Read Makassar Version – KITTA' MATANGKASA 2 KARAENG-KARAENG 15 Bible Online

2 KARAENG-KARAENG 15 - Makassar Version – KITTA' MATANGKASA bible

2 KARAENG-KARAENG 15

¹Ri taung makaruampulona antuju ammarenta Karaeng Yerobeam II ri Israel, iaminjo wattua na'jari Karaeng Uzia ana'na Amazia ri Yehuda.

²Anjo wattua nampa 16 taung umuru'na siagang ammarentai ri Yerusalem 52 taung sallona. Amma'na niarengi Yekholya, baine battu ri Yerusalem.

³Sangkamma todong manggena, nagaukang tongi Uzia apa appakasannanga ri nyawaNa Batara.

⁴Mingka sayanna, lanri tenana naputtai tampa'-tampa' panynyombanga ri rewataya, sa'genna tuli assarena koro'bang siagang tuli attununa dupa ra'yaka anjoreng.

⁵Nipa'jari garring salami ri Batara, na sa'genna mate, tena le'bakai a'jari baji' anjo garrinna. Nisa'laki ammantang ri se'reang balla' siagang tena nakkulle nagaukang sikamma tugasa'na. Jari ana' bura'nena niarenga Yotam amwakkeli ammarenta ri ra'yaka.

⁶Pau-pau maraengannaya ri passala'na Karaeng Uzia niaki nicata' lalang ri kitta' “Riwaya'na sikamma karaeng Yehuda.”

⁷ Matemi na nitarawang Uzia ri pa'jerakkanna sikamma karaenga ri Kota Daud. Nampa ana'na niarenga Yotam ansambeangi a'jari karaeng.

⁸Ri taung makatallumpulona assagantuju ammarentana Karaeng Uzia ri Yehuda, iaminjo wattua na'jari karaeng todong Zakharia ana'na Yerobeam II ri Israel siagang ammarentai ri Samaria annang bulang sallona.

⁹Sangkamma todong karaeng-karaeng ammarentaya rioloanganna, ia doraka tongi mae ri Batara. Naturuki kaja'dallanna Yerobeam I, le'baka angngerangi tu Israel mange ri gau' dosaya.

¹⁰Salum ana'na Yabesh assikongkoloki angngewai Karaeng Zakharia, nampa nabuno Karaeng Zakharia ri Yibleam, nampa nasambeang a'jari karaeng.

¹¹ Lanri kammana anjo kajariammi apa le'baka Napa'janjiang Batara mae ri Karaeng Yehu angkanaya ana' cucunna sa'genna lapisi' makaappa' la'jari karaeng ri Israel. Pau-pau maraengannaya ri passala'na Karaeng Zakharia, niaki nicata' lalang ri kitta' “Riwaya'na sikamma karaeng Israel.”

¹³Ri taung makatallumpulo assalapang ammarentana Karaeng Uzia ri Yehuda, iatommi anjo wattua na'jari Karaeng Salum ana'na Yabesh ri Israel. Poro sibulanji bawang ammarenta ri Samaria,

¹⁴lanri niaki Menahem ana'na Gadi battu ri Tirza mange ri Samaria ambunoi Salum, nampa Menahem ansambeangi a'jari karaeng.

¹⁵Lalang ri pa'jappanna battu ri Tirza, naancuru' taba sikalimi Menahem kota Tifsah siagang daera-daera niaka ri ampi'na kammayatompa nabunomi sikontu pandudu'na. Lanri tenana naero' taua ri anjo kotaya manyara mae ri ia, naallemi napue battanna sikamma bai'-baine tiananga ri anjo kotaya. Pau-pau maraengannaya ri passala'na Karaeng Salum, kammayatompa pasikongkolang nagaukanga, niaki nicata' lalang ri kitta' “Riwaya'na sikamma karaeng Israel.”

¹⁷Ri taung makatallumpulo assalapang ammarentana Karaeng Uzia ri Yehuda, iatommi anjo wattua na'jari karaeng Menahem ana'na Gadi ri Israel, siagang ammarentai ri Samaria 10 taung sallona.

¹⁸Lalang sikontu tallasa'na tuli dorakai mae ri Batara lanri naturukinna kaja'dallang nagaukanga Karaeng Yerobeam I, le'baka angngerangi tu Israel mange ri gau' dosaya.

¹⁹Ri wattunna nia' battu Pul iamintu karaeng Asyur ambunduki tu Israel, nisarei ri Menahem 34.000 kilogarang pera' sollanna nibantu Menahem ampakajarreki kakoasanna ammarenta ri Israel.

