Read Makassar Version – KITTA' MATANGKASA 1 KARAENG-KARAENG 2 Bible Online

1 KARAENG-KARAENG 2 - Makassar Version – KITTA' MATANGKASA bible

1 KARAENG-KARAENG 2

¹Ambaninamo narapi' a'jala'na Daud, nakio'mi Salomo, ana' bura'nena, nampa nasare pappasang-pappasang kala'busang. Nakana Daud,

²“Narapi'mi wattungku lamate. Paralluko tappa' siagang barani.

³Gaukangi apa Naparentakanga Karaeng Allata'alanu mae ri kau. Turuki sikontu hukkung-hukkunNa siagang parenta-parentaNa ia tattulisika lalang Kitta' Musa, sollanna manna kemae lampanu la'wasselekko lalang sikontu usahanu.

⁴Punna mannurukiko ri Batara, laNarupai janjinNa angkanaya turungangku lammarenta ri Israel, assala' tuli majarreki mannuruki ri sikontu parenta-parentaNa siagang situlusu'na atinna siagang nyawana ke'nanga.

⁵ Nia' pole se're passala'! Tantu nuu'rangi apa le'baka nagaukang Yoab mae ri nakke nabunona rua perwira tantarana Israel, iamintu Abner ana'na Ner siagang Amasa ana'na Yeter. Nabunoi ke'nanga ri wattu amanna taua untu' ambalasaki pammunoang le'baka nagaukang ke'nanga ri wattu a'bundu'na taua. Nabunoi tau tenaya salanna, mingka kamma-kamma anne inakkemi antanggongi panggaukanna siagang inakkemi sessa.

⁶Jari, anakku, musti appanggaukangko mae ri ia situru' apa nukanaya baji'. Mingka teako lappassangi mate biasa.

⁷ Mingka mae ri ana'-ana' bura'nena Barzilai battu ri Gilead paralluko appanggaukang baji'. Musti nutanggongi kaparalluang allo-allona ke'nanga, nasaba' le'ba'mi ampanggaukang baji' ke'nanga mae ri nakke ri wattungku lari battu ri daennu iami antu Abasalom.

⁸ Ri passala'na Simei ana'na Gera battu ri kota Bahurim ri daera Benyamin, nia' todong pasangku mae ri kau. Lalang a'jappaku mange ri Mahanaim, iaminjo Simei pirangalloang sanna' palla'na ampakkanaia' siagang antunra'. Mingka ri boko, ri wattunna battu anruppaia' ri Binanga Yordan, assumpama' mae ri ia lanri Batara angkanaya tena nalakubunoi.

⁹Mingka iaminne pasangku ri kau: teako lappassangi ta'lappasa' battu ri hukkunganga. Kuassengi angkanaya ikau baji' pa'maikko. Jari, manna pole natoamo, usahakangi na nihukkung mate.”

¹⁰Nampa matemo Daud, na nitarawang ri Kota Daud.

¹¹ Patampulo taungi a'jari karaeng ri Israel: tuju taungi ammantang ri Hebron, na tallumpulo antallu taung ri Yerusalem.

¹² Nampa Salomo a'jari karaeng, ansambeangi Daud manggena. Teai sipato' kassa'na kakoasanna Salomo salaku karaeng.

¹³Ri se'reang allo, a'lampai Adonia mange ri Batsyeba. Akkuta'nammi Batsyeba ri Adonia angkana, “Apa anne kabattuannu untu' kabajikang?”

¹⁴Appialimi Adonia angkana, “Iye'. Nia' ero' kupala' battu ri katte ibu'.” Akkuta'nammi Batsyeba angkana, “Apa?”

¹⁵Appialimi Adonia angkana, “Kiassengi ibu' angkanaya mustina inakkeji a'jari karaeng. Iaminjo naminasai sikontu Israel. Mingka ia kajarianga ta'bale'mi. Andikku a'jari karaeng, lanri kammai anjo Nakaerokia Batara.

¹⁶Kamma-kamma anne nia' pappalakku, poro tena laloja kitea.”

¹⁷ Akkuta'nammi Batsyeba angkana, “Apa pappala'nu?” Appialimi Adonia angkana, “Kupalaki ri ibu' nakiero' ampalakkanga' pangngellai ri Karaeng Salomo untu' ambuntingi Abisag, anjo tulolo battua ri Sunem. Tappaka' angkanaya tena nalanatea anturuki pappalatta.”

¹⁸Appialimi Batsyeba angkana, “Iyo baji'mi. Lakubicarakangi anne siagang karaenga untu' ikau.”

¹⁹Jari a'lampami Batsyeba mange ri karaenga untu' ambicarakangi anjo passalaka untu' Adonia. Ammentemmi karaenga anruppai amma'na siagang assu'ju' mae ri ia. Nampa ammempo pole irate ri empoang kakaraenganna. Nampa nasuro taua appasadia kadera ri sa'ri kananna untu' amma'na.

²⁰Ammemponamo, nakanamo Batsyeba, “Nia' ero' kupala' sike'de' battu ri kau. Kuminasai natenaja nutea.” Akkuta'nammi Salomo angkana, “Apa kutadeng amma'? Tena kulatea.”

²¹Appialimi Batsyeba angkana, “Kellaimi Adonia daennu, ambuntingi Abisag.”

²²Akkuta'nammi Salomo angkana, “Angngapa nakipala' anjo ri nakke amma'? Anjo sangkamma le'ba'ji angkanaya kipalaki sollanna kupassareang anne empoang kakaraenganga ri ia. Sai ia daengku? Nampa pole Imang Abyatar siagang Yoab ammenteng maei ke'nanga ri ia!”

