Read Makassar Version – KITTA' MATANGKASA 2 KARAENG-KARAENG 4 Bible Online

2 KARAENG-KARAENG 4 - Makassar Version – KITTA' MATANGKASA bible

2 KARAENG-KARAENG 4

¹Ri se'reang allo nia' sitau baine janda le'ba' baine na'bi a'lampa mange ri Na'bi Elisa nampa angkana, “Bapa', matemi bura'nengku! Nakiasseng tonja angkanaya anjo le'ba' bura'nengku tau mappilangngeri todong ri Allata'ala, mingka nia' inranna mae ri se'reang tau. Kamma-kamma anne battui anjo taua ero' angngalle rua anakku nampa napa'jari ke'nanga atanna, salaku pa'bayara' ri inranna tumate le'ba' bura'nengku.”

²Akkuta'nammi Elisa angkana, “Antekamma bateku akkulle antulungki'? Apaka nia' apa-apanta ri balla'?” Appialimi anjo bainea angkana, “Tena apa-apangku, pantaranganna sibotolo' ca'di minynya'-minynya' bau'!”

³Nakanamo Elisa, “A'lampaki' angnginrang jai-jai botolo' kosong battu ri siampi'-ampi' ballatta.

⁴Le'baki anjo antama' maki' ri ballatta siagang ana'-anatta nampa kitongko' pakke'butta. Tumpai anjo minynya'-minynyaka battu ri anjo botolo' ca'dia antama ri sikamma anjo botolo' kiinranga nampa kisa'la' botolo' rassiamo.”

⁵Jari ammotere'mi anjo bainea mange ri balla'na. Le'ba'namo antama siagang ana'-ana'na ri balla'na na natongko' pakke'bu'na, naallemi anjo botolo' ca'di niaka minynya'-minynya'na, nampa napatiri' antama' ri botolo'-botolo' napassareanga ana'na mae ri ia.

⁶Wattunna rassi kabusu'mo anjo botoloka, appala'mi pole botolo'. Appialimi kalase'renna ana'na angkana, “La'busu'mi.” Jari tenamo nassolong pole anjo minynyaka.

⁷Nampa a'lampamo pole anjo bainea mange ri Na'bi Elisa na nakanamo Elisa, “Balukangi anjo minynya'-minynyaka nampa kibayara' ngaseng inranta, nampa anjo la'binna lagannaki untu' kaparalluang katallassanta siagang ana'-anatta.”

⁸Ri Sunem nia' sitau baine kalumanynyang ammantang. Ri se'reang allo ri wattunna a'lampa Elisa mange ri Sunem, nibuntulimi ri anjo bainea mae angnganre. Baku'na anjo punna assengka Elisa ri Sunem, tuli angnganrei ri balla'na anjo bainea.

⁹Nampa nakanamo anjo bainea ri bura'nenna, “Tappaka' angkanaya anjo bapa' sarroa assengka anrinni ma'nassa atanNa Allata'ala.

¹⁰Bajiki punna apparekki' se're kamara' ca'di irate ri bageang ratena anne ballatta, siagang nisarei katinroang, mejang, kadera, siagang lampu sollanna akkulle a'bangngi anjoreng punna niaki battu angkunjungiki'.”

¹¹Ri se'reang allo battumi pole Elisa ri Sunem. Ri wattunna nai'mo ri kamara'na untu' ammari-mari,

¹²nasuromi palayanna iamintu Gehazi, mange angkioki anjo bainea. Battunamo anjo bainea,

¹³nakanamo Elisa ri Gehazi, “Kuta'nang sai angkana antekamma bateku akkulle ambalasaki sikamma kaposoanna untu' ikatte. Gassingka nakellaia' a'lampa mange ri karaenga yareka mange ri panglimaya untu' a'bicara lanri kaparalluanna.” Appialimi anjo bainea angkana, “Niaka' ammantang ri tangnga-tangngana bija pammanakangku siagang tenamo apa-apa kakurangangku.”

