Read Makassar Version – KITTA' MATANGKASA 2 SAMUEL 22 Bible Online

2 SAMUEL 22 - Makassar Version – KITTA' MATANGKASA bible

2 SAMUEL 22

¹Le'ba'namo nipasalama' Daud ri Batara battu ri Saul siagang sikontu musunna maraenga, nakelongammi Daud anne lagu kammaya mae ri Batara:

²[Mangngaia' ri Katte, o Batara, iKattemi kagassingangku.]

³Batara rapang pattahangngang makassa' a'jari tampa' pa'la'langangku. Allata'alaku rapang moncong batu, tampa' pa'la'langangku. Rapang pa'lapa' barambang antongkoka', siagang anjagaia' sollangku tuli amang.

⁴Makkioka' ri Batara siratanga nipuji, Ia allappassanga' battu ri musu-musungku.

⁵Nikurunga' ri bahaya kamateang siagang niamme ri a'ba kapanrakang.

⁶Nikurunga' ri bahaya kamateang, tado'na kamateanga niaki ri dallekangku.

⁷Lalang kasukkarrangku kumakkio' ri Batara, ma'gora ri Allata'alaku appala' tulung. Battu ri Balla'Na Nalangngereki sa'rangku na Naparhatikang pakkiokku.

⁸Nampa ta'goccang linoa siagang ta'ge'goso' lanri kalarroanNa Allata'ala!

⁹Tapporasaki umbua battu ri so'bolo' ka'murunNa, nassulu' pepeka siagang baraya battu ri bawaNa.

¹⁰Napuei langika, nampa manaung, lalang rammang sassang irawangngang bangkenNa.

¹¹A'dongko' ri malaeka' akka'nyi' anri'ba'; allayang irate ri ka'nyi'na anginga.

¹²Natongko' KalenNa siagang kasassangngang; rammang le'leng na kapala' angkulilingi KalenNa.

¹³Battu ri kila' ri dallekanNa, assulu' rammanga, bosi es siagang pepe'.

¹⁴Nampa a'gamarrung Batara battu ri allaka, Kaminang Tinggia ampappilangngerangi sa'ranNa.

¹⁵Napatembaki sikamma ana' panaNa, na Napasimbung-simbung sikamma musunNa. Appabattui ma'mole-mole kila' na Napalari kabusu' ke'nanga.

¹⁶Ammumbai dapara'na tamparanga siagang tassungke dapara'na buttaya ri wattu larroNa angga'garaki musunNa

¹⁷Battu rate Napajonjo limanNa Batara kuNata'gala' nampa Nabeso' battu lalang ri je'ne' lantang.

¹⁸Napasalamakka' battu ri musu porea siagang battu ri tau mangngabirissia ri nakke lanri ta'lalo kassa'na ke'nanga.

¹⁹Nabundukia' ri wattungku natuju bala mingka Batara a'jari pannulungku.

²⁰Ia ampata'lappasakka' battu ri bahayaya na Napasalamakka' lanri pangngellainNa mae ri nakke.

²¹Nabalasaki Batara gau' katojengangku; Nabarakkakia' lanri tenana kusala.

²²Kuturuki parentaNa Batara, na tena kuma'boko battu ri Allata'alaku.

²³Sikontu hukkunNa kuparhatikangi, tena kubalang parekangi sikamma parentaNa.

²⁴Naassengi angkanaya tena callangku na kupakabella kalengku battu ri kasalanga.

²⁵Na Nabalasa' Batara gau' tojengku lanri naassenNa angkana tena kusala.

²⁶O, Batara tena pamminraTa mae ri tu tamamminraya siagang bajikKi' mae ri tau bajika.

²⁷Kipa'nyatai kalenTa mae ri tau matangkasaka, mingka Kimusui tau ja'dalaka.

²⁸Kipasalamaki tau tuna pa'maika; mingka tau tampoa Kipadundui.

²⁹Kiparinrai kanjoliku; Nasingari Karaeng Allata'ala kasassangangku.

³⁰Kipakajarreka' untu' antumpasaki musua Nabantua' Allata'alaku anrumbangi pattahanganna ke'nanga.

³¹Sangkaki gau'Na Allata'ala, janjinNa akkullei nipatappa'! Ia rapang pa'lapa' barambang mae ri sikontu a'la'langa ri Ia.

³²Lanri Batara bawang Allata'ala; Allata'ala bawang angngalleiki'.

³³Iami Allata'ala ampakajarreka' ampa'jari amangi oloangku.

³⁴ Napakajarreki bangkengku rapang bangkeng jonga, na Najagai kasalamakkangku ri monconga.

³⁵Naajarakka' a'bundu', sa'gengku akkulle a'beso' pana kaminang kassaka.

³⁶O, Batara, iKatte alla'langia' siagang ampasalamakka', antumpakka' siagang kakoasanTa nakuammeta lanri gautTa.

³⁷Kijagaia' sollangku tanijakkalla siagang tena nakule'ba' tu'guru'.

³⁸Kuondangi musungku nampa kubeta ke'nanga siagang kutammonoka sa'genna posso' ke'nanga.

³⁹Kupatappasa' ke'nanga sa'genna takkullea ambangung poleang, anra'bai ke'nanga ri dallekang bangkengku.

⁴⁰Kisarea' kagassingang untu' a'bundu', siagang pammetang mae ri musu-musungku.

⁴¹Kipalari musungku battu ri nakke; Kipossoki sikamma tau birisika mae ri nakke.

⁴²Ammarrangi ke'nanga, mingka tena antulungi, akkioki ke'nanga ri Batara, mingka tena Nappiali.

⁴³Kuremoi ke'nanga rapang limbu'bu' tassimbunga siagang kubarrasa' rapang peo' ri aganga.

⁴⁴Kilappassanga' battu ri tau dorakaya na Kipa'jaria' tukoasa mae ri bansa-bansaya; bansa tenaya nakuassengi a'jari atangku.

⁴⁵Sikamma tu bansa maraenga tundu' kabusuki ri nakke, siagang mappilangngeri punna nalangngere' parentaku.

⁴⁶Lanynya'mi kabaranianna ke'nanga; annenremmi siagang assulu'mi ke'nanga battu ri paccokkoanna.

⁴⁷Batara mattallasaka! Nipujimi Pannulungku! Mala'biriki kalompoanNa Allata'ala Mappasalamakku!

⁴⁸Nasarea' pammetang mae ri musungku, Napadundui bansa-bansaya ri dallekangku,

⁴⁹Napasalamakka' battu ri musu-musungku. Batara, Kisarea' pammetang mae ri musungku, Kila'langia' battu ri tau pallaka.

⁵⁰ Jari kupakala'birikKi' ri alla'na bansa-bansaya, na kumakkelong kelong pammuji mae ri Katte.

⁵¹Allata'ala assarei pammetang karaeng Napilea, tuli Nakamaseangi tau Napilea, iamintu Daud siagang jari-jarina sa'genna satunggu-tungguna.