Read Makassar Version – KITTA' MATANGKASA 2 SAMUEL 17 Bible Online

2 SAMUEL 17 - Makassar Version – KITTA' MATANGKASA bible

2 SAMUEL 17

¹Tena nasallo le'ba'na anjo kammaya, nakanamo pole Ahitofel mae ri Absalom, “Kikellaima' ammile 12.000 jaina tau. Sinampe' punna bangngi la'lampa' angngondangi Daud.

²Lakumajui kubunduki ri wattunna mangngang siagang runtung sumanga'na. Lakupata'bangkai, sa'genna lari sikontu ana' buana. Karaeng Daud bawang lakubuno.

³Mingka sikontu ana' buana lakupoterangi mae ri karaengku, rapang bunting baine ammotere' mae ri bura'nenna. Sai se'reji bawang nyawa kikaeroki karaeng? Maraenganga tena nalaniapa-apa.”

⁴Anjo kana-kana pangngunjuka natarima bajiki Absalom siagang sikontu pamimpinna Israel.

⁵Mingka manna nakamma nakanamo Absalom, “Kamma-kamma anne kioki Husai; umba nanilangngereki antekamma panggappana.”

⁶Ri wattunna battu Husai andallekang, napauammi Absalom anjo rancanana Ahitofel, angkana, “Maka akkullei nituruki anjo kananna? Punna tena assare mako ussulu' maraeng.”

⁷Appialimi Husai angkana, “Ri kamma-kammaya anne tena nabaji' anjo kana pangngunju'na Ahitofel.

⁸Tantu kiassengi karaeng angkanaya anjo Daud siagang ana' buana sangnging pajuang barani. Pallaki ke'nanga rapang beruang tappelaka ana'na. Nampa pole anjo Daud iami tantara jai pangalamanna, tenaya nale'ba' sipa'bangngiang siagang ana' buana.

⁹Manna kamma-kamma anne kapang niaki accokko lalang ri se'reang leang yareka ri tampa' maraenga. Jari ebara' angkana nimajui ana' buata ri Daud, na nia' mate, manna pole inai allangngereki anjo kabaraka ma'nassa lanakanamo nibetami ana' buana Absalom.

¹⁰Jari manna pole tau kaminang barania siagang kaminang porea rapang singa la'jari malla' kabusu'mi. Nasaba' sikontu tu Israel naassengi angkanaya anjo manggeta sitau pahlawang, siagang anjo ana' buana sangnging pajuang gammara' na barani.

¹¹Lanri kammana anjo inakke kamma anne pappakaingakku: Pa'rappungangi sikontu tu Israel battu ri sikontu pa'rasangang, sa'genna rapang kassi' biring tamparang jaina. Nampa kalenta maju ampimpingi ke'nanga a'bundu'.

¹²Lanigappai Daud manna pole kemae pammantanganna, siagang nimajuimi a'bundu' lalang tenanapa naassengi apa kajarianga. Tena lakkulle ta'lappasa', baji' ia kalenna kammayatompa ana' buana.

¹³Punna lari antama' ri se'reang kota, sikontu ra'yatta langngallei otere' jai nampa nare'resang anjo kotaya nampa natu'gurang naung ri ka'bung kaminang a'reppeseka. Manna silisere' batu talania' ammantang irate ri anjo bontoa.”

¹⁴Nalangngere'na anjo, nakanamo Absalom siagang sikontu tu Israel, “Anjo kana pangngunju'na Husai bajikangngangi nakana pangngunju'na Ahitofel.” Memang, Batara le'ba' ampattantui laNahalangi anjo kana pangngunju' baji'na Ahitofel, sollanna nituju Absalom ri bala lompo.

¹⁵Le'baki anjo a'laporo'mi Husai mae ri Imang Zadok siagang Imang Abyatar ri passala'na kana pangngunju'na Ahitofel siagang kana pangngunju' kalenna mae ri Absalom siagang sikamma pamimpinna tu Israel.

