Read Makassar Version – KITTA' MATANGKASA 2 SAMUEL 3 Bible Online

2 SAMUEL 3 - Makassar Version – KITTA' MATANGKASA bible

2 SAMUEL 3

¹Anjo pa'bundukanga battu ri tumminawanga ri kaluargana Saul a'bali tau amminawanga ri Daud tena nammari-mari. Pila' kassaki Daud, nampa balinna pila' lammai.

²Ia ana'-ana' bura'nena Daud nilassukanga ri Hebron, nisusunga situru' wattu kalassukanna iaminne: Amnon. Amma'na iamintu Ahinoam, battua ri Yizreel.

³Kileab. Amma'na iamintu Abigail, jandana Nabal battua ri Karmel. Absalom. Amma'na iamintu Maakha, ana' bainena Karaeng Talmai battua ri Gesur.

⁴Adonia. Amma'na iamintu Hagit. Sefaca. Amma'na iamintu Abital.

⁵Yitram. Amma'na iamintu Egla. Anne annanga ana' bura'ne anjorengi ri Hebron nilassukang.

⁶Lalang tuli nigaukanna pa'bundukanga iamintu tumminawanga ri Daud a'bali tumminawanga ri kaluargana Saul, tuli nausahakammi Abner sollanna pila' jai tau napangarui battu ri tumminawanga ri Saul.

⁷Ri se'reang allo, Isyboset, iamintu ana' bura'nena Saul, natudui Abner assikatinroang siagang baine piarana Saul iamintu niarenga Rizpa ana'na Aya.

⁸Na'jari sanna'mo larrona Abner napakamma, siagang nakanamo, “Apa kikananga' karaeng a'bali' ballang mae ri Saul siagang agang mange ri tu Yehuda? Battu rioloji natena pamminrana nyawaku mae ri Saul manggena karaengku, siagang mae ri bija pammanakanna kammayatompa mae ri agang-aganna ngaseng. Le'ba'mi kutulung karaengku sa'genna takkulleaki' nibeta ri Daud. Mingka manna nakamma kihinaja' lanri passabakkang baineji bawang.

⁹ Bajikangngang Daud kutulung, la'biangampa lanri le'ba'na a'janji Batara mae ri ia laNaalle anne kakaraenganga battu ri Saul siagang jari-jarina, nampa Naangka' Daud a'jari karaeng mae ri sikontu tu Israel siagang tu Yehuda. Dasi-dasi naNabunoa' Allata'ala, punna tena nakugaukangi janjinNa Allata'ala mae ri anjo Daud!”

¹¹Takkulleai appiali Isyboset manna silappa kana, lanri malla'na ri Abner.

¹²Nampa akkirimmi Abner tunisuro mange ri Daud niaka ri Hebron anjo wattua. Angngerangi pasang angkana, “Inai langkoasai anne buttaya? Appare'mako parjanjiang siagang inakke nampa lakubantu karaengku sollanna sikontu bansa Israel asse're kabusu' mae ri karaengku!”

¹³Appialimi Daud angkana, “Baji'mi. Pabattui anne pasangku mae ri Abner angkanaya: Erokka' appare' parjanjiang siagang ikau, mingka nia' se're sara': Mikhal, ana' bainena Saul, musti nuerangi mae ri nakke punna battuko andallekang mae ri nakke.”

¹⁴ Le'baki anjo akkiring tommi Daud tunisuro mange ri Isyboset, angngerang pasang angkana, “Kipoterangi Mikhal, bainengku, mae ri nakke. Kale'ba'mi kuballi sibilangngang bi'bi' ulunna tu Filistin.”

¹⁵Jari nasuromi Isyboset tunisurona angngallei Mikhal battu ri bura'nenna, iamintu Paltiel ana'na Lais.

¹⁶Mingka tuli amminawanna Paltiel angngarru' ampinawangi Mikhal. Ri wattunna battu ke'nanga mange ri kota Bahurim, nakanamo Abner ri ia, “Sudamo, ammotere' lalo mako.” Jari ammotere'mi Paltiel.

¹⁷Ilalang kammana anjo assipa'bicarami Abner siagang sikamma pamimping-pamimpinna tu Israel na nakana, “Sallo ngaseng mako ero' ampa'jari Daud karaennu.

¹⁸Jari iaminne kasampatang mae ri kau. U'rangi angkanaya le'ba'mi a'janji Batara mae ri Daud, angkanaya eroki Napake Daud untu' ampasalamaki umma'Na Israel battu ri tu Filistin siagang battu ri sikontu musunna maraenganga.”

¹⁹Assipa'bicara tommi Abner siagang tu Benyamin, siagang a'lampa tommi mange ri Hebron untu' ampauangi Daud anjo apa le'baka nasitujui tu Benyamin siagang tu Israel.

²⁰Ri wattunna andallekang Abner siagang ruampulo ana' buana ri Daud ri Hebron, appare'mi passua'-suarrang Daud untu' ke'nanga.

