Read Makassar Version – KITTA' MATANGKASA 1 PATTOTTORANG 18 Bible Online

1 PATTOTTORANG 18 - Makassar Version – KITTA' MATANGKASA bible

1 PATTOTTORANG 18

¹Siapa are sallona ribokoanganna, nabundukimi Daud tu Filistin sa'genna nabetamo ke'nanga siagang narampasa'mi kota Gad kammayatompa desa-desa niaka ri tammulilina.

²Nabeta tommi Daud tu Moab, sa'genna tundu'mo ke'nanga siagang a'bayara'mi passare mae ri ia.

³Nampa nabeta Daud Karaeng Hadadezer, iamintu karaeng ri Zoba ri ampi'na daera Hamat di pa'rasangang Siria. Anjo wattua sitabangi lalang pa'jappang Hadadezer untu' mange angkoasai daera niaka ri ampi'na ulunna Binanga Efrat.

⁴Narampasa'mi Daud 1.000 jaina kareta pa'bundukang, siagang najakkala' 7.000 tantara a'jarang, kammayatompa 20.000 tantara a'jappa bangkenga. Napesoki ngasemmi sikamma jaranga, pantaranganna niaka 100 siganna'na untu' kareta pa'bundukang.

⁵Akkirimmi tu Siria battu ri Damsyik tantara untu' ambantui Karaeng Hadadezer, mingka nabeta tongi Daud ke'nanga siagang nia' 22.000 jaina tau nabuno.

⁶Nampa ambangung kema-kema tantara lalang ri daerana ke'nanga siagang tundu'mi ke'nanga na'bayara' passare mae ri ia. Batara assarei pammetang ri kere-keremae a'bundu' Daud.

⁷Sikamma pa'lapa' bulaeng napakea tantarana Hadadezer narampasa'mi Daud nampa naerang mange ri Yerusalem.

⁸ Pantaranganna anjo angngalle tommi Daud jai sikali parunggu battu ri Tibhat siagang Kun, iamintu kota-kota nakoasaia Hadadezer riolo. (Ri bokoangallo napare'mi Salomo anjo parunggu-parunggua untu' guci-guci, benteng-benteng siagang pakkakasa' sambayanga lalang ri Balla'Na Batara.)

⁹Karaeng Tou battu ri Hamat nalangngere'mi angkanaya nabetami Daud sikontu tantarana Hadadezer.

¹⁰Jari nasuromi ana' bura'nena, iamintu Yoram, untu' appabattu sallang mae ri Karaeng Daud siagang appabattu sallang ri pammetanna anjo, nasaba' biasai Hadadezer a'bundu' siagang Tou. Battumi Yoram mange ri Daud, angngerang jai sikali hadia bulaeng, pera' siagang parunggu.

¹¹Napassareang ngasemmi Daud mae ri Batara sikamma anjo hadiaya, untu' nipake lalang gau' passambayangang. Kamma tomminjo nagaukangangi sikamma barang-barang bulaeng le'baka narampasa' battu ri Hadadezer siagang bansa-bansa nabetaya, iamintu bansa Edom, Moab, Amon, Filistin, siagang Amalek.

¹² Abisai (amma'na niarengi Zeruya) ambetai siagang ambunoi 18.000 tu Edom ri Lappara' Asin,

¹³nampa ambangung kema-kema tantara ri sikontu Edom. Jari tundu' ngasemmi tu Edom mae ri Daud. Batara assarei pammetang ri kere-keremae Daud a'bundu'.

¹⁴Kammaminjo ammarentami Daud ri sikontu Israel siagang najagai sollanna tuli nakasia ra'ya'na nikanaya kaadelang siagang kabajikang.

¹⁵Iaminne pajaba'-pajaba' tinggia, ia naangkaka Daud: Panglimana tantaraya: Yoab daenna Abisai. Jurutulisi' ri balla' karaeng: Yosafat ana'na Ahilud. Imang-imang: Zadok ana'na Ahitub siagang Ahimelekh ana'na Abyatar. Jurutulisi' Negara: Sausa.[16] Kapala pangawala' karaeng: Benaya ana'na Yoyada. Ana'-ana' bura'nena Daud anna'gala' jabatang parallua lalang ri pamarentahanga.