²³Le'baki akkana kamma anjo, assumpami Salomo lanri Batara angkana, “Lappassamma' Natunra Batara, punna tena nakuhukkung matei Adonia lanri anjo pappala'na!

²⁴Le'ba'mi Napakajarre' Batara empoangku ri empoanna manggeku Daud. Le'ba'mi Narupai janjinNa siagang le'ba'mi Napassareang anne kakaraenganga mae ri nakke siagang turungangku. Assumpa' lanri Batara attallasaka angkanaya lamatei Adonia ia memang anne alloa!”

²⁵Jari naparentakammi Karaeng Salomo mae ri Benaya, nampa a'lampamo Benaya mange ambunoi Adonia.

²⁶ Nampa nakanamo Karaeng Salomo ri Imang Abyatar, “A'lampamako mange ri kamponnu ri Anatot. Siratangko nihukkung mate, mingka anne alloa tena kulammuno, lanri siagannu ija manggeku, amminawang tongko angkasiaki sikontu kapa'risanna. Siagang nuurusu' tongi Patti ParjanjianNa Batara.”

²⁷ Nampa nasuromo Salomo ammari a'jari imang anjo Abyatar. Lanri nagaukanna Salomo anjo kammaya, a'buttimi apa le'baka Napau Batara ri Silo ri passala'na turunganna Imang Eli.

²⁸Nalangngere'mi Yoab yangasenna anjo kajarianga. A'jari malla'mi lanri ammenteng maei ri Adonia. Mingka, riolo tena nammenteng mae ri Absalom. Jari larimi mange ri KemaNa Batara anta'galaki cappa'-cappa'na tampa' pakkoro'bangnganga.

²⁹Nipabattumi anne kabaraka mange ri Karaeng Salomo. Jari nasuromi karaenga a'lampa Benaya mange ambunoi Yoab.

³⁰A'lampai Benaya mange ri KemaNa Karaeng Allata'ala siagang nakana ri Yoab, “Nasuroko karaenga assulu' battu antureng!” Appialimi Yoab angkana, “Tena, erokka' mate anrinni.” Ammotere'mi Benaya allaporoki anjo mae ri karaenga.

³¹Nalangngere'na karaenga anjo, nakanamo, “A'lampamako siagang gaukammi anjo apa napaua. Bunoi siagang tarawangi, sollanna inakke siagang turunganna manggeku tenamo nakutanggong jawa' mae ri pammunoang nagaukanga Yoab mae ri tau tenaya salana pirangalloang.

³²Lanihukkungi ri Batara lanri pammunoang le'baka nagaukang nampa tanaassenga manggeku. Abner, perwira tantarana Israel, siagang Amasa perwira tantarana Yehuda, rua-rua tena salana. Bajikangngangi ke'nanga na kalenna Yoab, mingka nabunoi ke'nanga.

³³Hukkungang lanri kamateanna anjo ruaya perwira lanatanggongi Yoab siagang turunganna sa'genna satunggu-tungguna. Mingka sikontu turunganna manggeku a'jari karaenga, tuli lanibarakkaki ri Batara — laupaki ke'nanga.”

³⁴Jari a'lampami Benaya mange ri KemaNa Batara nampa nabuno Yoab anjoreng. Natarawammi Yoab ri balla'na ri pantarang kota.

³⁵Nampa niangka'mo Benaya ri karaenga a'jari panglimana tantaraya ansambeangi Yoab, na Zadok niangka' a'jari imang ansambeangi Abyatar.

³⁶Le'baki anjo nakio'mi karaenga Simei nampa nakana ri ia, “Apparekko balla' untu' kalennu anrinni ri Yerusalem. Ammantang mako anjoreng siagang teako assuluki battu ri kotaya.

³⁷Punna baraniko assulu' siagang a'lampa allaloi pangkana Binanga Kidron, musti nibunoko. Nampa kalennu tonji antanggongi anjo kasalannu.”

³⁸Appialimi Simei angkana, “Baji'mi, karaeng mala'biri'. Lakuturuki antu parentata.” Jari ammantammi Simei ri Yerusalem.

³⁹Narapiki tallun taung kajariammi anne: Nia' rua atanna Simei lari mange ri Gat, mange ri Karaeng Akhis ana' bura'nena Maakha. Nipauanna Simei anjo passalaka,

⁴⁰napatabami pa'lapa' keledaina nampa a'lampa mange ri Karaeng Akhis ri Gat untu' amboyai anjo ruaya atanna. Nabuntulu'mi ke'nanga nampa naerang ammotere'.

⁴¹Nalangngere'na Salomo anjo apa le'baka nagaukang Simei,

⁴²nasuro kio'mi Simei nampa nakana, “Le'ba' mako kusuro a'janji lanri Batara angkanaya tena nalanubokoi Yerusalem. Na le'ba' tommako kupakainga' angkanaya punna assulukko battu ri Yerusalem, musti mateko. Jari, le'ba' mako a'janji siagang situju untu' anturuki parentaku.

⁴³Mingka kamma-kamma anne angngapa nanukaluppai anjo janjinnu siagang nudakkai parentaku?

⁴⁴Baji' nuassenna sikontu kaja'dallannu mae ri manggeku. Lanri kammana minjo na laNahukkungko Batara,

⁴⁵mingka inakke laNabarakkakia' siagang kakaraenganna manggeku laNapakajarreki sa'genna satunggu-tungguna.”

⁴⁶Le'baki akkana kamma, naparentakammi karaenga mae ri Benaya nampa a'lampa Benaya mange ambunoi Simei. Kamma-kamma anne koasami ri sikabusu'na lalang kakaraenganna.