²⁰Ia carana Menahem anggappai anjo doeka iamintu napassai sikamma tau kalumanynyanga ri Israel assare 50 doe' pera' tunggala' tau. Lanri kammana anjo nabokoimi Pul anjo pa'rasanganga nampa ammotere' mange ri pa'rasanganna.

²¹Pau-pau maraengannaya ri passala'na Karaeng Menahem, niaki nicata' lalang ri kitta' “Riwaya'na sikamma karaeng Israel.”

²²Matemi siagang nitarawammi Menahem. Nampa ana'na niarenga Pekahya ansambeangi a'jari karaeng.

²³Ri taung makalimampulo ammarentana Karaeng Uzia ri Yehuda, iatommi anjo wattua na'jari Karaeng Pekahya ana'na Menahem ri Israel siagang ammarentai ri Samaria ruan taung sallona.

²⁴Doraka tongi mae ri Batara lanri naturukinna kaja'dallanna Karaeng Yerobeam I, le'baka angngerangi tu Israel mange ri gau' dosaya.

²⁵Kalase'renna tau battua ri sikamma perwira tantarana, iamintu niarenga Pekah ana'na Remalya, assikongkoloki siagang 50 tau battu ri Gilead. Nampa nabuno ke'nanga anjo Karaeng Pekahya siagang rua tau maraengang niarenga Argob siagang Arye. Lalangi ri se'reang tembo' pattahangngang ri balla' karaenga ri Samaria nibuno Karaeng Pekahya. Nampa Pekah a'jari karaeng ansambeangi Pekahya.

²⁶Pau-pau maraengannaya ri passala'na Karaeng Pekahya, niaki nicata' lalang ri kitta' “Riwaya'na sikamma karaeng Israel.”

²⁷Ri taung makalimampulo anrua ammarentana Karaeng Uzia ri Yehuda, ia tomminjo wattua na'jari Karaeng Pekah ana'na Remalya ri Israel. Ammarentai ri Samaria 20 taung sallona.

²⁸Doraka tongi mae ri Batara lanri naturukinna kaja'dallanna Karaeng Yerobeam I, le'baka angngerangi tu Israel mange ri gau' dosaya.

²⁹Ri wattu ammarentana Pekah, naallei karaeng Asyur iamintu niarenga Tiglat-Pileser kota-kota Iyon, Abel-Bet-Maakha, Yanoah, Kedes, Hazor, daera Gilead, Galilea siagang Naftali. Pandudu'na niengkaki mange ri Asyur a'jari tunitahang.

³⁰Ri taung makaruampulo ammarentana Karaeng Yotam ana'na Uzia ri Yehuda, assikongkoloki Hosea ana'na Ela untu' angngewai Karaeng Pekah siagang nabunomi Karaeng Pekah, nampa ia ansambeangi a'jari karaeng.

³¹Pau-pau maraengannaya ri passala'na Karaeng Pekah, niaki nicata' lalang ri kitta' “Riwaya'na sikamma karaeng Israel.”

³²Ri taung makarua ammarentana Karaeng Pekah ana'na Remalya ri Israel, ia tomminjo wattua na'jari Karaeng Yotam ana'na Usia ri Yehuda.

³³Anjo wattua 25 taung umuru'na siagang ammarentai ri Yerusalem 16 taung sallona. Amma'na iamintu Yerusa ana'na Zadok.

³⁴Nagaukangi Yotam apa appakasannanga ri nyawaNa Batara, sangkamma todong nagaukanga manggena iamintu Uzia.

³⁵Mingka sayanna, katena naputtai tampa'-tampa' panynyombanga mae ri rewataya sa'genna tuli assarena koro'bang siagang attununa dupa ra'yaka anjoreng. Iaminne Yotam ambangungi Pakke'bu' Lompo Bageang Waraka ri Balla'Na Batara.

³⁶Ri wattu ammarentana Yotam, appakkaramulami Nakiring Batara iamintu Rezin karaeng Siria siagang Pekah karaeng Israel battu ambunduki tu Yehuda. Pau-pau maraengannaya ri passala'na Karaeng Yotam, niaki nicata' lalang ri kitta' “Riwaya'na sikamma karaeng Yehuda.”

³⁸Matei siagang nitarawangi ri pa'jerakkanna sikamma karaenga ri Kota Daud. Nampa ana'na niarenga Ahas ansambeangi a'jari karaeng.