Read Makassar Version – KITTA' MATANGKASA 1 KARAENG-KARAENG 9 Bible Online

1 KARAENG-KARAENG 9 - Makassar Version – KITTA' MATANGKASA bible

1 KARAENG-KARAENG 9

¹Le'baki nabangung Salomo Balla'Na Batara siagang balla' kakaraenganga kammayatompa sikontu apa le'baka narancana,

² Napappicikammi pole KalenNa Batara ri ia, sangkamma le'baka kajariang ri Gibeon.

³Nakanamo Batara ri ia, “Kulangngere'mi pappala' doannu, siagang kamma-kamma anne Kupaumi angkanaya anne balla' le'baka nubangung Kupa'jarimi tampa' matangkasa' untu' passambayangannu mae ri Nakke satunggu-tungguna.

⁴Punna anynyombako ri Nakke situlusu'na pa'mai'nu siagang malambusu' pa'mai' sangkamma manggenu Daud, siagang nuturuki hukkung-hukkungKu kammayatompa parenta-parentaKu,

⁵ laKurupai janjingKu mae ri manggenu Daud, angkanaya ana' cucunna situlusu'na tuli lammarentai ri Israel.

⁶Mingka punna ikau yareka turungannu nubokoiA' siagang tena numannuruki ri hukkung-hukkungKu siagang parenta-parentaKu, kammayatompa anynyombako ri rewata-rewata maraenga,

⁷laKubongkai ummakKu Israel battu ri pa'rasangang le'baka Kupassareang mae ri ke'nanga. LaKubokoi tongi anne balla' le'baka Kupattantu untu' a'jari tampa' passambayangannu mae ri Nakke. Kemae-kemae bansa Israel lanihina siagang lanikakkali.

⁸ Anne balla' passambayanganga la'jari se're pa'gompoang batu-batu ta'bongkara', sa'genna sikamma tau ammaloa anjoreng lata'bangka ngasengi siagang a'jari sannaki malla'na anciniki. Lanakana ke'nanga, ‘Angngapa Napakammai anne Batara anne pa'rasanganga siagang anne ballaka?’

⁹Nampa lappialimi taua angkana, ‘Lanri nibokoi ke'nanga ri Batara, Allata'alana ke'nanga, Ia le'baka anrurungangi boe-boena ke'nanga battu ri Mesir. Anynyombai ke'nanga ri rewata-rewata maraenga. Iaminjo saba'na na Napabattumo Batara anne balaya mae ri ke'nanga.’ ”

¹⁰Ruampulo taungi wattu napake Salomo ambangungi Balla'Na Batara siagang balla' kakaraenganga.

¹¹Sikontu kayu camara Libanon siagang kayu camara biasa kammayatompa bulaeng naparalluanga Salomo untu' ambangungi anjo ballaka nisareang ngasengi ri Karaeng Hiram. Ri le'ba'namo anjo jama-jamanga nisaremi Karaeng Hiram ri Karaeng Salomo ruampulo kota ri daera Galilea.

¹²Jari a'lampami Hiram mange anciniki, mingka tena nasannang ri anjo nisareangiai.

¹³Nakanamo ri Salomo, “Sari'battangku, kammaika anne tanja'na kota-kota nupassareanga ri nakke?” Iaminjo saba'na nanikana anjo daeraya Kabul.

¹⁴La'bi 4.000 kilo battala'na bulaeng le'ba' nakiring Hiram mae ri Salomo.

¹⁵Karaeng Salomo ammakei cara ammassa untu' ansuroi taua ambangungi Balla'Na Batara, balla' kakaraenganga, tembo'na Yerusalem, siagang untu' antambungi butta niaka ri bageang timboranna Balla'Na Karaeng Allata'ala. Kamma tomminjo carana untu' ambangungi ammotere' kota Hazor, Megido, siagang Gezer. (

¹⁶Kota Gezer iamintu kota le'baka riolo nibunduki siagang nibeta ri karaeng Mesir, nampa nabuno pandudu'na na natunu kotana. Nampa ri boko anjo kotaya napassareangi karaeng Mesir mae ri ana' bainena salaku hadia ri allo pa'nikanna siagang Salomo.

¹⁷Nampa Salomo ambangungi ammotere' anjo kotaya.) Napajama passa tongi taua Salomo ambangungi ammotere' Bet-Horon-Hilir,

¹⁸Baalat, Tamar ri parang lompona Yehuda,

¹⁹kota-kota parsadiaanga, siagang kota-kota pammantanganna kareta pa'bundukanga siagang jaranna. Sikontu rancana pambangunanga ri Yerusalem, Libanon, siagang ri sikontu daera kakoasanna le'ba' ngasemmi najama.

²⁰Untu' anjo anjama passaya, napagioki Salomo turunganna tu Amori, tu Het, tu Feris, tu Hewi siagang tu Yebus. Ia ke'nanga turungang bansa Kanaan tenaya nakkulle napila'busi nabuno tu Israel ri wattunna naempoi ke'nanga anjo pa'rasanganga. Sa'genna kamma-kamma anne turunganna ke'nanga tuli a'jari ata iji.

²²Tu Israelka tena napa'jari atai Salomo. Nasarei tugasa' ke'nanga a'jari tantara, perwira tantara, panglima, komandang kareta pa'bundukang, siagang tantara pasukang a'jarang.

²³Nia' 550 pagawe nasare tanggong jawa' untu' angngawasi anjo tau anjama passaya ilalang a'rupa-rupa usaha pambangunang napareka Salomo.

²⁴Butta niaka ri bageang timboranna Balla'Na Batara nasuro tambungi Salomo ri wattunna a'lette'mo bainenna, iamintu ana' bainena karaeng Mesir, battu ri Kota Daud mange ri balla' kakaraengang nabangunga Salomo untu' ia.

²⁵ Pintallungi sitaung Salomo assare koro'bang nitunu siagang koro'bang pappasiamakkang irate ri tampa' pakkoro'bangngang le'baka napaenteng untu' Batara. Attunu tommi dupa untu' Batara. Kammaminjo napa'le'ba'na Salomo pambangunanna Balla'Na Batara.

²⁶Untu' tantarana ri tamparanga, appareki Salomo kappala'-kappala' ri Ezion-Geber, ri ampi'na Elot ri biring Tamparang Teluk Akaba, daera Edom.

²⁷Nakiringi Karaeng Hiram ana'-ana' kappala'na ia niaka pangalamanna untu' assombala' siagang ana'-ana' kappala'na Salomo.

²⁸Le'baki ke'nanga assombala' mange ri pa'rasangang Ofir untu' angngalle 14.000 kilo battala'na bulaeng nampa naerang mange ri Salomo.