Read Makassar Version – KITTA' MATANGKASA 2 KARAENG-KARAENG 16 Bible Online

2 KARAENG-KARAENG 16 - Makassar Version – KITTA' MATANGKASA bible

2 KARAENG-KARAENG 16

¹Ri taung makasampulo antuju ammarentana Karaeng Pekah ana'na Remalya ri Israel, Ahas ana'na Yotam a'jari karaeng Yehuda.

²Anjo wattua 20 taung umuru'na siagang ammarentai ri Yerusalem 16 taung sallona. Tena naturuki panggaukang baji'na Karaeng Daud boe-boena, passangalinna nagaukangi apa tenaya Nangai Batara, Allata'alana.

³ Sangkamma tongi karaeng-karaeng Israel batena appanggaukang ri tallasa'na, ba'lalo napassareangi ana' bura'ne kalenna a'jari koro'bang mae ri rewataya, situru' kabiasang ja'dala'na sikamma tau nibongkaya ri Batara battu ri butta Kanaan ri wattunna napantamakki tu Israel anjo pa'rasanganga.

⁴Assarei koro'bang Ahas siagang attunui dupa ri tampa'-tampa' panynyombanga mae ri rewataya irate ri moncong-monconga kammayatompa irawanganna poko'-poko' kayu lompoa.

⁵ Anjo wattua nakoasai karaeng Edom ammotere' kota Elat siagang nabongkai tu Yehuda niaka ammantang anjoreng. Nampa battu tu Edom ammantang anjoreng ri anjo kotaya sa'genna anne alloa. Ia tomminjo wattua nabattu Rezin karaeng Siria siagang Pekah karaeng Israel ambunduki tu Yerusalem nampa nakurung, mingka takkulleai nabeta Ahas.

⁷Akkiringi Ahas tunisuro mange ri Tiglat-Pileser karaeng Asyur, siagang appasang kamma anne, “Inakke anne ata majarretta; lanri kammana anjo, kupalaki ri katte, poro battu laloki' nakipasalamakka' battu ri karaeng Siria siagang karaeng Israel niaka kamma-kamma anne ambundukia'.”

⁸Angngalle tommi Ahas bulaeng siagang pera' battu ri Balla'Na Batara, kammayatompa pa'barang-barangngang niaka ri balla' karaenga, nampa nakiring a'jari hadia mae ri anjo karaeng Asyur.

⁹Naturukimi karaeng Tiglat-Pileser anjo pappala'na Ahas, nampa nabunduki siagang naempoi Damsyik. Pandudu'na naengkaki a'jari tunitahang mange ri Kir, nampa karaenna iamintu Rezin, nabunoi.

¹⁰Ri wattunna a'lampa Karaeng Ahas mange ri Damsyik untu' ambuntuli karaeng Tiglat-Pileser, nia' nacini' tampa' pakkoro'bangngang anjoreng. Nampa nakiring contona anjo tampa' pakkoro'bangnganga mange ri Imang Uria ri Yerusalem, siagang sikontu ukkurang-ukkuranna.

¹¹Jari ambangummi Uria se're tampa' pakkoro'bangngang sangkamma anjo contoa siagang ukkurang natarimaya, siagang na'pa'le'baki lalang tenanapa nammotere' Ahas.

¹²Ammotere'na Ahas battu ri Damsyik, nacini'mi le'ba' anjo tampa' pakkoro'bangnganga.

¹³Nampa angngerammo passare irate ri anjo tampa' pakkoro'bangnganga, iamintu koro'bang olo'-olo' siagang koro'bang gandung. Appatiri' tommi koro'bang je'ne' anggoro' siagang cera' battu ri koro'bang pappasiamaka nai' ri anjo tampa' pakkoro'bangnganga.

¹⁴ Naciniki Ahas angkanaya tampa' pakkoro'bangngang nipareka battu ri tambaga iamintu nisa'laka untu' Batara niaki attampa' ri alla'na Balla'Na Batara siagang anjo tampa' pakkoro'bangngang berua. Lanri kammana anjo napalette'mi anjo tampa' pakkoro'bangngang nipareka battu ri tambaga battu ri dallekang Balla'Na Batara mange ri bageang warakanna anjo tampa' pakkoro'bangngang berua.

¹⁵Le'baki anjo nakanamo ri Uria, “Pakei anne tampa' pakkoro'bangngang lompoku untu' attunu koro'bang bari'basa' siagang koro'bang bangngi iamintu napassareanga karaenga siagang ra'yaka, siagang patiriki anjoreng koro'bang anggoro' battua ri ra'yaka. Patiri' tongi nai' ri anjo tampa' pakkoro'bangnganga sikontu cera' battua ri olo'-olo' nipassareanga. Siagang anjo tampa' pakkoro'bangngang nipareka battu ri tambaga, iamintu tampa' pakkoro'bangngang salloa, lappassammi nakupake untu' appala' pangngunju' battu ri roh-roh akkullea nipappalakki pangngunju'.”

¹⁶Nagaukammi Uria anjo parentana karaenga.

¹⁷ Nampa nabongkara' Ahas kareta-kareta nipareka battu ri tambaga, iamintu kareta-kareta nipake lalang ri Balla'Na Batara, nampa nalakka' sikamma katoang niaka ri anjo kareta-karetaya. Anjo guci lompoa iamintu nipareka battu ri tambaga, ia niaka ri dongko'na anjo sampulo anrua patung sapi tambaga naalle tongi siagang napadongkoki ri dapara' batua.

¹⁸Nampa lanri ero'na naalle pa'mai'na karaeng Asyur, nabongkaraki kantoro'na karaenga ri Balla'Na Batara, siagang natongko' pakke'bu' oloanna karaenga.

¹⁹Pau-pau maraengannaya ri passala'na Karaeng Ahas, niaki nicata' lalang ri kitta' “Riwaya'na sikamma karaeng Yehuda.”

²⁰ Matemi siagang nitarawammi Ahas ri pa'jerakkanna sikamma karaenga ri Kota Daud. Nampa nisambeang ri ana'na niarenga Hizkia a'jari karaeng.