Read Makassar Version – KITTA' MATANGKASA 2 KARAENG-KARAENG 13 Bible Online

2 KARAENG-KARAENG 13 - Makassar Version – KITTA' MATANGKASA bible

2 KARAENG-KARAENG 13

¹Ri taung makaruampulo antallu ammarentana Yoas ana'na Ahazia ri Yehuda, iaminjo wattua na'jari Karaeng Yoahas ana'na Yehu ri Israel, siagang ammarentai ri Samaria sampulo antuju taung sallona.

²Sangkamma Karaeng Yerobeam ammarentaya rioloanganna, doraka tongi Yoahas mae ri Batara siagang a'jari passabakkang tongi nadoraka tu Israel. Tena nale'ba' nabokoi sikamma panggaukang ja'dala'na.

³Lanri kammana anjo larromi Batara mae ri tu Israel sa'genna nalappassang Hazael karaeng Siria siagang Benhadad ana'na, a'mole-mole ambetai tu Israel.

⁴Nampa appala' doang Yoahas mae ri Batara, na Nalangngere'mo Batara anjo pappala' doanna, lanri nacini'na antekamma palla'na karaeng Siria anjallakkangi tu Israel.

⁵Napassareammi Batara mae ri tu Israel sitau pamimping untu' allappassangi ke'nanga battu ri kakoasanna Siria sa'genna a'jari sannammo ammotere' katallassanna ke'nanga sangkamma riolo.

⁶Mingka manna nakamma tena tongija nammari tu Israel anggaukangi dosa-dosa appakkaramulaya nagaukang Karaeng Yerobeam. Tulusu' nagaukanna ke'nanga anjo dosa-dosaya, siagang nalappassang patunna Dewi Asyera ammantang tuli ri Samaria.

⁷Le'ba'mi niancuru' tantarana tu Israel ri karaeng Siria sa'genna ia niaka nakammai Yoahas iamintu 50 tantara a'jarang, 10 kareta bundu', siagang 10.000 tantara.

⁸Pau-pau maraengannaya ri passala'na Karaeng Yoahas siagang sikontu jasa kabaranianna niaki nicata' lalang ri kitta' Riwaya'na sikamma karaeng Israel.

⁹Anjorengi ri Samaria mate siagang nitarawang. Ana'na niarenga Yoas ansambeangi a'jari karaeng.

¹⁰Ri taung makatallumpulo antuju ammarentana Karaeng Yoas ri Yehuda, iaminjo wattua na'jari karaeng siagang ammarenta Yoas ri tu Israel siagang ammarentai 16 taung sallona.

¹¹Ia doraka tongi mae ri Batara lanri naturukinna kaja'dallanna Karaeng Yerobeam le'baka angngerangi tu Israel ri panggaukang dosaya.

¹²Pau-pau maraengannaya ri passala'na Karaeng Yoas, kammayatompa kabaranianna lalang ri pa'bundukanga angngewai Amazia karaeng Yehuda, niaki nicata' lalang ri kitta' “Riwaya'na sikamma karaeng Israel”.

¹³Matemi Yoas nampa nitarawang ri jera'na sikamma karaenga ri Samaria. Nampa ana'na iamintu Yerobeam II ansambeangi a'jari karaeng.

¹⁴ Ri se'reang wattu garring sannaki Na'bi Elisa, na nia' battu Karaeng Yoas antoaki. Ri wattunna nacini' angkanaya la'birimmi mate Elisa, angngarru'mi karaenga siagang nakanamo, “O Bapakku, Bapakku, pannulung lompona tu Israel!”

¹⁵Naparentakammi Elisa mae ri ia angkana, “Allei anrong pananu siagang ana' pananu!” Naallemi Yoas,

¹⁶nampa nisuro ri Elisa sadia-sadia untu' ammana. Sadiami karaenga, siagang napadongko'mi limanna Elisa irate ri limanna karaenga.

¹⁷Nampa situru' anjo parentana na'bia, nasungkemi karaenga tontonganga a'dalle' mangea ri Siria. Naparentakammi Elisa angkana, “Lappassammi ana' pananu!” Silalonna nalappassanna karaenga anjo ana' panaya, a'gorami anjo na'bia angkana, “Ikaumi panaNa Batara. Iaminjo panaNa Batara lanupake ambetai Siria. La'bundukko a'bali tu Siria ri Afek sa'genna nubeta ke'nanga.”

¹⁸Nasuromi Elisa Karaeng Yoas angngallei pana-panana maraenga siagang napatunrung mae ri buttaya. Natunrungi karaenga buttaya pintallung, nampa ammari.

¹⁹Larromi Elisa nampa nakana, “Mustina sa'genna pillima yareka pingngannang nutunrung, nampa akkulle nuancuru' tabasikali bansa Siria. Mingka kamma-kamma anne lapintallunji nubeta.”

²⁰Tena siapa sallona matemi na nitarawang Elisa. Anjo wattua masarroi garombolang-garombolanna tu Moab battu ambunduki pa'rasangang Israel iamintu tassikali sitaung.

²¹Ri se'reang allo, ri wattunna nia' siapa are tau attarawang tumate, ti'ring nia' nacini' ke'nanga garombolang tu Moab battu. Napela' mami ke'nanga anjo mayaka antama' ri jera'na Elisa nampa lari. Kamma tassento'na anjo mayaka ri kitta'-kitta'na Elisa, attallasa' poleammi ammotere' anjo mayaka nampa ammenteng.

²²Lalang siapa sallona ammarenta Yoas, nijallakkangi tu Israel ri Hazael karaeng Siria.

²³Mingka Nakamaseangi Batara umma'Na siagang Napammopporangi ke'nanga. Tena Nabalang parekangi ke'nanga niancuru' passangalinna Natulungi ke'nanga, lanri parjanjianNa siagang Abraham, Ishak siagang Yakub. Sa'genna kamma-kamma anne tale'bakai Nakaluppai umma'Na.

²⁴Nampa matemo Hazael karaeng Siria, na nisambeang ri ana'na iamintu niarenga Benhadad a'jari karaeng.

²⁵Nampa Yoas karaeng Israel nabetai Benhadad pintallung siagang naallemi ammotere' kota-kota le'baka nialle ri Benhadad ri wattu pamarentahanna Yoahas manggena Yoas.