coppo'na anjo bontoa, ti'ring battumi Ziba atanna Mefiboset, ambuntuli siagang angngerang sipasang keledai attekeka ruambilangngang batuna roti, sibilangngang tangkenna anggoro' kalotoro' siagang sibilangngang sikko'na rappo-rappoang berua ija kammayatompa sipammoneang je'ne' anggoro'.

²Akkuta'nammi Daud ri ia angkana, “Untu' apa ngaseng anne sikammaya?” Appialimi Ziba angkana, “Anne keledai-keledaia untu' a'jari keledai paeranna kaluargata, anne rotia siagang rappo-rappoanga untu' palayang-palayanta, siagang anne je'ne' anggoroka untu' ke'nanga punna mangngangi ri parang lompoa.”

³Nampa akkuta'nammo karaenga ri ia angkana, “Kemae Mefiboset cucunna karaennu Saul?” Appialimi Ziba angkana, “Tuli nia'na ri Yerusalem, lanri tappaki angkanaya kamma-kamma anne lanapoterangi tu Israel kakaraenganna toana iamintu Saul mae ri ia.”

⁴Nampa nakanamo karaenga ri Ziba angkana, “Appakkaramula kamma-kamma anne sikontu barang-baranna Mefiboset ikau ngasemmi pata.” Appialimi Ziba angkana, “Tarima kasi karaeng. Dasi-dasi natuli sannang pa'maitta mae ri atanta karaeng!”

⁵Ri wattunna battu Daud mange ri Bahurim, nia'mo se're tau battu anjoreng ri tampaka, siagang lalang a'reppese'na mange ri rombonganna karaenga, natunrami Daud. Anjo taua niarengi Simei ana'na Gera, battu ri bija pammanakanna Saul.

⁶Nasambilaimi batu Simei anjo Daud siagang pagawe-pagawena, manna pole nanitammulili Daud ri ana' buana siagang sikamma perwira tantarana.

⁷Nitunrami ri Simei angkana, “A'lampako! A'lampako! Pabuno tau! Tau ja'dala'!

⁸Ikaumi le'ba' anrampasaki kakaraenganna Saul! Kamma-kamma anne nihukkungko ri Batara lanri jaina bija pammanakanna Saul nubuno. Napassareammi Batara kakaraengannu mae ri Absalom ana'nu. Kamma-kamma anne poro ancuru' lalo mako, he ikau pabuno tau!”

⁹Nakanamo Abisai andi'na Yoab ana'na Zeruya mae ri karaenga, “Apa saba'na nakilappassang anjo pangacoa antunraki' karaeng? Kikellaima' ansamballei kallonna!”

¹⁰Mingka Nakanamo karaenga ri Abisai siagang Yoab daenna, “Teako jampangi anjo. Lappassammi nanatunraia'. Nasaba' punna Batara ansuroi, inaika akkulle angkuta'nangi angkana angngapa nappakamma anjo?”

¹¹Nampa nakanamo pole Daud ri Abisai siagang sikontu atanna, “Ana' kalengku appattujuang ero' ambunoa'; angngapa nulannasa' ngaseng anciniki panggaukanna anne tu Benyamin? Batara ansuroi antunraia'; lanri kammana teako apa-apai siagang lappassammi nanatunraia'.

¹²Gassingka Naparhatikangi Batara anne kapa'risanga nampa Nabarakkakia' salaku sambenna anjo pattunraia.”

¹³Nampa napannarrusu' jappana Daud siagang sikamma tau niaka anrurungangi; akkaro-karomi a'jappa Simei ampinawangi ke'nanga ri bontoa na natunrai kammayatompa nasambila batu siagang butta.

¹⁴Ri wattunna battu karaenga siagang sikontu ana' buana ri Binanga Yordan, mangngang sikalimi ke'nanga; jari ammari-marimi ke'nanga anjoreng.

¹⁵Lalanna anjo wattua Absalom siagang sikontu tu Israel amminawanga ri ia antama'mi ri kota Yerusalem, siagang nia' tongi Ahitofel amminawang.

¹⁶Ri wattunna anjo Husai agang majarre'na Daud assibuntuluki Absalom, akkio'mi angkana, “Mattallasaki karaenga! Mattallasaki karaenga!”

¹⁷Mingka akkuta'nammi Absalom ri ia angkana, “Kemae pa'mai' tamamminranu mae ri sahaba'nu Daud? Angngapa natena numminawang ri ia?”

¹⁸Appialimi Husai angkana, “Antekamma olona! Inakke kualleangangi tau Napilea Batara, nipilea ri sikamma anne taua, siagang nipilea ri sikontu tu Israel. Iaminjo taua lakupinawang.

¹⁹Nampa pole, inaipi lakulayani? Sai ana' bura'nena mami karaengku? Kamma le'ba'na kulayani manggeta karaeng, kamma tomminjo lakulayaniki' karaeng ri kamma-kammana anne.”

²⁰Nampa nakanamo Absalom mae ri Ahitofel, “Paumi apa musti nigaukang.”

²¹Appialimi Ahitofel angkana, “A'lampa maki' mange ri sikamma baine piarana manggeta niaka anjagai balla' kakaraenganga, siagang sikatinroang maki' siagang ke'nanga. Lanaassengi sikontu tu Israel angkana lanri sikamma anjo apa kigaukanga, nakinipa'jari musumo ri manggeta. Jari sikontu tumminawanga mae ri katte pila' katambangi baranina.”

²² Jari, untu' Absalom nipapparekammi kema irate ri pattongko' lappara'na balla' kakaraenganga. Nampa nicini'mi ri sikontu taua antama' Absalom ri anjo kemaya nampa attinro siagang sikamma baine piarana manggena.

²³Anjo wattua sikamma kana pangngunju'na Ahitofel nipilangngeri kabusuki sangkamma angkanaya kana KalenNa Allata'ala; baji' Daud kammayatompa Absalom naturuki ngasengi kana pangngunju'na.