¹⁶Nakanamo Husai, “Lintakko. Pabattuangi Daud sollanna tena na'bangngi ri tampa' pa'limbanganga ri binangaya ri parang lompoa. Musti akkaro-karoi a'limbang ri Binanga Yordan. Punna tena, laniancuruki siagang sikontu pasukanna.”

¹⁷Lalanna anjo wattua Yonatan ana'na Abyatar siagang Ahimaas ana'na Zadok sitabangi attayang ri ampi'na timbuseng je'neka ri En-Rogel, ri birinna kota Yerusalem. Tena nabarani ke'nanga antama ri kotaya lanri mallaki nicini' ri taua. Sangkamma biasaya, nia' sitau ata baine ampabattui mae ri ke'nanga punna nia' kabara' musti nilaporo' mae ri Karaeng Daud.

¹⁸Mingka anjo wattua nia' sitau ana'-ana' bura'ne sitabang anciniki ke'nanga, siagang napauangi Absalom. Jari akkaro-karomi ke'nanga a'lampa accokko ri balla'na se'reang pandudu' desana Bahurim. Ri ampi' balla'na nia' bungung siagang antama'mi ke'nanga anjoreng.

¹⁹Bainenna anjo patanna balla' naka'rangngi silawara' kaeng irateanna kali'bonna anjo bungunga nampa nasarei gandung rateanna, sa'genna tena nakacinikang anjo bungunga.

²⁰Sikamma tau nasuroa Absalom battui mange anjoreng ri ballaka nampa akkuta'nang ri anjo bainea sumpaeng angkana, “Kemae Ahimaas siagang Yonatan?” Appialimi angkana, “Silalonna ke'nanga a'limbang binanga.” Naboyami ke'nanga anjo ruaya tau rungka mingka tanagappayai ke'nanga, nampa ammotere' ke'nanga mange ri Yerusalem.

²¹Assulu'mi Ahimaas siagang Yonatan battu ri anjo bungunga, nampa akkaro-karo a'lampa mange ri Daud siagang nalaporo' ngasemmi ke'nanga sikamma apa naassenga. Nakana ke'nanga, “Napassuroangi Ahitofel untu' maju ambunduki karaenga. Jari a'lampa memang maki' kamma-kamma anne a'limbang ri anne binangaya.”

²²Nampa a'limbamo Daud siagang ana' buana ri Binanga Yordan, siagang battumi anta'le ri tenanapa nammumba alloa.

²³Ri wattunna napahang Ahitofel angkanaya tena nituruki pangngunju'na, napatabami pa'lapa' keledaina nampa ammotere' mange ri kota kalenna. Le'ba'na napasilolongang kabusu' sikontu urusanna nagentummi kalenna, nampa nitarawang ri jera' kaluargana.

²⁴Battumi Daud mange ri kota Mahanaim ri wattunna a'limbang Absalom ri Binanga Yordan, nirurungang ri tu Israel. (

²⁵Le'ba'mi naangka' Absalom tu niarenga Amasa a'jari kapala pasukang untu' ansambeangi Yoab. Anjo Amasa ana'na Yitra tu Ismael; amma'na niarengi Abigail ana'na Nahas, iamintu sari'battang bainena Zeruya amma'na Yoab.)

²⁶Akkemai Absalom siagang ana' buana ri butta Gilead.

²⁷Ri wattunna battu Daud ri Mahanaim, niruppaimi ri Sobi ana'na Nahas battu ri kota Raba ri Amon, siagang ri Makhir ana'na Amiel battu ri Lodebar, kammayatompa ri Barzilai

²⁸battu ri Rogelim ri Gilead.

²⁹Angngerangi ke'nanga mangko', pamaja', siagang kasoro' untu' Daud siagang ana' buana, kammayatompa gandung, jelai, labu', gandung nisanggara', campe' eja, campe' eja lompoa, je'ne' bani, keju, dadi' siagang pirang kayuang gimbala'. Naassengi ke'nanga angkanaya cipuruki Daud siagang ana' buana, turerei siagang mangngangi lanri pa'jappang ri parang lompoa.