Read Makassar Version – KITTA' MATANGKASA 2 PATTOTTORANG 1 Bible Online

2 PATTOTTORANG 1 - Makassar Version – KITTA' MATANGKASA bible

2 PATTOTTORANG 1

¹Salomo ana' bura'nena Karaeng Daud a'jarimi karaeng kassa' empoanna lalang ri kakaraengang Israel. Nibarakkaki ri Karaeng Allata'alana, siagang nipa'jari sannaki lompona kakoasanna.

²Sikontu komandang pasukang 1.000 siagang komandang pasukang 100, sikontu tau anna'galaka pamarentahang, kammayatompa sikontu kapala kaluargana tu Israel niparentakangi ri Karaeng Salomo

³untu' a'lampa siagang ia mange ri tampa' panynyombanga ri Gibeon, lanri anjoremmi ammantang KemaNa Batara nipareka ri Musa atanNa Batara ri wattunna nia' ri parang lompoa. (

⁴ Mingka Patti ParjanjianNa Batara niaki ri Yerusalem, lalang ri kema nabangunga Daud untu' anjo Pattia ri wattunna napalette' battu ri Kiryat-Yearim.)

⁵ Tampa' pakkoro'bangngang tambaga napareka Bezaleel ana'na Uri, cucunna Hur, nia' tongi ri Gibeon, ri dallekanna KemaNa Batara. Karaeng Salomo siagang sikontu ra'yaka anynyombami ri Batara anjoreng.

⁶Ri dallekanna anjo Kemaya assaremi karaenga, iamintu irate ri tampa' pakkorobangngang tambagaya, 1.000 kayunna olo'-olo' salaku koro'bang nitunu untu' Batara.

⁷Anjo bangngia Napappicinikangi KalenNa Allata'ala mae ri Salomo nampa nakana, “Salomo, pala'mi apa nukaerokia nampa Kusareangko!”

⁸Appialimi Salomo angkana, “O Allata'ala, le'ba'mi Kipa'nyata angkanaya sanna' Kikamaseanna manggeku Daud, siagang le'ba'ma' Kiangka' a'jari karaeng untu' ansambeangi.

⁹ Kamma-kamma anne, o Karaeng Allata'ala, poro Kirupai laloi janjinTa mae ri manggeku. Le'ba'ma' Kiangka' a'jari karaeng mae ri anne bansa lompoa, tenaya nakkulle nirekeng siapa jaina.

¹⁰Lanri kammana anjo, poro Kisare laloa' kacara'dekang baji' siagang pangngassengang kuparalluanga untu' ampimpingi ke'nanga. Punna tena nakamma, antemi kamma bateku lakulle amparentai anne ummatTa lompo kammaya?”

¹¹Appialimi Allata'ala ri Salomo angkana, “Anjo pappala'nu bajiki. Teai kakalumanynyangngang yareka pa'barang-barangngang yareka areng baji' yareka kamateanna musunnu yareka umuru' la'bu untu' kalennu nupala', passangalinna kacara'dekang baji' siagang pangngassengang untu' ammarenta ri ummakKu Kupappirannuanga mae ri kau.

¹²Lanri kammana anjo laKusareko kacara'dekang baji' siagang pangngassengang. Pantaranganna anjo laKupa'jari coppongi katallassannu, la'bi kalumanynyang siagang la'bi masahoro' na karaeng maraengannaya, baji' karaeng allaloa kammayatompa karaeng labattua.”

¹³Nampa nabokoi Salomo anjo tampa' panynyombanga ri Gibeon napammantangia KemaNa Batara, nampa ammotere' mange ri Yerusalem. Battu anjoremmi napajappa pamarentahanna mae ri tu Israel.

¹⁴ Napassangkaki tantarana siagang 1.400 kareta bundu' siagang 12.000 jarang pa'bundukang. Nia' sipa'gang naboli' ri Yerusalem, na pantarangannaya ri kota-kota maraengannaya.

¹⁵ Ri wattu pamarentahanna Salomo, anjo bulaenga siagang peraka sanrapanji barang biasa ri Yerusalem, sangkamma batu; siagang kayu camaraya ri Libanon teai sipato' jaina sangkamma kayu ara biasaya.

¹⁶ Tete ri padanggang-padanggang ambantuai karaenga, nierangi jaranga battu ri Mesir siagang Kewe,

¹⁷kammayatompa kareta-kareta bunduka nipabattui battu ri Mesir, nampa nikiring pole assulu' mange ri karaeng Het siagang karaeng-karaeng Siria; ballinna punna nibalukangi anjo jaranga 150 doe' pera' sikayu, nampa kareta bunduka 600 doe' pera' tasse're.