Read Makassar Version – KITTA' MATANGKASA 2 PATTOTTORANG 11 Bible Online

2 PATTOTTORANG 11 - Makassar Version – KITTA' MATANGKASA bible

2 PATTOTTORANG 11

¹Ri wattunna battu Karaeng Rehabeam mange ri Yerusalem, napasse'remi tantara kaminang baji'na battua ri suku Yehuda siagang suku Benyamin, 180.000 tau jaina, untu' a'lampa ambunduki tu Israel siagang ampakajarreki ammotere' kakoasanna mae ri suku-suku niaka ri bageang wara'na Israel.

²Mingka nisuroi Na'bi Semaya ri Batara

³ampabattui mae ri Rehabeam siagang ri sikontu tau niaka ri suku Yehuda siagang Benyamin, anne pasang angkanaya,

⁴“Teako bunduki anjo sikamma sari'battannu tu Israel. Ammotere' kabusukko! INakke angkaerokangi anjo apa kajarianga.” Jari naturukimi ke'nanga anjo parentaNa Batara, siagang tanjariami ke'nanga a'lampa mange ambunduki Yerobeam.

⁵Anjorengi ri Yerusalem ammantang Rehabeam siagang nasuroi taua ambangung tembo'-tembo' pattahangngang untu' kota-kota niaka ri daera Yehuda siagang Benyamin, iamintu:

⁶Kota Betlehem, Etam, Tekoa,

⁷Bet-Zur, Sokho, Adulam,

⁸Gat, Mares, Zif,

⁹Adoraim, Lakhis, Azeka,

¹⁰Zora, Ayalon siagang Hebron.

¹¹Najarreki anjo kota-kota ammakea tembo' pattahangngang siagang ammoliki sitau komandang pasukang ri anjo tunggala' kotaya. Anjo kota-kotaya massing napassangkaki siagang parsadiaang kanre-kanreang, minynya' zaitun siagang anggoro',

¹²kammayatompa poke siagang pannangkisi'. Kammami anjo batena sa'genna anjo daera Yehuda siagang Benyamin tuli nia'na lalang kakoasanna.

¹³Imang-imanga siagang tu Lewi battua ri sikontu daera Israel battu kabusu' ampasse'rei kalenna siagang Rehabeam.

¹⁴Sikamma anjo tu Lewia nabokoi kabusuki parang-parang pa'rukukang olo'-olo'na siagang tampa'-tampa'na ke'nanga nampa a'lette' mange ri Yehuda siagang Yerusalem, lanri Yerobeam siagang sikamma karaeng ansambeangai tena napa'biangi ke'nanga anjamai jama-jamang imanga ri Batara.

¹⁵ Angngangkaki Yerobeam imang-imang untu' kalenna, untu' allayani tampa'-tampa' panynyombang barhalaya siagang untu' anynyomba ri jing-jing kammayatompa patung-patung sapi napareka kalenna.

¹⁶Sikamma tau battua ri suku-suku Israel attojeng-tojenga ero' anynyomba ri Batara, Allata'alana Israel, amminawangi ri anjo tu Lewia sollanna akkulle assare koro'bang mae ri Batara, Allata'ala nasombaya boe-boena ke'nanga.

¹⁷Lanri kammana anjo a'jari pila' kassa'mi kakaraengang Yehuda. Tallun taungi sallona ke'nanga amminawang ampakajarreki pamarentahanna Karaeng Rehabeam, ana'na Salomo. Na sangkammamo katallassanna ke'nanga ri jammang pamarentahanna Karaeng Daud siagang pamarentahanna Karaeng Salomo.

¹⁸A'buntingi Rehabeam siagang Mahalat; manggena Mahalat iamintu Yerimot ana' bura'nena Daud, na amma'na iamintu Abihail ana'na Eliab, cucunna Isai.

¹⁹Nia' tallu ana'na bura'ne ke'nanga iamintu: Yeus, Semarya siagang Zaham.

²⁰Nampa a'bunting Rehabeam siagang Maakha ana'na Absalom. Anggappai ke'nanga appa' ana' bura'ne iamintu: Abia, Atai, Ziza siagang Selomit.

²¹Nia' 18 bainenna Rehabeam siagang 60 baine piarana, 28 ana' bura'ne siagang 60 ana' baine. Battu ri anjo sikontu bainenna siagang baine piarana, ia kaminang nangaia iamintu Maakha.

²²Lanri kammanami anjo na Abia ana'na Maakha kaminang nangai na ana' maraengannaya, sa'genna iaminjo Abia napilei untu' ansambeangi a'jari karaeng.

²³Naatoro' bajiki Rehabeam batena assarei tugasa' anjo sikamma ana' bura'nena siagang natampakkangi ke'nanga ri kota-kota niaka pattahanganna ri sikontu daera Yehuda siagang Benyamin. Nasarei ke'nanga alla'bi-la'bi kanre-kanreang, siagang napasadiangi ke'nanga jai baine.