Read Makassar Version – KITTA' MATANGKASA 2 KARAENG-KARAENG 24 Bible Online

2 KARAENG-KARAENG 24 - Makassar Version – KITTA' MATANGKASA bible

2 KARAENG-KARAENG 24

¹ Ri wattu ammarentana Karaeng Yoyakim, nia'mi battu Nebukadnezar Karaeng Babel ambunduki siagang ambetai tu Yehuda. Tallun taung sallona Yoyakim tundu' mae ri Nebukadnezar, mingka ri bokoanna angngewami.

²Appabattui Batara garombolang-garombolang angngeranga sanjata battu ri Babel, Siria, Moab siagang Amon untu' angngewai Yoyakim siagang angngancuruki Yehuda, situru' apa le'baka Nakanang tete ri sikamma na'bi-na'bia atanNa.

³Anjo kajariang kammaya memang musti kajariangi, lanri le'ba'mi Napau riolo Batara angkanaya lanipelaki bansa Yehuda battu ri pa'rasangang le'baka Napassareang Batara mae ri ke'nanga. Nipelaki ke'nanga lanri sikontu dosa nagaukanga Karaeng Manasye;

⁴la'biangampa lanri sikontu pammunoang nagaukanga mae ri sikamma tau tenaya nasala. Tena Naero' Batara ampamopporangi Manasye lanri anjo panggaukang-panggaukang kammana.

⁵Sikontu daeraya, appakkaramula battu ri Binanga Efrat sa'genna pa'baeng-baenna Mesir ri bageang wara' antamaya daera pamarentahanna Karaeng Mesir, nikoasai kabusuki ri Karaeng Babel. Lanri kammana anjo tena le'bakami assulu' karaeng Mesir battu ri pa'rasanganna untu' a'lampa a'bundu'. Pau-pau maraengannaya ri passala'na Karaeng Yoyakim niaki nicata' lalang ri Kitta' “Riwaya'na Karaeng-karaeng Yehuda.” Ri wattunna matemo Yoyakim, ana'na niarenga Yoyakhin ansambeangi a'jari karaeng.

⁸Wattunna a'jari Karaeng Yoyakhin ri Yehuda, 18 taung umuru'na, siagang ammarentai 3 bulang sallona ri Yerusalem. Amma'na niarengi Nehusta ana'na Elnatan, battu ri Yerusalem.

⁹Sangkamma todong manggena, Yoyakhin doraka tongi mae ri Batara.

¹⁰Lalang wattu ammarentana Yoyakhin, niaki battu maju pasukanna Babel nipimpinga ri perwira-perwira tantarana Nebukadnezar untu' ambunduki Yerusalem, nampa nakurung anjo kotaya.

¹¹Lalang nikurunna anjo kotaya, kalenna Nebukadnezar battu mange ri Yerusalem,

¹² nampa napassareammo kalenna Karaeng Yoyakhin siagang amma'na, ana'na kabusu', sikamma perwira tantarana siagang pagawe-pagawena balla' karaenga, mae ri Nebukadnezar. Nampa natahammo Yoyakhin. Anjo passalaka kajariangi ri taung makasagantuju wattu ammarentana Karaeng Nebukadnezar.

¹³Sikontu pakkakasa' bulaeng napareka Karaeng Salomo untu' Balla'Na Batara, nipanraki ri Nebukadnezar. Nampa sikontu barang-barang niaka anggaranna lalang ri anjo Balla'Na Batara siagang ri balla' karaenga naengkaki mange ri Babel. Sikontu anjo passalaka kajariangi situru' apa le'baka Napau riolo Batara.

¹⁴ Karaeng Yoyakhin, amma'na, sikamma bainenna, pagawe-pagawena, siagang pamimping-pamimpinna tu Yehuda, kabusu'na nia' 7.000 tau parallu, nitahangi siagang niengkaki mange ri Babel. Kammayatompa sikontu tau cara'deka siagang panre bassia nia' 1.000, kabusu'na sangnging tau kassa' ngaseng siagang tau barani untu' a'bundu'. Bija-bija karaenga siagang pamimping-pamimpinga niengka' kabusuki mange ri pa'rasangang pammelakkanga, yangasenna nia' 10.000 jaina tau. A'biringi sikontu pandudu'na Yerusalem niengka' a'lampa; ia ammantanga iamami ra'ya' kaminang kasi-kasia.

¹⁷ Nampa naengka' Nebukadnezar tuniarenga Matanya, iamintu purinanna Yoyakhin, a'jari karaeng ri Yehuda, siagang napinrai arenna a'jari Zedekia.

¹⁸ Wattunna a'jari Karaeng Zedekia ri Yehuda, 21 taung umuru'na. Ammarentai ri Yerusalem 11 taung sallona. Amma'na niarengi Hamutal, ana'na Yeremia battu ri kota Libna.

¹⁹Sangkamma todong Karaeng Yoyakim, dorakai Karaeng Zedekia mae ri Batara.

²⁰ Teai sipato' larroNa Batara mae ri pandudu'na Yerusalem siagang ri tu Yehuda, sa'genna tenamo Naparhatikangi ke'nanga.