Read Makassar Version – KITTA' MATANGKASA 2 SAMUEL 8 Bible Online

2 SAMUEL 8 - Makassar Version – KITTA' MATANGKASA bible

2 SAMUEL 8

¹Siapa are sallona ribokoanganna Karaeng Daud nabundukimi pole tu Filistin. Nabetami ke'nanga siagang naallemi buttana ke'nanga.

²Nabeta tommi Daud tu Moab. Nasuroi ke'nanga attinro ri buttaya, nampa nabuno ta'rua lalang tattallua tau. Jari, tundu'mi tu Moab mae ri Daud siagang a'bayara'mi passare ke'nanga mae ri ia.

³Nampa nabeta Daud Karaeng Hadadezer ana'na Rehobot ammarentaya ri Zoba, iamintu se're kakaraengang ri ampi'na kota Damsyik. Anjo wattua sitabangi lalang jappana Hadadezer ero' ampakajarreki ammotere' kakoasanna mae ri daera niaka ri ampi'na ulunna Binanga Efrat.

⁴Natahangi Daud nia' 1.700 tau tantara a'jarang siagang 20.000 tau tantara a'jappa bangkeng. Napesoki kabusu'mi sikontu jaranga, pantaranganna siapa are jaina, anggannaka untu' sibilangngang kareta pa'bundukang.

⁵Tu Siria battua ri Damsyik akkiringi tantara untu' ambantui Karaeng Hadadezer. Mingka nabetai Daud ke'nanga siagang nabunoi nia' 22.000 jaina tau battu ri ke'nanga.

⁶Nampa ambangung Daud pakkemaang-pakkemaang tantara lalang ri daerana ke'nanga, siagang tundu'mi ke'nanga kammayatompa a'bayara' passare mae ri ia. Nisarei Daud ri Batara pammetang manna pole kemae napa'bunduki.

⁷Sikamma pa'lapa' barambang bulaeng napakea tantarana Hadadezer nirampasaki ri Daud nampa naerang mange ri Yerusalem.

⁸Pantaranganna anjo jai sikali todong tambaga naalle Daud battu ri Betah siagang Berotai, iamintu kota-kota nakoasaia Hadadezer riolo.

⁹Karaeng Tou battu ri Hamat nalangngereki angkanaya le'ba'mi nabeta Daud sikontu tantarana Hadadezer.

¹⁰Jari nakirimmi ana' bura'nena niarenga Yoram untu' ampabattui sallanna mae ri Karaeng Daud siagang appabattu salama' lanri anjo pammetanna; lanri anjo Karaeng Hadadezer masarroi a'bundu' siagang Tou. Battui Yoram mange ri Daud siagang angngerangi hadia ga'ga iamintu bulaeng, pera' siagang tambaga.

¹¹Napassareang kabusuki Daud anjo sikontu hadiaya mae ri Batara untu' nipake lalang ri upacara sambayanga. Kammatommi anjo nagaukangi sikamma barang-barang bulaenga siagang pera' le'baka narampasa' battu ri Hadadezer siagang bansa-bansa nabetaya, iamintu bansa Edom, Moab, Filistin siagang Amalek.

¹³ A'jari pila' katambammi masahoro'na arenna Daud ri wattunna ammotere' siagang le'ba'na nabuno tu Edom 18.000 jaina ri Ka'bung Asin.

¹⁴Ambangummi pakkemaang-pakkemaang tantara ri sikontu Edom, na anjo sikontu tu Edom tundu'mi mae ri ia. Nisarei Daud pammetang ri Batara manna pole kemae napa'bunduki.

¹⁵Kammaminjo batena Daud ammarenta ri sikontu Israel siagang najagai sollanna nigau' adele' siagang baji' ra'yaka.

¹⁶Iaminne areng-arenna sikamma tau tinggia pangka'na naangkaka Daud: Panglimana tantaraya iamintu Yoab ana'na Zeruya; Jurutulisi'na balla' kakaraenganga: Yosafat ana'na Ahilud; Imang-imanga: Zadok ana'na Ahitub siagang Ahimelekh ana'na Abyatar; Jurutulisi'na pa'rasanganga: Seraya

¹⁸Kapala pangawala' kalenna karaenga: Benaya ana'na Yoyada; Imang-imang balla' kakaraenganga: ana'-ana' bura'nena Daud.