²¹Le'baki anjo appala'kanami Abner siagang angkana, “Kilappassamma' a'lampa untu' ampagioki sikontu tu Israel sollanna asse're ke'nanga siagang karaengku. Lanatarimaki' ke'nanga a'jari karaeng, na lanri kammana na karaengku lammarenta mae ri sikontu pa'rasanganga, situru' ero'na karaengku.” Nampa nilappassammo Abner a'lampa ri Daud siagang nitanggongi kasalamakkanna.

²²A'lampanamo Abner, ammotereki Yoab siagang ana' buana Daud maraenganga battu ri pa'bundukanga siagang jai naerang ke'nanga barang-barang nirampasa' lalang pa'bundukanga.

²³Nipauangi Yoab angkanaya le'baki battu Abner andallekang ri Karaeng Daud siagang nilappassammi a'lampa na nitanggongi kasalamakkanna.

²⁴Na mangemo Yoab andallekang ri karaenga siagang angkana, “Antekamma anjo apa kigaukanga karaeng? Battui Abner andallekang ri karaengku. Angngapa nakilappassang a'lampa bawang-bawang?

²⁵Ma'nassana kiasseng karaeng angkanaya anjo kabattuanna Abner poro ero'naji antipuki' karaeng, siagang lanri ero'naja naasseng kaadaanta kammayatompa sikontu rancanata.”

²⁶Nabokoina Daud, akkirimmi Yoab siapa are tunisuro mange angkioki Abner. Napinawammi ke'nanga Abner sa'genna anrapi' mange ri ampi'na bungung Sira, nampa naerang ke'nanga ammotere' Abner. Yangasenna anjo apa kajarianga tanaassengai Daud.

²⁷Tena nasallo battuna Abner mange ri Hebron, nikio'mi ri Yoab mae ri sa'ri, mae ri ampi'na pakke'bu' lompoa, sangkamma angkanaya nia' rahasia lanabicara. Ti'ring natobo'mi Yoab parru'na Abner sa'genna mate. Kammaminjo namatemo Abner nibuno ri Yoab untu' ambalasaki pammunoanna Abner ri andi'na Yoab iamintu Asael.

²⁸Nalangngere'na Daud anjo passalaka, nakanamo, “Naassengi Batara angkanaya inakke siagang ra'yakku tena sikali nasala lalang ri anjo pammunoanga mae ri Abner.

²⁹Lappassammi Yoab siagang sikontu kaluargana nihukkung lanri anjo panggaukanna. Dasi-dasi na lalang ri kaluargana Yoab siagang jari-jarina tuli nia'na tau garring sala, yareka bura'ne tenaya kagassinganna, yareka kakurangangi ri kanre-kanreang!”

³⁰Kammaminjo Yoab siagang Abisai andi'na, ambalasaki mae ri Abner lanri le'ba'na Abner ambunoi andi'na ke'nanga iamintu Asael lalang pa'bundukang ri Gibeon.

³¹Nampa naparentakang Daud mae ri Yoab siagang ana' buana sollanna nakekke' pakeanna ke'nanga, siagang ammake kaeng tanra kasusaang kamateang kammayatompa nanakarruki Abner. Siagang ri wattunna niantara' mayaka, kalenna Karaeng Daud a'jappa ri bokona patti tumatea.

³²Anjorengi ri Hebron nitarawang Abner, nampa karaenga siagang sikontu ra'yaka angngarru' lompoi ri dallekanna anjo jeraka.

³³Le'baki anjo angngarru'mi Daud lanri Abner, nakana,

³⁴“Maka musti matei Abner a'jari tau tolo: tena natassikko' limanna, na bangkenna tena narimpungi? Mate nitoboki ri tau ja'dalaka siagang tau pallaka.” Nampa angngarru' sikontu ra'yaka pila' lompo sa'ranna angkarruki Abner.

³⁵Sikabusu'na alloa taua anynyonyoki Daud sollanna angnganre sike'de', mingka assumpai angkana, “Poro Nabuno laloa' Allata'ala punna angnganrea' lalang tenanapa nalabu alloa!”

³⁶Nalangngere'na anjo kammaya, sannammi pa'mai'na ra'yaka. Memang, apa-apa mamo nagaukang Karaeng Daud, tuli napa'jari sannangi pa'mai'na ra'yaka.

³⁷Anjo alloa sikontu ra'ya'na Daud siagang sikontu bansa Israel napahangi angkanaya tena nakellai karaenga nibuno Abner.

³⁸Nakana karaenga mae ri sikamma tumminawanna, “Tanuassengakai angkanaya anne alloa nia' sitau pamimping lompo ri Israel mate?

³⁹Manna inakke anne nipilea' ri Allata'ala a'jari karaeng, mingka kamma-kamma anne tena kusa'ring kagassingangku. Anjo ana'-ana'na Zeruya teai sipato' palla'na. Takukulleai kukoasai ke'nanga. Dasi-dasi nanihukkung ri Karaeng Allata'ala anjo ke'nanga tau ja'dalaka, situru' panggaukanna ke'nanga.”