Read Makassar Version – KITTA' MATANGKASA 1 PATTOTTORANG 14 Bible Online

1 PATTOTTORANG 14 - Makassar Version – KITTA' MATANGKASA bible

1 PATTOTTORANG 14

¹Karaeng Hiram battu ri pa'rasangang Tirus, akkiringi siapa are tunisuro battu mange ri Daud. Kammayatompa akkiringi kayu camara battu ri Libanon siagang tukang-tukang kayu, tukang-tukang batu, untu' ambangung balla' napammantangia karaeng.

²Lanri kammana tappa'mi Daud angkanaya nipakajarre'mi ri Batara untu' a'jari karaeng Israel, siagang nipakajarre'mi kakaraenganna untu' kaparalluang Umma'Na Batara.

³Ri Yerusalem angngallemi pole siapa are baine na nabaineang, sa'genna anggappamo pole siapa are ana'.

⁴Ana'-ana' bura'nena ia lassuka ri Yerusalem, iamintu: Syamua, Sobab, Natan, Salomo (biasai nitappu Suleman),

⁵Yibhar, Elisua, Elpelet,

⁶Nogah, Nefeg, Yafia,

⁷Elisama, Beelyada,[13] siagang Elifelet.

⁸Ri wattunna nalangngere' tu Filistin angkanaya le'ba'mi niangka' Daud a'jari karaeng ri sikontu Israel, battumi ke'nanga ero' anjakkalaki Daud. Lanri kammana assulu'mi Daud untu' a'bundu' siagang ke'nanga.

⁹Na lalanna anjo wattua battumi tu Filistin ri Lappara' Refaim siagang narampo'mi anjo tampaka.

¹⁰Nalangngere'na Daud anjo kabaraka akkuta'nammi ri Allata'ala angkana, “O Batara, mustika a'lampa' mange ambunduki anjo tu Filistin? Maka laKisarea' pammetang?” Appialimi Batara angkana, “Iyo, bundukimi! LaKusareko pammetang!”

¹¹Jari mangemi Daud siagang pasukanna ambunduki anjo tu Filistin ri Baal-Perasim na nabetamo ke'nanga. Nakanamo Daud, “Napakema' Allata'ala untu' allappoi tampa' attahanna musua sanrapang a'ba allappariai yangasenna apa-apaya, lalang wattu sinampe'ji bawang.” Iaminjo saba'na naniaremmo anjo tampaka “Baal-Perasim”.[14]

¹²Ri wattunna larimo pasukang Filistin, tenamo nasawe ke'nanga angngerangi patung-patung barhalana ke'nanga. Naparentakammi Daud sollanna nitunu ngaseng anjo patung-patunga.

¹³Tena nasallo battumi pole tu Filistin siagang anrampoki taua ri Lappara' Refaim.

¹⁴Sikalipi pole appala' pitunju' Daud mae ri Allata'ala. Nappialimo Allata'ala angkana, “Teako bunduki ke'nanga battu anrinni, mingka a'jappamako numminro nampa nubunduki ke'nanga battu ba'leang, ri ampi'na tampa' niaka poko'-poko' murbei.

¹⁵Punna nia' nulangngere' sa'ra bangkeng tau a'barrisi' irate ri cappa'na anjo poko'-pokoka, maju mako, nasaba' iNakke la'jappa ri dallekannu untu' ambetai tantarana Filistin.”

¹⁶Nagaukammi Daud anjo apa Napassuroanga Allata'ala mae ri ia. Nabundukimi Daud siagang pasukanna anjo tantara Filistinga, sa'genna napaunduru' appakkaramula battu ri Gibeon sa'genna ri Gezer.

¹⁷Jari masahoro'mi arenna Daud ri kere-keremae, siagang nipa'jari malla' ngasemmi anjo sikontu bansaya ri Batara mae ri Daud.