Read Makassar Version – KITTA' MATANGKASA 1 PATTOTTORANG 26 Bible Online

1 PATTOTTORANG 26 - Makassar Version – KITTA' MATANGKASA bible

1 PATTOTTORANG 26

¹Iaminne pambageang tugasa' untu' sikamma tu Lewi a'jaria pangawala'na Balla'Na Batara. Battu ri passibijanna Korah ia nijo'joka iamintu Meselemya ana'na Kore battu ri kaluarga Ebyasaf.

²Nia' tuju ana'na bura'ne ia nicataka situru' susunang umuru'na ke'nanga, iamintu: Zakharia, Yediael, Zebaja, Yatniel,

³Elam, Yohanan, Elyoënai.

⁴ Nampa nijo'jo' Obed-Edom. Nibarakkaki ri Allata'ala nanisare sagantuju ana' bura'ne, ia nicataka situru' susunang umuru'na, iamintu: Semaya, Yozabad, Yoah, Sakhar, Netaneel,

⁵Amiel, Isakhar, siagang Peuletai.

⁶Semaya ana' toana Obed-Edom, nia' annang ana' bura'nena, iamintu: Otni, Refael, Obed, Elzabad, Elihu, siagang Semakhya; yangasenna ke'nanga tau sanna' niparalluanna lalang bijanna ke'nanga lanri ga'ga baranina, la'biangampa Elihu siagang Semakhya.

⁸Untu' anjo jamang-jamang pangawalaka passibijanna Obed-Edom assarei 62 jaina tau bura'ne kassaka.

⁹Passibijanna Meselemya assarei sampulo assagantuju jaina tau kassa'.

¹⁰Battu ri passibijanna Merari nijo'joki Hosa. Ia nia' ana'na bura'ne, iamintu: Simri (ia teai ana' toa, mingka niangkaki a'jari pamimping ri manggena),

¹¹Hilkia, Tebalya, siagang Zakharia. Yangasenna nia' sampulo antallu jaina anggota kaluarga Hosa ia a'jaria pangawala'na Balla'Na Batara.

¹²Sikamma pangawalaka ri Balla'Na Batara nibagei lalang pa'rappungang-pa'rappungang situru' passibijanna ke'nanga. Ke'nanga nisare tongi tugasa'-tugasa' lalanga ri Balla'Na Batara sangkamma tu Lewi maraengannaya.

¹³Massing-massing pa'rappungang passibijang ia lompoa yareka ca'dia, ammeso' ngasengi lomoro' nigoccang untu' angngassengi angkanaya ri bageang pakke'bu' lompoang kereanga mae ke'nanga latugasa'.

¹⁴Selemya anggappai pakke'bu' lompo bageang rayangnganga. Zakharia, iamintu ana'na, tuli assarea pappakainga' baji', anggappai pakke'bu' lompo bageang waraka.

¹⁵Obed-Edom anggappai pakke'bu' lompo bageang timboranga siagang ana'-ana'na anggappa tugasa' anjagai gudang-gudang pammantangang pakkakasaka.

¹⁶Supim siagang Hosa anggappai pakke'bu' lompo bageang laukanga siagang pakke'bu' Syalekhet ia niaka ri oloang pangngambikanga. Ia tugasa' pangawalaka niatoro' kammai anjo sa'genna tuli nia' a'jaga ri pakke'bu' lompoa.

¹⁷Allo-allona ri bageang rayangngang nia' annang pangawala', ri bageang wara' nia' appa' siagang bageang timboro' nia' appa'. Sikamma gudang pakkakasaka nijagai tongi ri appa' tau, ta'rua tau se're-se're gudang.

¹⁸Ri balla' ga'ga bageang laukanga niboliki appa' pajaga ri oloanga, siagang rua pajaga kalenna anjo balla' ga'gaya.

¹⁹Kammaminjo pambageang tugasa' pangawalaka napassareanga mae ri passibijanna Korah siagang passibijanna Merari.

²⁰Tumaraengannaya lalang ri suku Lewi nisarei tanggong jawa' mae ri barang-barang niaka lalang ri Balla'Na Batara, siagang mae ri gudang tampa' pammolikang sikamma apa-apa lanipassareanga mae ri Allata'ala.

²¹Ia Ladang, iami sitau ana' bura'ne battu ri Gerson. Iami nakabattui siapa area pa'rappungang passibijang, kammayami pole bijanna Yehiel, ana'na.

²²Ana'-ana'na Yehiel, iamintu Zetam siagang Yoël, ia nisarea tanggong jawa' mae ri gudang-gudanga siagang doe'na Balla'Na Batara.

²³Turunganna Amram, Yizhar, Hebron, siagang Uziel, anggappa' tongi bageang lalang tugasa'.

²⁴Sebuel battu ri passibijang Gersom, ana'na Musa, iami anjagai barang-baranga lalang ri Balla'Na Batara.

²⁵Nia' passisambung kaluargana Selomit tete ri Eliezer sari'battanna Gersom. Ia garisi' turunganna Eliezer sa'genna Selomit iamintu: Eliezer, Rehabya, Yesaya, Yoram, Zikhri, Selomit.

²⁶Selomit siagang bija pammanakanna tanggong jawa' mae ri sikontu passare napassareanga Karaeng Daud, kapala-kapala kaluargaya, pamimping-pamimping pa'rappungang bijaya, siagang sikamma perwira tinggina tantaraya.

²⁷Anjo sikamma passarea iami sipa'gang battu ri barang-barang narampasaka ke'nanga lalang pa'bundukang, siagang passarena ke'nanga untu' eroka lanipake poro untu' lalang ri Balla'Na Batara.

²⁸Bodona kana, Selomit siagang kaluargana iami tanggong jawa' mae ri sikontu apa le'baka nipassareang untu' poro eroka nipake lalang ri Balla'Na Batara, kammaya pole sikamma passare tete ri Na'bi Samuel, ia le'baka napassareang Karaeng Saul, Abner ana'na Ner, siagang Yoab ana'na Zeruya.

²⁹Turunganna Yizhar, iamintu Kenanya siagang ana'-ana'na, nisarei tugasa' untu' urusanna sura'-sura' negaraya siagang tugasa'-tugasa' pangadelanna Israel.

³⁰Sikontu urusang kaagamaanga siagang urusang pamarentahanga ri Israel bageang laukanna Binanga Yordan nipassareangi mae ri Hasabya, siagang ri 1.700 bija pammanakanna: yangasenna ke'nanga sangnging tau nipangngaliki ri turunganna Hebron.

³¹Pamimpinna turunganna Hebron iamintu Yeria. Ri taung makapatampulona taung pamarentahanna Karaeng Daud, disalidikimi ri sesena turunganna Hebron. Lalang ri anjo panyalidikanga a'nyatai angkanaya jai ri ke'nanga tantara-tantara kassa', ammantanga ri Yazer lalang ri daera Gilead.

³²Sikontu urusang kaagamaanga siagang pamarentahanga ri Israel bageang rayanganna Binanga Yordan — iamintu daera suku Ruben, Gad siagang sipa'gang suku Manasye — nipassareangi mae ri 2.700 kapala kaluarga Yeria, yangasenna sangnging tunikangalikang ia nipilea ri Karaeng Daud.