Read Makassar Version – KITTA' MATANGKASA 2 PATTOTTORANG 14 Bible Online

2 PATTOTTORANG 14 - Makassar Version – KITTA' MATANGKASA bible

2 PATTOTTORANG 14

¹Matenamo Karaeng Abia siagang le'ba'namo nitarawang ri pa'jerakkanna sikamma karaenga ri Kota Daud, nisambeammi ri ana' bura'nena niarenga Asa. Lalang ammarentana Asa, amangi pa'rasangang Yehuda sampulo taung.

²Sannangi nyawaNa Karaeng Allata'ala ri Asa, lanri nagaukanna Asa kaadelanga siagang kabajikanga.

³Napakabellai tampa'-tampa' pakkoro'bangnganna bansa maraenga siagang tampa'-tampa' panynyombanga mae ri barhalaya. Tembo'-tembo' patung rewataya naancuruki, siagang benteng-bentenna patung Dewi Asyera narumbangi.

⁴Nasuroi ra'ya' Yehuda attallasa' situru' ero'Na Batara, Allata'alana boe-boena ke'nanga, kammayatompa naturuki ajarang-ajaranNa siagang parenta-parentaNa.

⁵Sikontu tampa' panynyombanga mae ri barhalaya siagang tampa' pattunuang dupaya napakabella kabusuki battu ri kota-kotana Yehuda. Na'jari sannammo anjo kakaraenganga irawangang pamarentahanna,

⁶sa'genna akkulle ambangung kota-kota niaka pattahanganna ri Yehuda. Pirangtaung arei tena kajariang pa'bundukang lanri nisarena kasannangngang ri Batara.

⁷Nakanamo Asa ri ra'ya' Yehuda, “Bajiki punna nipakajarre' kota-kotaya nanibangungi tembo' ri tammulilina, nipaentengi menara-menara siagang nipapparekangi pakke'bu'-pakke'bu' lompo niaka balo'-balo' panjolina. Nikoasaimi anne pa'rasanganga lanri niturukimi ero'Na Karaeng Allata'alata. Ia amparakaiki' siagang anjagaiki' nakiamang ri sikontu pa'rasanganta.” Jari appakkaramulami ke'nanga ambangung nampa napa'jari anjo bangunanga siagang baji'.

⁸Tantarana Karaeng Asa iamintu nia' 300.000 tu Yehuda ammakea poke siagang pannangkisi', siagang 280.000 tu Benyamin ammakea sanjata pana, anrong pana siagang pannangkisi'. Kabusu'na ke'nanga sangnging tantara barani siagang le'ba' nilati.

⁹Ri se'reang wattu nia' se're tau battu ri Sudan niareng Zerah battu ambunduki tu Yehuda. Angngerangi pasukang 1.000.000 tantara siagang 300 kareta bundu'. Majui ke'nanga sa'genna narapi' Maresa bellana.

¹⁰Jari assulu'mi Asa andallekangi Zerah, siagang para naatoro'mi massing barisanna ri Lappara' Zefata ri ampi'na Maresa.

¹¹Nampa appala' doang Asa ri Karaeng Allata'alana, nakana, “O Batara, iKatteji bawang akkulle ambantui tau lammaya andallekangi tau kassaka. Kitulung laloi ikambe kamma-kamma anne, o Karaeng Allata'alana ikambe! Ri Katteji bawang tanjeng ikambe, siagang lanri arenTa bawang nassulu' anne ikambe untu' angngewai anne pasukang sannaka lompona. O Batara, iKatteji bawang Allata'alana ikambe. TeaKi' pa'biangngi KalenTa nibeta ri se'reang rupatau.”

¹²Nampa majumo Asa siagang tantara Yehuda ambunduki tantara Sudan. Nabetami Batara anjo tantara Sudan sa'genna lari kabusu'mo ke'nanga.

¹³Majumi Asa siagang tantarana angngondangi ke'nanga sa'genna mange ri Gerar bellana. Jai sikali tantarana tu Sudan mate sa'genna tenamo kagassinganna ke'nanga lanri niancuruki ri Batara, kammayatompa jai sikalimi barang-baranna ke'nanga nirampasa' ri tantara Yehuda. Nampa naancuru' tantara Yehuda kota-kota niaka ri ampi'na daera Gerar, lanri nipa'jari malla'na pandudu'na ri Batara. Narampasaki tantara Yehuda sikontu anjo kotaya siagang sanna' jaina barang-barang nagappa ke'nanga.

¹⁵Nabunduki tongi ke'nanga pakkemaanna sikamma pakalawakia, siagang jai gimbala' siagang unta nalaling ke'nanga. Le'baki anjo ammotere'mi ke'nanga mange ri Yerusalem.