Read Makassar Version – KITTA' MATANGKASA 2 PATTOTTORANG 13 Bible Online

2 PATTOTTORANG 13 - Makassar Version – KITTA' MATANGKASA bible

2 PATTOTTORANG 13

¹Ri taung makasampulo assagantuju ammarentana Yerobeam ri Israel, anjo wattua na'jari Karaeng Abia ri Yehuda,

²siagang tallun taungi ammarenta ri Yerusalem. Amma'na iamintu Mikhaya ana'na Uriel battu ri kota Gibea. Nampa jarimo bunduka, iamintu Abia sipa'bali Yerobeam.

³Abia napagioki tantarana 400.000, nampa Yerobeam napagio' tongi tantarana 800.000 jaina.

⁴Assidallekangi anjo ruaya pasukang ri daera monconna Efraim. Naiki Abia ri Moncong Zemaraim nampa a'gora mae ri Yerobeam siagang tu Israel angkana, “Pilangngeri ngasengi!

⁵Nuassengi angkanaya le'baki Batara, Allata'alana Israel appare' janji mae ri Daud, angkanaya ia siagang jari-jarina lammarenta ri Israel sa'genna satunggu-tungguna. Anjo janjia tena le'bakai nipinra.

⁶Mingka manna nakamma mamo, anjo Yerobeam ana'na Nebat, angngewai mae ri Salomo, karaenna.

⁷Appasse'rei sipa'gompoang tau kurangajara' nampa ero' napassakang ero'na mae ri Rehabeam ana' bura'nena Salomo, rungka dudua anjo wattua siagang tenayapa pangalamanna untu' angngewa.

⁸Kamma-kamma anne gassingka nukapangi angkanaya akkullei nuewa kakoasang Napassareanga Batara mae ri jari-jarina Daud, lanri lompona pasukannu siagang lanri nia'na patung sapi bulaennu nipareka a'jari rewata ri Yerobeam untu' nusomba.

⁹Sai le'ba'mi nubongka imang-imanNa Batara, iamintu jari-jarina Harun siagang tu Lewi? Na sambenna iamintu inai-nai sambarang ero' a'jari imang, assala' angngerangi sikayu sapi yareka tuju kayu gimbala'. Nupa'jari imang teai untu' Allata'ala, nasaba' memang kammami anjo batena bansa-bansa maraenga angngangkaki imanna ke'nanga. Mingka ikatte tena nigaukangi kammaya anjo.

¹⁰Ikatte tuli anynyombata mae ri Karaeng Allata'alata siagang tena kima'boko ri Ia. Ikatte imang-imanta tuli jari-jarina Harun siagang tuli tu Lewi pambantuna ke'nanga.

¹¹Tunggala' bari'basa' siagang karueng attunui ke'nanga dupa siagang assarei koro'bang nitunu untu' Batara, kammayatompa appasadiai roti nipatala. Tunggala' bangngi ke'nanga apparinra kanjoli-kanjoli ri pa'dongkokang kanjoli bulaenga. Ikatte tuli mannurukiki' ri parenta-parentaNa Batara, mingka ikau ngaseng nubokoimi Batara.

¹²Ikatte pamimpinta iamintu Allata'ala KalenNa siagang sikamma imang niaka anrinni. Sadiami ke'nanga appasa'ra tarompe' untu' a'jari pammatei ri katte lamaju ambundukiko. He, tu Israel, teako angngewai ri Batara, Allata'alana boe-boenu! Takkulleako ammeta!”

¹³Lalanna anjo wattua nakirimmi Yerobeam sipa'gang pasukanna untu' angngadangi pasukanna Yehuda battu ri boko, nampa sipa'gang maraenganga andallekangi ke'nanga battu ri dallekang.

¹⁴Ri wattunna nacini' pasukang Yehuda angkanaya nikurummi ke'nanga, a'gorami ke'nanga appala' tulung ri Batara. Sikamma imanga appasa'rami tarompe',

¹⁵nampa akkio' bundu' pasukanna tu Yehuda siagang maju a'bundu', nipimping ri Abia. Lalang a'gorana ke'nanga nibetami Yerobeam siagang pasukang Israel ri Allata'ala,

¹⁶sa'genna larimo ke'nanga. Nisaremi pammetang tu Yehuda ri Allata'ala.

¹⁷Ammeta lompoi Abia siagang pasukanna mae ri tu Israel; nia' 500.000 pasukanna Israel kaminang bajika mate.

¹⁸Ammetai tu Yehuda lanri Batara, Allata'alana boe-boena ke'nanga napattoang.

¹⁹Ri wattunna naondang Abia pasukanna Yerobeam, nia' siapa are kota siagang desa-desa niaka ri ampi'na anjo kota-kotaya naalle. Anjo kota-kotaya iamintu Betel, Yesana, siagang Efron.

²⁰Lalang ammarentana Abia tanakulleami napakajarre' ammotere' Yerobeam kakoasanna. Kale'bakkanna nibunomi ri Batara.

²¹Kabalekanna, Abia pila' lompomi koasana. Nia' 14 bainenna, 22 ana' bura'nena siagang 16 ana' bainena.

²²Pau-pau maraengannaya ri passala'na Abia, siagang ri passala'na sikontu kana-kananna siagang apa nagaukanga le'baki nicata' lalang ri kitta' Pau-pauanna Na'bi Ido.