¹⁴Jari akkuta'nammi Elisa ri Gehazi angkana, “Punna kamma padeng apa mami akkulle kugaukang untu' ia?” Appialimi Gehazi angkana, “Tena ana'na bapa'; nampa toami bura'nenna.”

¹⁵Nakanamo Elisa, “Kioki anjo bainea.” Battumi anjo bainea siagang ammenteng ri pakke'buka.

¹⁶ Nampa nakanamo Elisa ri ia, “Taung ri dallekang, ri wattu kamma-kammaya anne, lakkalawing maki' sitau ana' lolo bura'ne.” Nakanamo anjo bainea, “Teaki' a'balle-ballei bapa'. Sai atanNaki' Allata'ala bapa'!”

¹⁷Mingka kammatojengi anjo apa napakkanaya Elisa. Taung ri boko, kira-kira ri wattu sangkammaya anjo, ammana'mi anjo bainea sitau ana' bura'ne.

¹⁸Ri wattunna lompomo anjo anaka, ri se'reang allo, ri wattu pakkattoang, a'lampai anjo anaka mae ri manggena niaka ri kokoa siagang pakattoa.

¹⁹Ti'ring akkio'mi anjo anaka mae ri manggena angkana, “Edede! Pa'risiki ulungku!” Nakanamo manggena mae ri se'reang palayanna, “Erangi anne anaka mange ri amma'na.”

²⁰Nierammi anjo anaka mange ri amma'na, nampa niriwa ri amma'na. Ri wattu karuenna matemi anjo anaka.

²¹Nierammi ri amma'na nai', ri kamara'na Elisa, nampa napara'ba ri katinroanga. Le'baki anjo assulu'mi nampa natongko' pakke'buka,

²²nampa a'lampa mange angkioki bura'nenna. Nakanamo, “Suroi sitau palayang battu mae angngerang sikayu keledai. Musti akkaro-karoa' a'lampa mange ri Na'bi Elisa, siagang lakkaro-karoa' ammotere'.”

²³Akkuta'nammi bura'nenna angkana, “Angngapa numusti a'lampa kamma-kamma anne? Anne alloa teai allo Pammari-mariang siagang teai allo lompo Bulang Beru.” Appialimi angkana, “Tena nangngapa.”

²⁴Le'baki napataba pa'lapa'na keledaia, nakanamo ri palayanna, “Palari anne keledaia nukkaro-karo; teako pammari akkaro-karo punna tena kusuroko.”

²⁵Jari a'lampami anjo bainea mange ri Moncong Karmel ri tampa'na Elisa. Battu bella nacini' memammi Elisa battu anjo bainea. Nakanamo Elisa ri Gehazi, “Ciniki, anjo baine battua ri Sunem niaki battu!

²⁶Lintakko mange anruppai na nupakkuta'nangngang kaadaanna kaluargana.” Nakanamo anjo bainea ri Gehazi, “Baji'-baji' ngasenji.”

²⁷Mingka ri wattunna battu mange ri dallekanna Elisa, su'ju'mi nampa naraka' bangkenna Elisa. Eroki Gehazi ampakabellai anjo bainea battu anjoreng, mingka nakanamo Elisa, “Lappassangi! Sanna' susana nyawana kucini'. Mingka tena apa-apa Napauanga' Batara!”

²⁸Nakanamo anjo bainea, “Pa', tena kuppala' ana' ri katte. Le'ba' tommi kupau ri katte sollanna tena kisarea' panrannuang tena bonena.”

²⁹Assailemi Elisa mae ri Gehazi nampa nakana, “Lintakko! Allei takkangku nampa a'lampa memangko mange ri balla'na anne bainea. Teako ammantangngi untu' a'barisallang manna pole ri nai nusibuntulang ri aganga. Punna a'barisallang ri kau, teako pela'-pelakki wattunnu untu' ambalasaki bari sallanna. Punna battuko, lintakko padongkoki takkangku ri kalenna anjo anaka.”

