Read Makassar Version – KITTA' MATANGKASA 1 PATTOTTORANG 28 Bible Online

1 PATTOTTORANG 28 - Makassar Version – KITTA' MATANGKASA bible

1 PATTOTTORANG 28

¹Naparentakangi Daud sollanna a'rappungang ngaseng sikontu pamimping Israel ri Yerusalem. Jari sikamma kapala sukua, pajaba' ri urusang pamarentahanga, kapala-kapala pa'rappungang bijaya, sikamma pajagana barang-baranna siagang olo'-olo'na siagang ana'-ana' bura'nena karaenga — bodona kana sikamma tumalompoa ri balla'na karaenga, komandang tantaraya siagang tunipakalompoa, yangasenna a'rappungangi ri Yerusalem.

² Ammentemmi Daud ri dallekanna ke'nanga nampa nakana, “Sikamma sari'battang julu bansaku, pilangngeri anne kanangku! Salloma' ero' ambangung se're balla' attantu untu' Patti Parjanjiang, pattuppuang bangkenNa Karaeng Allata'alata. Le'ba'ma' appare' parsadiaang untu' ambangung se're balla' untu' a'jari tampa' anynyomba mae ri Ia.

³Mingka Napisangkaia' Batara anggaukangi anjo kammaya, lanri inakke anne se'rea' tantara jaiamo cera' kupassolong.

⁴Batara, Allata'ala nasombaya tu Israel, le'ba' ampilea' siagang turungangku untu' ammarenta ri Israel sa'genna satunggu-tungguna. Untu' appasadia sitau pamimping, Napilemi suku Yehuda, na battu ri ia anjo sukua Napilemi kaluargana manggeku. Siagang battu ri sikontua kaluargana manggeku, rellami ampilea' siagang ampa'jaria' karaeng mae ri sikontu Israel.

⁵Nasarea' jai ana', na battu ri sikontua anakku Napilemi Salomo untu' ammarenta ri Israel, kakaraenganNa Batara.

⁶Kammaminne kananNa Batara ri nakke, ‘Ana'nu Salomo lambangung balla' untu' iNakke. Iami le'ba' Kupile a'jari anakKu, na iNakke la'jari manggena.

⁷Punna attojeng-tojeng tuli anturuki sikontu hukkung siagang sikamma parentaKu sangkamma nagaukanga ri kamma-kammaya anne, laKupakajarreki kakaraenganna untu' satunggu-tungguna.’ ”

⁸Nampa nakana pole Daud, “Jari kamma-kamma anne, ikau ngaseng ra'yakku, ri dallekanNa Allata'alata siagang ri dallekanna pa'rappunganna sikontu Israel umma'Na Batara anne, kupala' tojeng-tojengi ri kau ngaseng sollanna nuturuki sikontu parentaNa Karaeng Allata'alata. Lalang kammana anjo akkullei tuli nukammai anne pa'rasangang bajika siagang nusossorang mae ri turungannu sa'genna satunggu-tungguna.”

⁹Nampa nakana Daud mae ri Salomo, “Anakku, parallui nuakui Allata'ala nasombaya manggenu, salaku Allata'alanu. Musti anynyombako mae ri Ia situlusu'na atinnu. Nasaba' Naasseng ngasengi sikontu pikkiranta siagang apa nakaerokia atinta. Punna nuboyai, lanubuntuluki, mingka punna nubokoi, laNasorongbokoko sa'genna satunggu-tungguna.

¹⁰U'rangi baji'-baji' angkanaya le'ba' mako Napile untu' ambangung balla' untu' KalenNa. Jari, kamma-kamma anne gaukammi anjo, na nupatterassang ero'nu.”

¹¹Le'baki anjo napassareammi Daud mae ri Salomo rancana bangunanna anjo Balla'Na Batara, gudang-gudanna, sikontu kamara'na, siagang Kamara' Kaminang Matangkasa'na, iamintu tampa' nipammopporanna dosaya.

¹²Napassareang tommi Daud sikontu rancana le'baka napikkiri' untu' bageang-bageang bokona anjo ballaka siagang sikamma kamara' niaka angkulilingi, kammayatompa gudang-gudang tampa' pammolikang sikamma pakkakasa' Balla'Na Batara siagang sikamma passare eroka nipassareang untu' Batara.

¹³Kammayatompa napassareang tommi rancanaya ri sesena sikamma pambageang pa'rappunganna imang-imanga siagang tu Lewi, ri sesena tugasa'-tugasa' musti najamaya ke'nanga, iamintu jama-jamanna ke'nanga ri Balla'Na Batara siagang untu' amparakai sikontu pakkakasa' sambayanga.

¹⁴Nasaremi pitunju'-pitunju' antekamma carana anjamai bulaenga siagang peraka untu' ampareki pakkakasa'-pakkakasa',

¹⁵untu' sikamma suloa siagang bangkeng suloa,

¹⁶untu' meja-meja peraka nipare', siagang untu' sikamma meja bulaeng tampa' roti nipatalaya mae ri Allata'ala.

¹⁷Kammayatompa pitunju'-pitunju' ri sesena siapa jaina bulaeng ti'no' musti nipake untu' appare' garpu, mangko' siagang botolo' ca'di, siapa jaina pera' siagang bulaeng untu' appare' piring-piring,

¹⁸siapa jaina bulaeng ti'no' untu' appare' tampa' pattunuang dupa siagang untu' appare' kareta untu' patung-patung malaeka' takka'ranga ka'nyi'na irateanna Patti ParjanjianNa Batara.

¹⁹Nampa nakana Karaeng Daud, “Yangasenna anjo niaki taccata' lalang ri rancana nitulisika situru' pitunju' Napassareanga KalenNa Batara mae ri nakke untu' nigaukang.”

²⁰Le'baki anjo nakanamo pole Karaeng Daud ri Salomo ana'na, “Musti matappakko na nubarani. Pakaramulaimi anjo jamanga siagang teako malla'-mallakki manna pole ri apa-apa mamo. Ia Karaeng Allata'ala kusombaya lantulungko. Tena nalaNabokoiko. Ia lanrurungangko sa'genna le'ba' anjo jama-jamanga.

²¹Le'ba'mi nibage tugasaka lalang ri Balla'Na Batara mae ri sikamma imanga siagang tu Lewia. Sikamma pajama-jama cara'deka massing ri jama-jamanna iami lambantuko situlusu' pa'mai'na, kammayatompa sikamma pamimpinga siagang sikontu ra'yaka lanaturuki parentanu.”