Read Makassar Version – KITTA' MATANGKASA 2 KARAENG-KARAENG 8 Bible Online

2 KARAENG-KARAENG 8 - Makassar Version – KITTA' MATANGKASA bible

2 KARAENG-KARAENG 8

¹ Ri se'reang wattu appabattui Batara bala kacipurang ri Israel niaka tuju taung sallona. Rioloannaya le'ba'mi napau memang Elisa anjo passalaka mae ri baine battua ri Sunem le'baka napattallasa' poleang ana'na. Nasuro tongi Elisa anjo bainea a'lette' siagang kaluargana mange ri pa'rasangang maraenga.

²Nagaukammi anjo bainea anjo apa napaua Elisa, siagang a'lampami mange ri pa'rasangang Filistin untu' ammantang anjoreng.

³Allalonamo tuju taung, ammotere'mi mange ri Israel. Nampa a'lampa siagang ana'na mange ri karaenga untu' ampalaki sollanna nipoterang balla'na siagang kokonna mae ri ia.

⁴Anjo wattua Gehazi palayanna Elisa le'ba'mi nipala' ri karaenga untu' ancaritakangi sikamma passala' kajariang appakalannasaka, le'baka nagaukang Elisa.

⁵Na sitabang le'ba' ri wattu battuna anjo baine battua ri Sunem andallekang ri karaenga untu' ampabattui pappala'na, sitabang tongi Gehasi ancaritai antekamma batena Elisa ampattallasa' poleangi se'rea ana' matemo. Jari nakanamo Gehasi, “O karaeng mala'birika, iaminne anjo bainea, siagang iaminne anjo ana'na napattallasa' poleanga Elisa!”

⁶Nampa akkuta'nammo karaenga siagang nacaritami anjo bainea ri passala'na anjo anaka. Le'baki anjo nakio'mi karaenga se'rea pagawena, siagang naparentakammi sollanna nipoterang kabusu' sikontu apa-apanna anjo bainea mae ri ia, kammayatompa ballinna sikontu wassele' kokonna lalang tuju taung baku' nabokoina pa'rasanganga.

⁷Ri se'reang wattu a'lampai Elisa mange ri Damsyik. Sitabangi Karaeng Benhadad garring anjo wattua. Nalangngere'na karaenga angkanaya niaki Elisa ri Damsyik,

⁸nakanamo ri Hazael, iamintu kalase'renna pagawena, “Angngerangko hadia mae ri anjo na'bia, nampa nupala' sollanna akkuta'nang ri Batara, apaka anne inakke akkullea' a'jari baji' ri garringku yareka tena.”

⁹Angngallemi Hazael 40 unta nampa natekeki a'rupa-rupa wassele'na kota Damsyik nampa a'lampa mange ri Elisa. Ri wattunna battu mange ri tampa'na Elisa, nakanamo Hazael, “Atanta Karaeng Benhadad, assuroa' battu untu' ampakuta'nangngangi apaka akkullei ammolle ri garrinna yareka tena.”

¹⁰Appialimi Elisa angkana, “Napaui Batara mae ri nakke angkanaya lamatei. Mingka pauang mami angkanaya lammollei ri garrinna.”

¹¹Nampa najanjang tarrusu'mo Elisa anjo Hazael sa'genna a'jari lussa'mo Hazael. Ti'ring angngarru'mi Elisa.

¹²Akkuta'nammi Hazael angkana, “Angngapa kingngarru' Bapa'?” Nakanamo Elisa, “Nasaba' kuassengi kaja'dallang eroka nugaukang mae ri tu Israel. Lanutunui kota-kotana niaka bentenna, lanubunoi tau rungkana kaminang bajika, siagang nuaccekang kallonna ana'-ana' loloa kammayatompa nupue battanna baine tiananga.”

¹³ Appialimi Hazael angkana, “Inakke anne tau tena anggarangku; tena olona lania' koasaku kammaya anjo lompona!” Appialimi Elisa angkana, “Le'ba'ma' Napaccinikang Batara angkanaya la'jariko karaeng ri Siria.”

¹⁴Ri wattunna ammotere' Hazael mange ri balla'na karaenga, akkuta'nammi Benhadad angkana, “Apa nakana Elisa?” Appialimi Hazael angkana, “Nakana mattantu lammolleta ri garrinta karaeng.”

¹⁵Mingka ammukona angngallemi Hazael silawara' kalimbu' nampa natallangngang naung ri je'neka nampa najallakkang ri rupanna karaenga sa'genna mate lammasa' karaenga. Nampa Hazael a'jari karaeng ri Siria ansambeangi Benhadad.

¹⁶Yehoram ana'na Yosafat a'jari karaeng ri Yehuda ri wattunna limantaummo Karaeng Yoram a'nana Ahab ammarenta ri Israel.

¹⁷Anjo wattua 32 taung umuru'na Yehoram, na sagatunju taung ammarenta ri Yerusalem.

¹⁸A'buntingi siagang ana'na Ahab, na kamma panggaukanna kaluargana Ahab, ia doraka tongi mae ri Batara sangkamma sikamma karaeng Israel.

¹⁹ Mingka taerokai Batara ampanraki Yehuda lanri le'ba'na a'janji mae ri Daud atanna, angkanaya jari-jarina tuli la'jari karaeng.

²⁰ Lalang pamarentahanna Yehoram, angngewai Edom mae ri Yehuda siagang appaenteng kale-kalei kakaraengang.

²¹Lanri kammana anjo, assulu'mi Yehoram siagang sikontu kareta bundu'na a'lampa mange ri Zair. Anjoreng nikurummi ri pasukang Edom, mingka ri wattuna bangngi ia siagang sikamma panglima tantarana akkullei ta'lappasa' assulu', nampa sikamma tantarana ke'nanga larimi ammotere' massing mange ri balla'na.

²²Appakkaramula anjo wattua tenamo natundu' Edom ri Yehuda. Ia todong anjo wattua nangngewa tommo Libna.

²³Carita maraengannaya ri passala'na Yehoram niaki nitulisi' lalang ri kitta' Riwaya'na sikamma karaeng Yehuda.

²⁴Matei siagang nitarawangi ri jera'na karaeng-karaenga ri Kota Daud. Nampa ana'na niarenga Ahazia ansambeangi a'jari karaeng.

²⁵Ahazia ana'na Yehoram a'jari karaeng ri Yehuda ri wattunna Karaeng Yoram ana'na Ahab sampulomi anrua taung ammarenta ri Israel.

²⁶Anjo wattua 22 taung umuru'na Ahazia, na sitaungi ammarenta ri Yerusalem. Amma'na niarengi Atalya, ana'na Karaeng Ahab, cucunna Omri karaeng Israel.

²⁷Lanri pa'buntinganna, nia'mo passisambungang bijanna Ahazia siagang bijanna Karaeng Ahab. Anjo Ahazia dorakai mae ri Batara sangkamma nagaukanga kaluargana Ahab.

²⁸Amminawangi Ahazia a'bundu' siagang Yoram karaeng Israel angngewai Hazael karaeng Siria. A'bunduki ke'nanga ri Ramot, daera Gilead. Lokoki Yoram lalang anjo pa'bundukanga,

²⁹nampa ammotere' mange ri kota Yizreel untu' niballei, na'lampa Ahazia mange antoaki anjoreng.