³⁰Nakanamo anjo bainea, “Bapa' Elisa! Lanri Batara mattallasaka siagang lanri nyawata Bapa', tena nalakubokoiki'!” Lanri kammana anjo a'lampami Elisa siagang anjo bainea mange ri balla'na anjo bainea.

³¹A'lampa riolomi Gehazi ri dallekanna ke'nanga untu' ampadongkoki takkanna Elisa ri kalenna anjo anaka, mingka tena sikali sa'ra yareka pammatei maraengannaya angkanaya attallasaki anjo anaka. Nampa a'lampamo Gehazi ambuntuli Elisa na nakana, “Tena nambangung anjo anaka.”

³²Battuna mange ri balla'na anjo bainea, antama'mi Elisa kale-kalenna ri kamara'na na nacini' maya'na anjo anaka anra'ba rate ri katinroanga.

³³Natongko'mi Elisa pakke'buka nampa appala' doang mae ri Batara.

³⁴ Le'baki anjo a'dundumi naung ri anjo anaka siagang napa'reppese' bawana, matanna siagang limanna mae ri bawana, matanna siagang limanna anjo anaka. Lanri napakammana anjo, a'jari kammu'mi kalenna anjo anaka.

³⁵Ambangummi Elisa nampa a'jappa anrai' kalau' lalang ri anjo kamaraka, nampa ammopang pole naung ri kalenna anjo anaka. Kale'bakkanna burassingammi anjo anaka pintuju, nampa nasungke matanna.

³⁶Nasuromi Elisa anjo Gehazi untu' angkioki amma'na anjo anaka. Na antama'namo anjo bainea nakanamo Elisa ri ia, “Anne anatta.”

³⁷Su'ju'mi anjo bainea ri dallekanna Elisa nampa naerang ana'na assulu'.

³⁸Ri se'reang wattu natujui sikontu pa'rasanganga bala kacipurang. Jari ammotere'mi Elisa mange ri Gilgal. Ri wattunna sitabang angngajara' siapa are jaina na'bi, nasuromi palayanna angngalle uring lompo nampa napappalluang ke'nanga.

³⁹Kalase'renna battu ri anjo na'bi-na'bia assuluki mange ri kokoa untu' a'boya gangang-gangang; na nia'mo nabuntulu' kamma lamung-lamung boyo' taniparakai. Naallemi rapponna anjo boyoka sipajai-jaina nampa naerang ammotere'. Tanaassengai angkanaya lamung-lamung apa anjo nampa naallemo nae'ba'-e'ba' nampa napantama' ri anjo uringa.

⁴⁰Ri wattunna ti'no'mo, napa'bage-bageammi mae ri sikamma anjo na'bi-na'bia. Mingka nampami nalepa' ke'nanga anjo kanrea nammarrammo ke'nanga ri Elisa angkana, “Bapa', racung anne!” Taerokami ke'nanga angkanrei.

⁴¹Jari assuro allemi Elisa sike'de' labu', nampa napakioro' antama' ri anjo uringa. Le'baki anjo nakanamo, “Bagemi pole anjo kanrea.” Natenamo bahayana anjo kanrea.

⁴²Ri se'reang wattu maraeng, nia' sitau bura'ne battu ri Baal-Salisa. Napangngerangngangi Elisa gandung beru nikatto kammayatompa ruampulo roti nipareka battu ri wassele' bungasaka ri wattu pakkattoang anjo taunga, kammayatompa battu ri gandung beru nikattoa. Nasuro bagemi Elisa anjo rotia mae ri anjo na'bi-na'bia,

⁴³mingka nakana anjo palayanga, “Tena olona langganna' untu' sibilangngang tau!” Appialimi Elisa angkana, “Bagemi mange sollanna angnganre ke'nanga, nasaba' Nakana Batara langnganrei ke'nanga nampa punna le'ba' ke'nanga angnganre lania' ija ammantang tassesa.”

⁴⁴Nabage-bagemi palayanga anjo rotia mae ri ke'nanga, nampa angnganre kabusu'mo ke'nanga. Le'baki angnganre ke'nanga, nia' ija tassesa sangkamma Napaua Batara.